ءىس-شارا بارىسىندا كانديدات جينالعان قاۋىمعا ءوزىنىڭ سايلاۋالدى باعدارلاماسىنىڭ باسىم باعىتتارى جونىندە باياندادى. تۇرعىندار وزدەرىن الاڭداتقان وزەكتى پروبلەمالاردىڭ باعدارلامادا كورىنىس تابۋىن جىلى قابىلدادى. اسىرەسە, ماسەلەلەردى شەشۋ جولى كورسەتىلگەنى قۋانتادى. كەزدەسۋدە تۇرعىندار وزدەرىن الاڭداتقان سۇراقتارعا تولىمدى جاۋاپ الدى.
جيىندا قازاقستاننىڭ سىرتقى ساياساتىنا قاتىستى ساۋال قويىلدى. نۇرلان اۋەسباەۆ ستراتەگيالىق سالالاردا قازاقستان قالىپتى پروتەكتسيونيزمدى ۇستانۋ قاجەت دەپ ەسەپتەيدى. ن.اۋەسباەۆ مەملەكەت الدىندا تۇرعان باستى ماسەلە جەمقورلىقپەن كۇرەس ەكەنىن اتاپ ءوتتى. ۇمىتكەردىڭ پىكىرىنشە, ول ءۇشىن ەڭ الدىمەن ساياسي رەفورمالاردى جۇزەگە اسىرۋ كەرەك جانە ءماجىلىستىڭ ءرولىن كۇشەيتۋ كەرەك.
سونداي-اق ۇمىتكەر ءبىلىم بەرۋ سالاسى مەملەكەت تاراپىنان ايرىقشا نازاردى تالاپ ەتەتىنىن ايتتى. مەديتسينا جانە ءبىلىم بەرۋ سالالارىنا ءىجو-دەن جىلىنا ەڭ كەمى 5-7%-دى ءبولۋدى ۇسىندى. جالپىۇلتتىق سوتسيال-دەموكراتيالىق پارتيا وكىلى مۇنداي شارا دارىگەرلەر مەن مۇعالىمدەر ەڭبەكاقىسىنىڭ بانك قىزمەتكەرلەرى دەڭگەيىنە دەيىن كوتەرۋگە مۇمكىندىك بەرەتىنىن ايتتى. «مۇنىڭ ماڭىزى زور, سەبەبى بۇل ماماندار ادامي كاپيتالدىڭ ساپاسىنا جاۋاپ بەرەدى, ال بۇل ءوز كەزەگىندە وتاندىق ەكونوميكانى دامىتۋ ءۇشىن نەگىزگى تالاپ بولىپ سانالادى», دەدى ن.اۋەسباەۆ.
