«وبلىستىق ءبىلىم بەرۋ, دەنساۋلىق ساقتاۋ سالاسىن دامىتىپ, جاستارعا قولداۋ كورسەتۋ كەرەك. قازىرگى زاماندا ءار ازاماتتىڭ جانە تۇتاس ەلدىڭ تابىستى بولۋىنا ءىلىم مەن ءبىلىم مول مۇمكىندىك بەرەدى. سوندىقتان, ءبىلىم ينفراقۇرىلىمىن دامىتۋ جانە ونىڭ ساپاسىن ارتتىرۋ ەلىمىز ءۇشىن باستى باسىمدىق بولىپ وتىر», دەدى پرەزيدەنت جەرگىلىكتى جۇرتشىلىقپەن كەزدەسۋىندە.
سول سەبەپتى مەملەكەت باسشىسى ەڭ الدىمەن, مەكتەپكە دەيىنگى تاربيە جانە وقىتۋ ءىسىنىڭ قولجەتىمدى بولۋىنا نازار اۋدارۋ قاجەت دەپ ەسەپتەيدى.
«ماڭعىستاۋ وبلىسىندا بالاباقشا ماسەلەسى تولىق شەشىمىن تاپپاعان. مۇندا 10 مىڭعا جۋىق بالاعا ورىن جەتىسپەيدى. بۇل ماسەلەنى شەشۋ ءۇشىن مەملەكەت پەن جەكەمەنشىكتىڭ سەرىكتەستىگىن تولىق پايدالانۋ كەرەك. بيىل وڭىردە 17 جەكەمەنشىك بالاباقشا اشىلدى. بۇل جۇمىستى جالعاستىرۋ قاجەت», دەدى قاسىم-جومارت توقاەۆ.
