قۇرىلعانىنا كوپ ۋاقىت وتپەسە دە «استانا بالەت» تەاترى بۇگىندە ەلىمىزدىڭ جەتەكشى حورەوگرافيالىق ۇجىمدارىنىڭ بىرىنە اينالىپ, دۇنيەجۇزى بويىنشا سان مىڭداعان جانكۇيەرى بار وردالى ونەر مەكەنى رەتىندە شارتاراپتى مويىنداتىپ ۇلگەردى. گاسترولدىك-كونتسەرتتىك قىزمەتىن ءوز ەلىمىزدە دە, شەتەلدەردە دە بەلسەندى اتقارىپ كەلە جاتقان تەاتر ارتىستەرى بەيجىڭ مەن شانحاي (قىتاي), پاريج (فرانتسيا), ۆەنا (اۋستريا), سەۋل (كورەيا), بۋداپەشت (ماجارستان), باكۋ (ازەربايجان), نيۋ-يورك (اقش), توكيو (جاپونيا), ۆارشاۆا (پولشا), مينسك (بەلارۋس), بريۋسسەل (بەلگيا), ميلان (يتاليا), مونتە-كارلو (موناكو), دۋباي ء(باا) قالالارىنىڭ ايگىلى ساحنالارىندا جوعارى دەڭگەيدە ونەر كورسەتىپ قايتتى. گرۋزيا ەلىنە العاش رەت جوسپارلانىپ وتىرعان كەزەكتى ونەر ساپارى سول تابىستى جوبانىڭ ءساتتى جالعاسى دەسەك, ارتىق ايتقاندىق ەمەس.
– ءبىز ءۇشىن گرۋزياعا ساپار وتە ماڭىزدى. ايگىلى ساحنادا ونەر كورسەتۋ – وراسان جاۋاپكەرشىلىك. سوندىقتان بالەت ونەرىندەگى شەبەرلىگىمىزدى كورسەتكىمىز كەلەدى. گاسترول باعدارلاماسىن تاڭداۋعا دا اسا ىجداھاتتىلىقپەن قارادىق. ءسويتىپ, ءوزىمىزدىڭ نەگىزگى باعىت-باعدارىمىز – قازىرگى زامان جانە نەوكلاسسيكا بالەتىمەن رەپەرتۋارىمىزدىڭ ماقتانىشى, وتاندىق جانە شەتەلدىك كورەرمەننىڭ كوزايىمىنا اينالعان ۇلتتىق ديۆەرتيسمەنتتى تاڭدادىق. ارتىستەر مەن تەاتر ۇجىمىنىڭ ونەرى ۇمىتىلماس اسەر قالدىرىپ, كورەرمەن جۇرەگىنەن ورىن الارىنا ءۇمىتتىمىز. گرۋزيالىق كورەرمەنمەن كەزدەسۋىمىزدى تاعاتسىزدانا كۇتىپ ءجۇرمىز, – دەيدى الداعى ونەر ساپارى جونىندە تەاتر ديرەكتورى الەكساندر سوۆوستيانوۆ.
مادەنيەت جانە سپورت مينيسترلىگىنىڭ قولداۋىمەن وتەتىن گاسترولدىك ساپاردىڭ العاشقى كۇنى تالعامپاز كورەرمەننىڭ نازارىنا ل.شيفرين, ا.پياتستسوللو, ك.گاردەل جانە س.كوسۋگيدىڭ مۋزىكاسىنا ريكاردو امارانتە قويعان «A Fuego Lento» نەوكلاسسيكالىق بالەتى ۇسىنىلادى. بۇل – بالەتمەيستەردىڭ ماحاببات پەن قۇشتارلىق جايلى ەركىن قيالى. ءبىر اكتىلى بالەتتىڭ ءار ەپيزودى – قۋاتتى ءارى سەزىمتال تانگو اۋەزىنە قويىلعان حورەوگرافيالىق مينياتيۋرالار. ورىنداۋشىلىقتىڭ اسقان شەبەرلىگى مەن البىرت سەزىم ۇشقىنى ۇندەستىك تاپقان بالەت شىنايى سەزىمدى سۋرەتتەيدى.
ال كەشتىڭ ەكىنشى بولىمىندە وسكار ءۋايلدتىڭ پەساسى بويىنشا فازىل ساي مۋزىكاسىنا تەاتردىڭ باس بالەتمەيستەرى مۋكارام اۆاحري قويعان «سالومەيا» بالەتى كورسەتىلەدى. اۆتورلىق ينتەرپرەتاتسياداعى بيبليا سيۋجەتى سەزىم ارپالىسىن سۋرەتتەيدى. باس كەيىپكەرلەردىڭ كۇردەلى, قاراما-قايشى بەينەلەرى كورەرمەن قاۋىم ءۇشىن ادام جانىنىڭ جۇمباعىنىڭ شىمىلدىعىن اشقانداي بولادى. بالەتمەيستەر ز ۇلىمدىق پەن جاقسىلىقتىڭ ماڭگىلىك كۇرەسى جايلى وي تولعاپ, ارقايسىمىزعا ءوز تاڭداۋىمىزدى جاساۋدى ۇسىنادى. سپەكتاكلدىڭ شىرقاۋ شىڭى – سالومەيانىڭ ءبيى. بۇل وقيعا سۋرەتشىلەردىڭ, مۇسىنشىلەر مەن كومپوزيتورلاردىڭ شىعارمالارى ارقاسىندا كوپشىلىككە بەلگىلى.
گاسترولدىك ساپاردىڭ ەكىنشى كۇنى استانالىق ۇجىم قازاقستاننىڭ ەڭبەك سىڭىرگەن قايراتكەرلەرى ايگۇل ءتاتي مەن مۋكارام اۆاحري قولتاڭباسىندا ۇسىنىلعان « ۇلى دالا مۇراسى» ۇلتتىق ديۆەرتيسمەنتىن كورسەتەدى. ەتنوگرافيالىق ماتەريال مەن زاماناۋي حورەوگرافيا ءساتتى ۇندەستىك تاپقان تۋىندى گرۋزيالىق كورەرمەندى دە بەيجاي قالدىرماسى انىق.
