ارينە, وتىز جىلدا قوردالانعان, اسقىنعان ماسەلەلەردى ءۇش جىلدىڭ ىشىندە تۇبەگەيلى شەشىپ تاستاۋ وڭاي ەمەس. قاڭتار وقيعاسىنان بەرگى ءبىر جىلعا دا تولمايتىن قىسقا مەرزىم ىشىندە قانشاما قىرۋار جۇمىستار اتقارىلدى. سونىڭ ناتيجەسىندە ەسكى جۇيەنىڭ ۇيرەنشىكتى مىنەزىنەن مەسەلى قايتقان حالىق بۇگىنگى جاڭا جۇيەنىڭ كەشەندى رەفورمالارىنا سەنىممەن قاراپ, يگىلىگىن كورە باستادى.
ساياسي پروتسەستىڭ ادىلدىگىن, اشىقتىعىن قامتاماسىز ەتۋ ماقساتىندا ون ءۇش زاڭ قابىلداندى. سونىڭ نەگىزىندە ساياسي رەفورمانىڭ ءتورت توپتاماسى جۇزەگە اسىرىلدى. جوعارعى بيلىكتى مەنشىكتەپ الۋدى ادەتكە اينالدىرعان كەشەگى ەسكى بيلىكتىڭ ۇيرەنشىكتى ارەكەتىنە تويتارىس بەرىلدى, تامىرىن جايىپ العان ساياسي مونوپوليا تىزگىندەلدى.
مەملەكەتتەگى زاڭ قۇزىرەتىن كۇشەيتۋ, قوعامدى دەموكراتيالاندىرۋ ماقساتىنداعى بۇل رەفورمالار الداعى ۋاقىتتا كۇشەيە تۇسەدى دەگەن سەنىم مول. پرەزيدەنت قول قويعان التى زاڭ الداعى جەتى جىلدا ەل ەڭسەسىن, مەملەكەت مەرەيىن كوتەرۋگە زاڭدى تىرەك بولارى ءسوزسىز.
امانجول ءالتاي,
ءماجىلىس دەپۋتاتى
