ەمحانانى ارالاۋ بارىسىندا ۇمىتكەر تەك مەديتسينا قىزمەتكەرلەرىمەن عانا ەمەس, ناۋقاستارمەن دە تىلدەستى. كەزدەسۋ كەزىندە ناۋقاستاردىڭ ءبىرى ءدارى-دارمەك باعاسىنىڭ قىمباتتىعىنا شاعىمدانىپ, ءبىر كۋرس ەم ءۇشىن تەك ينەكتسياعا 40 مىڭ تەڭگەگە جۋىق قاراجات جۇمساعانىن ايتتى. ء«دارى-دارمەك باعاسى كۇن وتكەن سايىن قىمباتتاپ بارادى. جاقىندا ماعان ينەكتسيالار تاعايىندالدى. ءبىر امپۋلاسى 1300 تەڭگە تۇرادى. مەنىڭ ەمىمە بىردەن 30-ى قاجەت, بۇل باسقا پرەپاراتتاردى, شپريتستەردى جانە وزگە دە شىعىنداردى ەسەپتەمەگەندە شىعاتىن سوما», دەدى ەمحاناداعى ەمدەلۋشىلەردىڭ ءبىرى.
كانديداتپەن كەزدەسۋ كەزىندە دارىگەرلەر دە وزدەرىن مازالاعان ماسەلەلەردى تالقىعا سالىپ, وزەكتى سۇراقتارىن قويدى. ولاردىڭ ايتۋىنشا, ەمحانادا دارىگەرلەر, اسىرەسە, كاسىبي ماماندار تاپشىلىعى قاتتى بىلىنەدى. جالاقىنىڭ ازدىعى دا بىلىكتى كادر ماسەلەسىن ۋشىقتىرىپ تۇر.
سالتانات تۇرسىنبەكوۆا مەملەكەت پەن حالىقتىڭ ىنتىماقتاسا جۇمىس ىستەۋ كەرەكتىگىن ايتتى. «دەنساۋلىق ساقتاۋ جۇيەسىندە شەشىمىن تاپپاعان ماسەلەلەر كوپ. دارىگەرلەرگە قولايلى جاعداي جاسالسا, ناۋقاستارعا دا وڭ اسەرى بولارى ءسوزسىز. مۇنىڭ ءبارى جۇيەنىڭ قالاي دۇرىس قۇرىلاتىنىنا بايلانىستى», دەدى س.تۇرسىنبەكوۆا.
