«وتكەن اپتادا ەۋروپا كەڭەسىنىڭ پرەزيدەنتى شارل ميشەل ءبىزدىڭ ەلگە رەسمي ساپارمەن كەلگەنىن بىلەسىزدەر. سول كەزدە قازاقستان مەن «نەمىس-شۆەد» كومپانياسى اراسىندا ينۆەستيتسيا تۋرالى ءتيىستى كەلىسىمگە قول قويىلدى. ينۆەستور ماڭعىستاۋ وبلىسىندا «جاسىل» سۋتەگى ءوندىرىسىن ىسكە قوسۋدى جوسپارلاپ وتىر», دەدى مەملەكەت باسشىسى ماڭعىستاۋ وڭىرىنە جۇمىس ساپارى بارىسىندا.
پرەزيدەنتتىڭ ايتۋىنشا, وبلىستا كۇنىنە 255 مىڭ تەكشەمەتر سۋ تۇشىتاتىن زاۋىت, 40 گيگاۆاتت جاڭعىرتىلاتىن قۋات كوزدەرى ستانساسىن سالۋ جوسپارلانعان.
«وسى جوبا جۇزەگە اسىرىلسا, قۇرىلىس كەزىندە 3500, ال نىسان ىسكە قوسىلعان كەزدە 1800 تۇراقتى جۇمىس ورنىن اشۋعا مۇمكىندىك تۋادى. ءوز ماماندارىمىزدى وقىتىپ, دايارلايمىز. ءتيىستى ينفراقۇرىلىم سالىنادى. ينۆەستور وزىنە جۇكتەلگەن الەۋمەتتىك مىندەتتەمەلەرىن ورىندايدى. ايماقتىڭ دامۋىنا كەشەندى الەۋمەتتىك-ەكونوميكالىق اسەرىن تيگىزەتىن وسىنداي جوبالار كوپ بولۋى كەرەك. قازىر بۇكىل الەمدە ينۆەستيتسيا ءۇشىن باسەكە كۇشەيدى. ءبىزدىڭ ەلىمىز ءوز الەۋەتىن تولىق پايدالانىپ, ينۆەستيتسيالىق احۋالدى جاقسارتۋعا مىقتاپ كىرىسۋى كەرەك. تاعى دا قايتالاپ ايتامىن, ۇكىمەت پەن اكىمدەر بىرلەسىپ, بۇل ماسەلەگە باسا نازار اۋدارۋعا ءتيىس», دەپ تۇيىندەدى قاسىم-جومارت توقاەۆ.
