كليماتتىق سامميت جۇمىسىنا 120-دان استام ەلدىڭ وكىلدەرى قاتىسۋدا. مەملەكەتتەر مەن ۇكىمەتتەر باسشىلارى كليماتتىڭ وزگەرۋىنىڭ ەڭ وزەكتى ماسەلەلەرى بويىنشا ءوز ەلدەرىنىڭ ۇستانىمدارىن بىلدىرەتىن «ۇلتتىق ۇندەۋلەر» جاسادى.
ءاليحان سمايىلوۆ ءوز سوزىندە قازاقستان كليمات جونىندەگى پاريج كەلىسىمىنىڭ ماقساتتارى مەن مىندەتتەرىن بەرىك ۇستاناتىنىن اتاپ ءوتتى.
ء«بىزدىڭ ەلىمىز 2060 جىلعا قاراي كومىرتەگى بەيتاراپتىعىنا قول جەتكىزۋ تۋرالى بارىنشا بيىك ماقساتتاردى قويىپ وتىر. وسىنىڭ اياسىندا جىل سوڭىنا دەيىن تومەن كومىرتەكتى دامۋ ستراتەگياسىن قابىلداۋ جوسپارلانۋدا. ورتالىق ازياداعى ەلدىڭ العاش بولىپ وسىنداي ماڭىزدى قۇجاتتى قابىلداۋى تاريحي ساتكە اينالماق», دەدى ءاليحان سمايىلوۆ.
ونىڭ ايتۋىنشا, بۇگىندە قازاقستاندا جالپى وندىرىستەگى «جاسىل» ەنەرگيانىڭ ۇلەسى شامامەن 3%-دى قۇرايدى. بۇل رەتتە ونى ءوندىرۋ كولەمىن 15%-عا دەيىن, ياعني 2030 جىلعا قاراي قوسىمشا 7 گۆت-قا ۇلعايتۋ جوسپارلانۋدا. سونىمەن قاتار بيىل كومىرتەگى شىعارىندىلارىن كەم دەگەندە 15%-عا تومەندەتۋ كوزدەلگەن.
«قازاقستاننىڭ «جاسىل» ەنەرگەتيكانىڭ الەمدىك ورتالىقتارىنىڭ ءبىرى بولۋعا الەۋەتى زور. سوندىقتان ءبىز جاڭارتىلاتىن ەنەرگيا كوزدەرىن دامىتۋدىڭ ايماقتىق ورتالىعىنا اينالۋعا جانە جالپى ورتالىق ازيانى «جاسىل» تەحنولوگيالارعا كوشۋگە ىنتالاندىرۋعا دايىنبىز», دەپ اتاپ ءوتتى پرەمەر-مينيستر.
وسى ورايدا ول ەلىمىزدە «جاسىل» سۋتەگى ءوندىرىسى مەن ەكسپورتىن ۇلعايتۋعا ەرەكشە نازار اۋدارىلاتىنىن ايتتى.
«تەحنولوگيالىق جاڭعىرتۋدىڭ ماڭىزدىلىعىن, ونىڭ ىشىندە پاريج كەلىسىمى شەڭبەرىندە ءبىلىم الماسۋدى ەنگىزۋ جانە «تازا» تەحنولوگيالاردى بەرۋ قاجەتتىگىن ەرەكشە اتاپ وتكىم كەلەدى», دەدى ءاليحان سمايىلوۆ.
«سونداي-اق ءبىز جاڭا ەكولوگيالىق كودەكس اياسىندا شارالار قابىلداپ, 2025 جىلعا دەيىن 2 ميلليارد ءتۇپ اعاش وتىرعىزۋ سەكىلدى اۋقىمدى مىندەتتى ىسكە اسىرامىز», دەدى ءاليحان سمايىلوۆ.
قورىتىندىلاي كەلە, پرەمەر-مينيستر بۇگىندە الەمدىك قوعامداستىقتىڭ بۇرىن-سوڭدى بولماعان سىن-قاتەرلەردى باستان كەشىرىپ وتىرعانىن اتاپ ءوتتى.
«وسىعان بايلانىستى بىزگە تۇراقتى جانە تەڭ قۇقىلى باتىل شەشىمدەر مەن ادىلەتتى دامۋ ۇلگىلەرى قاجەت. قازاقستان كليماتتىق كۇن تارتىبىندەگى ماسەلەلەردىڭ كەڭ اۋقىمى بويىنشا بارلىق حالىقارالىق سەرىكتەستەرمەن ىنتىماقتاستىق ورناتۋعا دايىن», دەپ تۇيىندەدى ول.
