«اتىراۋ – قازاق ەلىنىڭ ەۋروپاعا شىعار قاقپاسى. ۇلى جىبەك جولىنىڭ سولتۇستىك تارماعى وسى ولكە ارقىلى وتكەنى تاريحتان بەلگىلى. قالا ورتالىعىنداعى كوپىر ازيا مەن ەۋروپانى جالعاپ تۇر. مۇنىڭ زور سيمۆولدىق ءمانى بار. ءبىر سوزبەن ايتقاندا, ەلىمىز ءتۇرلى وركەنيەتتەر توعىسقان توعىز جولدىڭ تورابىندا ورنالاسقان. سوندىقتان, قازاقتىڭ جەرىن ەجەلگى زاماننان ءتۇرلى ءدىني نانىم وكىلدەرى مەكەندەگەن», دەپ اتاپ ءوتتى پرەزيدەنت.
بۇل رەتتە مەملەكەت باسشىسى الەمدە بولىپ جاتقان ءتۇرلى قاقتىعىستارعا ءدىني الاۋىزدىق نەگىزگى سەبەپ بولاتىنىن ايتتى.
«حالقىمىز ءدىني ۇستانىمىنا قاراپ ەشكىمدى كەمسىتپەگەن. ءبارى تاتۋلىقتا ءومىر سۇرگەن. جاقىندا استانادا وتكەن الەمدىك جانە ءداستۇرلى دىندەر باسشىلارىنىڭ سەزىنە قاتىسۋشىلار دا مۇنى ايرىقشا اتاپ ءوتتى. ءتىپتى, ريم پاپاسى ۇلى اباي جانە دومبىرانىڭ قۇدىرەتى تۋرالى تەرەڭ ويلارىن ايتتى.
«مەن مۇنى بەكەرگە ايتىپ وتىرعان جوقپىن. قازىر جەر جۇزىندە بولىپ جاتقان ءتۇرلى قاقتىعىستاردىڭ نەگىزگى سەبەپتەرىنىڭ ءبىرى – ءدىني الاۋىزدىق. ءبىز ەلىمىزدە تىنىشتىق پەن تۇراقتىلىق بولعانىن تىلەيمىز. سول سەبەپتى, بۇل ماسەلەنى نازاردان تىس قالدىرماۋىمىز كەرەك», دەپ قوستى مەملەكەت باسشىسى.
پرەزيدەنتتىڭ ايتۋىنشا, قازاقستان كونستيتۋتسياسىندا ءدىن بوستاندىعىنا كەپىلدىك بەرىلگەن. الايدا ەلىمىزدە راديكالدى اعىمدار مەن ءدىني سەپاراتيزمنىڭ تاراۋىنا جول بەرىلمەۋ قاجەت.
«قازاقستان – زايىرلى مەملەكەت. كونستيتۋتسيامىزدا ءدىن بوستاندىعىنا كەپىلدىك بەرىلگەن. بىراق, زايىرلى جانە ءتوزىمدى, تولەرانتتى بولۋ دەگەنىمىز بارىنە كوز جۇما قاراپ, جايباراقات وتىرۋ دەگەن ءسوز ەمەس. ءبىز ەلدىڭ قاۋىپسىزدىگى مەن تۇتاستىعىنا نۇقسان كەلتىرۋگە ەشقاشان جول بەرمەيمىز. راديكالدى اعىمدار مەن ءدىني سەپاراتيزمگە ورتامىزدا ورىن جوق. بابالارىمىز عاسىرلار بويى يسلام ءدىنىن ۇستانعان. شاريعاتتىڭ شارتتارى مەن حالقىمىزدىڭ ادەت-عۇرپى ۇندەسكەن ءداستۇرلى اتا ءدىنىمىز بار. ونىڭ اسىل قۇندىلىقتارى وسى كۇنگە دەيىن ۇلتىمىزدى ۇيىستىرىپ, بىرلىگىمىزدى بەكەمدەپ كەلەدى. اتا جولىن ساقتاپ, ءدىنىمىز بەن سالت-ءداستۇرىمىزدى بەرىك ۇستاۋ – ءبىزدىڭ پەرزەنتتىك پارىزىمىز. وسى ورايدا, جاستارعا دۇرىس باعىت-باعدار بەرۋ اسا ماڭىزدى», دەپ قوستى قاسىم-جومارت كەمەل ۇلى.
پرەزيدەنتتىڭ ايتۋىنشا, قانداي جاعداي بولماسىن, قازاقتىڭ بولمىسىنا ءتان قاسيەتتەر ەشقاشان ۇمىت بولماۋعا ءتيىس.
«ۇلتتىق قۇندىلىقتارىمىزدى اياقاستى ەتۋگە بولمايتىنىن جاستارعا بايىپپەن ءتۇسىندىرۋ كەرەك. ەل اعالارى جانە ءدىن ادامدارى بۇل ماسەلەگە ايرىقشا ءمان بەرگەنى ءجون دەپ سانايمىن. مەن ۇلتتىڭ جاڭا ساپاسىن قالىپتاستىرۋ تۋرالى ۇنەمى ايتىپ ءجۇرمىن. ماڭىزدى ىستە ار-ۇيات, مەيىرىمدىلىك پەن جاناشىرلىق سياقتى ىزگى ۇعىمدار ۇمىت قالماۋعا ءتيىس. بۇل – قازاقتىڭ بولمىسىنا ءتان قاسيەتتەر. ءال-فارابي «تاربيەسىز بەرىلگەن ءبىلىم – ادامزاتتىڭ قاس جاۋى» دەپ بەكەر ايتپاعان. اتوم بومباسى دا, اتوم ەنەرگياسى دا – ادامزاتتىڭ اقىل-ويىنىڭ جەمىسى. ياعني, قانشا جەردەن ءبىلىمدى بولسا دا, ىزگىلىككە ۇمتىلماعان ادام ەلگە پايداسىن تيگىزبەيدى. سوندىقتان, وزىق ءبىلىم مەن ونەگەلى تاربيەنى ۇرپاقتىڭ بويىنا قاتار ءسىڭىرۋىمىز قاجەت», دەپ پايىمدادى ەل پرەزيدەنتى.
ءسوزىن قورىتىندىلاي كەلە, قاسىم-جومارت كەمەل ۇلى وسكەلەڭ ۇرپاقتىڭ تاربيەسىنە ەرەكشە نازار اۋدارۋ قاجەت ەكەنىن قاداپ ايتتى.
«قوعامدا دۇرىس قۇندىلىقتار ورنىقپاسا, جەمقورلىق, ماسىلدىق, ىسىراپشىلدىق سياقتى الەۋمەتتىك كەسەلدەر تامىر جايادى. مۇنىڭ ءبارى مەملەكەتىمىزدى السىرەتەدى. قوعامدى ىشتەن ىرىتەدى. زاڭدىلىق پەن ءتارتىپتى بۇزادى. ءبىر سوزبەن ايتقاندا, بۇكىل ەلدى داعدارىسقا ۇشىراتادى. ءبىز بۇعان جول بەرمەيمىز. سول ءۇشىن ادامگەرشىلىك قۇندىلىقتارىنا نەگىزدەلگەن ساياساتقا باسا ءمان بەرەمىز. سونداي-اق, وسكەلەڭ ۇرپاقتىڭ تاربيەسىنە ەرەكشە نازار اۋدارامىز. جاستارىمىز ادال ەڭبەك ەتۋدىڭ, بىلىمگە قۇشتارلىقتىڭ ءمان-ماڭىزىن جەتە ءتۇسىنۋى قاجەت. مىقتى مەملەكەت قۇرامىز دەسەك, بۇدان باسقا جول جوق», دەپ تۇيىندەدى مەملەكەت باسشىسى.
