كەزدەسۋ كەزىندە كانديدات ەلدەگى باسشىلىق قىزمەتتەگى ايەلدەردىڭ قۇزىرەتتىلىگى تومەن ەكەنىن جاسىرمادى. «قازاقستانداعى باسشىلىق لاۋازىمدارداعى گەندەرلىك وكىلدىكتىڭ جاعدايى اسا ءماز ەمەس. ايەلدەر ەل حالقىنىڭ باسىم بولىگىن قۇراسا دا, باسشىلىق قىزمەتتەگى ايەلدەر سانى وتە از. قۇزىرەتتىلىك جوقتىعىنان ايەلدەردىڭ پىكىرى ەسكەرىلمەيدى», دەدى ول.
ۇلتتىق ستاتيستيكا بيۋروسىنىڭ مالىمەتىنە سۇيەنسەك, قازاقستان رەسپۋبليكاسىنىڭ حالقى 19 ملن ادامدى قۇرايدى, ونىڭ 52 پايىزى – ايەلدەر. 2020 جىلعى ەسەپكە سايكەس, ەلىمىزدە جۇمىس ىستەيتىن ءاربىر ەكىنشى ايەلدىڭ (47,3%) جوعارى نەمەسە جوعارى وقۋ ورنىنان كەيىنگى ءبىلىمى بار. جوعارى ءبىلىمدى جۇمىسپەن قامتىلعان ەرلەردىڭ ۇلەسى نەبارى 38,1%.
ء«بىزدىڭ ەلدە ايەلدەر كوپ, ولاردىڭ اراسىندا ءبىلىمدىسى دە جەتەرلىك. بىراق باسشىلىق قىزمەتتەردە كوزگە كورىنەتىن تەڭگەرىمسىزدىك بار. وعان مىنا جاعدايلاردى مىسال رەتىندە الۋعا بولادى: قازىر بىزدە وبلىس نەمەسە رەسپۋبليكالىق ماڭىزى بار قالانىڭ بىردە-ءبىر ايەل اكىمى جوق. تەك ەكى ايەل مينيستر بار. سونىڭ وزىندە ادەتتەگىدەي ايەلدەر عانا باسقاراتىن دەنساۋلىق ساقتاۋ مەن الەۋمەتتىك قورعاۋ سالالارى. پارلامەنتتەگى ايەلدەردىڭ سانى ۇشتەن بىرىنە دە جەتپەيدى», دەدى س.تۇرسىنبەكوۆا.
