«اقتاۋعا كەلەردىڭ الدىندا جاناشىر ءارى اقىلشى اعامىز بولعان ءابىش كەكىلباەۆ ويىما ورالدى. ابەكەڭ ەكەۋىمىز ءبىراز جىل قىزمەتتەس بولىپ, بىرگە جۇردىك. اعا-ءىنى رەتىندە سىيلاسىپ, جاقىن ارالاستىق. ەلىمىزدىڭ وتكەنى, بۇگىنى جانە بولاشاعى تۋرالى ءجيى اڭگىمەلەسەتىن ەدىك. ادەبيەت تاقىرىبىندا پىكىر الماستىق. قازىر ء«ابىش الەمى» دەگەن ۇعىم حالقىمىزدىڭ ساناسىنا ابدەن ءسىڭىپ كەتتى. راسىندا, بىرەگەي تۇلعا, اسا كورنەكتى جازۋشى, تاريحشى, فيلوسوف ءابىش كەكىلباەۆتى ءبىز جانە وسكەلەڭ ۇرپاق ارقاشان جادىمىزدا ساقتاۋىمىز كەرەك. بۇل – ءبىزدىڭ ازاماتتىق, ۇلتتىق بورىشىمىز. ابىز اعامىز – بارشا قازاقتىڭ ماقتانىشى», دەدى قاسىم-جومارت توقاەۆ ماڭعىستاۋ وبلىسى جۇرتشىلىعىمەن كەزدەسۋىندە.
ونىڭ ايتۋىنشا, ءابىش كەكىلباەۆ تۋعان ولكەسى ماڭعىستاۋدى ەرەكشە جاقسى كورگەن.
«قاسيەتتى ورىندارى, قايتالانباس تابيعاتى جانە كەڭپەيىل حالقى تۋرالى سويلەگەندە شابىتتانىپ كەتەتىن. «ماڭعىستاۋدىڭ دارياسى – حالقىنىڭ كوكىرەگىندە» دەپ ءجيى ايتاتىن. وسى وڭىرگە كەلگەن سايىن سول سوزدەردىڭ اقيقات ەكەنىنە كوزىمىز جەتەتىنى انىق. مەن 2019 جىلى ءابىش اعانىڭ ەسكەرتكىشىنىڭ اشىلۋىنا ارنايى كەلەتىنىمدى ايتقان ەدىم. كەيىن سول ۋادەمدى ورىنداپ, اقتاۋدا قازاق حالقىنىڭ ۇلى پەرزەنتىنە ارنالعان ەسكەرتكىشتىڭ اشىلۋ راسىمىنە قاتىستىم. سول سەبەپتى, وزدەرىڭىزبەن كەزدەسۋدى ءابىش اعا تۋرالى ەستەلىكتەن باستاپ وتىرمىن», دەدى مەملەكەت باسشىسى.
