قازاقستاندىق وقۋشىلار مەن اتا-انالار مەكتەپ اجەتحانالارى, جۋىناتىن بولمەلەردەگى پروبلەمالار مەن اسحاناسىنداعى بۇزۋشىلىقتار تۋرالى وقۋ-اعارتۋ مينيسترلىگىنە حابارلاي الادى. ايتا كەتەرلىگى, اۆتورلاردىڭ انونيمدىلىگىنە كەپىلدىك بەرىلىپ, ولار تۋرالى اقپارات جاريا ەتىلمەيدى. مەكتەپ اجەتحانالارى مەن اسحانالارىنداعى كەمشىلىكتەر تۋرالى فوتو جانە ۆيدەونى 8 700 699 04 46 ءنومىرى ارقىلى WhatsApp جانە Telegram-BOT-قا, Instagram جەلىسىندەگى @balaga.laiyq پاراقشاسىن بەلگىلەۋ ارقىلى جىبەرۋگە بولادى.
سونداي-اق وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ باستاماسىمەن «بالاعا لايىق» اكتسياسى ءوتىپ جاتقانىن ايتتى. اكتسيا «مەكتەپتىڭ جاقسارۋىنا كومەكتەس!» ۇرانىمەن وسى جىلدىڭ 20 جەلتوقسانىنا دەيىن جالعاسادى.
«اكتسياعا كەز كەلگەن وقۋشىلار, ەرىكتىلەر, بالالار وكىلدىگى, مۇعالىمدەر, اتا-انالار, ۇكىمەتتىك ەمەس ۇيىمداردىڭ وكىلدەرى جانە ت.ب. قاتىسا الادى. «بالاعا لايىق» اكتسياسىنىڭ ناتيجەسىندە مەكتەپتەگى جۋىناتىن بولمەلەر مەن اسحانالاردىڭ جاعدايى ايتارلىقتاي جاقسارعانىن ايتا كەتكەن ءجون. زاڭ بۇزۋشىلىقتار انىقتالعان 100-دەن استام مەكتەپتە جوندەۋ جۇمىستارى جۇرگىزىلىپ, كەمشىلىكتەر جويىلدى. مىسالى, پاۆلودار قالاسىنداعى №5 ورتا مەكتەپتىڭ اجەتحاناسىنداعى كابينالار اتا-انالاردىڭ مينيسترلىك وكىلدەرىنە بەرگەن وتىنىشىنەن كەيىن قالىپقا كەلتىرىلدى. سولتۇستىك قازاقستان وبلىسى ارىقبالىق اۋىلىنىڭ مەكتەبىندە سۋ قۇبىرلارى اۋىستىرىلىپ, جوندەۋ جۇمىستارى جۇرگىزىلدى. ورال يننوۆاتسيالىق ليتسەيى اسحاناسىنىڭ جۇمىسىنا قاتىستى تۇسكەن وتىنىشتەن كەيىن مەكتەپتە اسحاناعا دەزينفەكتسيا جۇرگىزىلىپ, وقۋشىلاردى تاماقتاندىرۋ ساپاسى جاقسارتىلدى. مەكتەپتەگى اجەتحانالار مەن اسحانالارعا مونيتورينگ جازالاۋ ءۇشىن ەمەس, بالالارعا قاجەتتى جاعداي جاساۋعا مەكتەپتەردى بىرلەسە تارتۋ ءۇشىن جۇرگىزىلىپ جاتقانىن اتاپ وتكىم كەلەدى», دەدى قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا.
اكتسيا كەزىندە مەكتەپتەردىڭ جۋىناتىن بولمەلەرى مەن اسحانالارىنىڭ جاعدايى تۋرالى بارلىعى 1 000-نان استام شاعىم تۇسكەن. ەڭ بەلسەندىلەر استانا مەن الماتى قالالارىنىڭ جانە الماتى, اقمولا جانە قىزىلوردا وبلىستارىنىڭ وقۋشىلارى مەن اتا-انالارى ەكەن.
وقۋ-اعارتۋ مينيسترلىگىنىڭ ايتۋىنشا, ءاربىر ءوتىنىشتى وبلىستىق ءبىلىم باسقارماسى قارايدى, ال ۇساق-تۇيەك كەمشىلىكتەردى مەكتەپتەردىڭ ءوزى انىقتاپ, جويۋى كەرەك.
