كانديدات ءوزىنىڭ سايلاۋالدى باعدارلاماسىن تانىستىرۋ بارىسىندا الەۋمەتتىك ارىپتەستىك ينستيتۋتىن دامىتۋدىڭ, تاۋەلسىز كاسىپوداقتار مارتەبەسىن كوتەرۋدىڭ, ەكونوميكا مەن ەڭبەكاقى تولەۋ جۇيەسىن رەفورمالاۋدىڭ ماڭىزدىلىعىن اتاپ ءوتتى.
ايتا كەتەيىك, بۇگىندە كاسىپورىندا 500-دەن استام ادام جۇمىس ىستەيدى, ولاردىڭ 90 پايىزى – كاسىپوداق مۇشەسى. وسىعان بايلانىستى كانديدات ەڭبەكشىلەردىڭ مۇددەلەرىن قورعايتىن ۇيىمداردىڭ مارتەبەسىن كوتەرۋگە باسا نازار اۋداردى.
ء«بارىمىز جوعارى تابىس العىمىز كەلەدى. بۇل ءبىز ءۇشىن كىرىس بولسا, جۇمىس بەرۋشى ءۇشىن شىعىن. سوندىقتان جالاقى مولشەرىنىڭ قانداي بولۋى كەرەكتىگىن, ونى قالاي كوبەيتۋگە بولاتىنىن تالقىلاۋ قاجەت. بۇل ماسەلەنى سالالىق دەڭگەيدە شەشكەن ءجون. ول ءۇشىن قىزمەتكەرلەر ءوز قۇقىقتارىن قورعاۋ ماقساتىندا كاسىپكەرلەرمەن جانە جۇمىس بەرۋشىلەرمەن بىرلەسىپ ەڭبەكاقى تولەۋ جۇيەسىن ازىرلەيتىن سالالىق كاسىپوداقتارعا سەنىم ارتۋعا ءتيىس», دەدى م.قاجىكەن.
كانديدات «كاسىپوداقتار اراسىنان ۇسىنىلدىم, دەمەك بارلىق جۇمىسشى كوتەرگەن ماسەلەلەردى شەشۋ جاۋاپكەرشىلىگى جۇكتەلگەن» دەدى. ۇمىتكەر ساپالى جانە قولجەتىمدى ءبىلىم بەرۋدى, دەنساۋلىق ساقتاۋ سالاسىن قارجىلاندىرۋدى جانە الەۋمەتتىك جاعدايى تومەن وتباسىلارعا تۇرعىن ءۇي بەرۋدى قولدايتىنىن ايتتى.
