«اۋىل» پارتياسى ۇگىت-ناسيحات ناۋقانى اياسىندا ەلىمىزدىڭ بارلىق 20 ءوڭىرىن قامتىعانى ايتىلدى. وڭىرلىك شتابتار 2 500-دەن استام ءىس-شارانى قامتيتىن ۇگىت-ناسيحات جوسپارىن ازىرلەسە, ونىڭ 70 پايىزى وتكىزىلدى. ەلىمىز بويىنشا 305 بيلبورد ورنالاستىرىلىپ, ەرىكتىلەر 200 مىڭ پلاكات, پاراقشا تاراتقان. شتابتار سايلاۋ كۇنى ءۇشىن سەنىم بىلدىرىلگەن ادامدار مەن باقىلاۋشىلاردى دايارلاۋ بويىنشا جۇمىس جۇرگىزىپ جاتىر.
ۇگىت-ناسيحات ناۋقانى الەۋمەتتىك جەلىلەردە دە, باق-تا دا بەلسەندى جالعاسىپ جاتىر. «اۋىل» پارتياسىنىڭ پاراقشاسىندا سايلاۋ الدىنداعى ۇگىتتى وتكىزۋ بارىسى تۋرالى 343 جاريالانىم شىقتى. باق-تا 3 مىڭنان استام ماتەريال, ونىڭ ىشىندە كانديداتتىڭ «ەگەمەن قازاقستان» جانە «كازاحستانسكايا پراۆدا» رەسپۋبليكالىق گازەتتەرىنە بەرگەن سۇحباتى جارىق كوردى.
جيگۋلي دايراباەۆ باستاعان توپ وكىلدەرى وبلىس سايلاۋشىلارىمەن كەزدەسۋدە اگروونەركاسىپتىڭ وندىرىستىك ورتالىقتارىنا بارىپ, ولاردىڭ قىزمەتىمەن تانىستى, سونداي-اق جۇمىسشى ۇجىمدارمەن سۇحباتتاستى.
