ءيا, كەزىندە ۇلى اباي دا «ەڭبەك ەتسەڭ ەرىنبەي, تويادى قارنىڭ تىلەنبەي» دەگەن جوق پا ەدى. ولاي بولسا, قاي زاماندا دا «ەڭبەكتىڭ نانى ءتاتتى, جالقاۋدىڭ جانى ءتاتتى» دەگەن حالىقتىق ءتامسىل بارشامىزدى ەڭبەك ەتۋگە تاربيەلەپ كەلەدى. ال ەڭبەكتىڭ جەمىسىن كورۋ قۋانىش بولسا, ونىڭ باعالانعانىن سەزىنۋ دە ءبىر باقىت. ادال ەڭبەك قاي قوعامدا دا اسا جوعارى باعالانعان ءارى سوعان لايىق قۇرمەت كورسەتىلىپ وتىرعان. مەملەكەت باسشىسىنىڭ «ادىلەتتى قازاقستاندا ەڭبەك ادامى ەڭ ءبىرىنشى ورىندا تۇرادى» دەۋىنىڭ دە باستى سەبەبى وسىندا جاتىر.
ال حالىقتىڭ باقۋاتتى بولۋىن قامتاماسىز ەتۋ ءۇشىن ەڭ الدىمەن ونى ماسىلدىق پسيحولوگيادان قۇتقارۋىمىز قاجەت. وسى جولدا ەڭبەك ادامدارىن ىنتالاندىرۋ, قۇرمەت كورسەتۋ, ولاردىڭ جەتىستىكتەرىن دارىپتەۋ ماڭىزدى. ءبىز بولساق, قازاقستان ونەركاسىبىن دامىتۋدى قولعا العان كەزدەن بەرى وسى ۇستانىمنان اينىماي كەلەمىز. ەلىمىزدە شىعارىلاتىن ونىمدەردىڭ حالىقارالىق ستاندارتتارعا ساي لايىقتى باعاسىن الىپ جۇرگەنى سول ادال ەڭبەكتىڭ ناتيجەسى ءارى بۇل جەتىستىكتە ءاربىر قاراپايىم ەڭبەك ادامىنىڭ ۇلەسى بار.
ادىلەتتى قازاقستاننىڭ پرەزيدەنتتىڭ پارمەنىمەن عانا ەمەس, ءار ازاماتتىڭ ەڭبەگىمەن قۇرىلاتىنىن تۇسىنە بىلگەن ابزال دەسەك, ءبىر ورىندا تۇرىپ باق كۇتۋ – ەسسىزدىك. باق پەن ىرىسقا جەتۋ ءۇشىن العا قادام باسۋ كەرەك. تەك ماقساتى بار, قيىندىقتان قورىقپايتىن, ەڭبەكتەن قاشپايتىن ادام ادىلەتتى قازاقستاننىڭ يگىلىگىن كورمەك.
ءيا, الەمنىڭ ءامىرشىسى – ەڭبەك. تەك ەڭبەكپەن عانا جەمىس ونبەك, تەك ەڭبەك قانا بار قيىندىقتى جەڭبەك. سوندا عانا قازاقستان حالقى بۇگىنگىدەن دە زور جەتىستىكتەرگە جەتەتىن بولادى. ءاربىر سالادا جۇمىس اتقارىپ جۇرگەن قىزمەتكەردىڭ دە, قاراپايىم جۇمىسشىنىڭ دا ەڭبەگىنە تەك قانا ساتتىلىك سەرىك بولسىن دەپ تىلەيمىن!
قۇرمانشادى ورازىمبەتوۆ,
تۇڭعىش پرەزيدەنت تاريحي-مادەني ورتالىعىنىڭ عىلىمي قىزمەتكەرى
استانا
