ارينە, بۇل زاڭنىڭ قابىلدانۋى وڭايعا سوققان جوق. قۇجاتتى دايىنداۋ كەزىندە قانشاما قۇزىرلى مەملەكەتتىك ورگانداردىڭ قىزمەتكەرلەرى تەر توكتى؟! بارلىق ايعاقتى, ءتيىستى قۇجاتتاردى جيناپ, سارالاپ, اعى مەن قاراسىن اجىراتۋ ءۇشىن اۋقىمدى جۇمىستار اتقارىلدى. ءبىر جىلعا جەتەر-جەتپەس ۋاقىتتا مەملەكەتىمىز وڭ شەشىم شىعارىپ وتىر. زاڭعا سايكەس اسا اۋىر قىلمىس جاساماعاندار بىردەن بوستاندىققا شىعادى. ال اۋىر قىلمىس جاساعانداردىڭ جازا مەرزىمى قىسقارتىلادى. بۇل جەردە مەيىرىمدىلىك اكتىسى زور قىزمەت اتقارعانىن ەرەكشە ايتىپ وتكەن ءجون.
سونداي-اق گۋمانيزم اكتىسى ادىلەتتى قوعام قالىپتاستىرۋعا ۇلەسىن قوسادى. ءار ادام قاتەلىك جاساۋعا قۇقىلى دەسەك تە, ءدال قاڭتار وقيعاسى كەزىندە كوپتەگەن ادامنىڭ جازىقسىز جاپا شەككەنىنە بارشا قوعام كۋا بولعانى راس. ازاماتتارىمىزدىڭ باسىم بولىگى ارانداتۋشىلىق توپتىڭ جەتەگىندە كەتىپ, قاماۋعا الىندى. سوندىقتان مەملەكەت بۇل جاعدايدى ەسكەرە وتىرىپ, «راقىمشىلىق جاساۋ تۋرالى» زاڭ قابىلداۋ جونىندە شەشىم شىعاردى. بۇل شىنداپ كەلگەندە, قاڭتار قىرعىنى كەزىندە جازا باسقاندارعا بەرىلگەن زور مۇمكىندىك.
راقىمشىلىق ارينە تولىققاندى كەشىرىم جاساۋ دەگەندى بىلدىرمەيدى. مۇنى قوعام دا, جەكەلەگەن ادامدار دا ءتۇسىنۋى كەرەك. ال راقىمشىلىقتىڭ ءوزى ۇزاق پروتسەسس. زاڭعا قول قويىلعاننان كەيىن راقىمشىلىققا ىلىككەندەر كەزەڭ-كەزەڭمەن بوساتىلادى. كەيىننەن زاڭ تالاپتارىنا سايكەس الەۋمەتتىك ماسەلەلەر بويىنشا جۇمىستار جۇرگىزىلەدى. ۇزاق ۋاقىت جۇمىسىنان قول ءۇزىپ قالعاندار بار, ءۇيسىز جۇرگەندەر بار, ولاردى الەۋمەتتىك باسپانامەن قامتاماسىز ەتۋ, جۇمىسقا تۇرعىزۋ – مىنە, وسىنىڭ بارلىعى اۋقىمدى جۇمىس.
قاڭتار وقيعاسىنان كەيىن ءاربىر ازامات ويلانىپ, شەشىم قابىلداۋى قاجەت. ارينە, تاڭداۋ اركىمنىڭ ءوز پايىمىنا قاراي جاسالادى. مەملەكەت راقىمشىلىق جاساپ, تۇسىنىستىك تانىتىپ, قولداۋ ءبىلدىرىپ وتىرعان كەزدە ازاماتتارىمىزدىڭ دا وسى شەشىمگە اسقان جاۋاپكەرشىلىك قاراعانى, قوعامعا پايدالى ءىس قىلعانى دۇرىس.
امان مامبەتاليەۆ,
ساياساتتانۋشى
