الەمنىڭ جەتەكشى اگرارلىق دەرجاۆالارىنىڭ تاجىريبەسى اۋىل شارۋاشىلىعىن تابىستى دامىتۋ تەك عىلىم, ءبىلىم, ءوندىرىستىڭ ينتەگراتسياسى نەگىزىندە عانا مۇمكىن ەكەندىگىن دالەلدەدى.
«قازاقستاندا اگرارلىق عىلىم, بۇل سالادا مىقتى عالىمدار بار ەكەندىگىن ايتۋ كەرەك. وكىنىشكە قاراي, ولاردىڭ عىلىمي-زەرتتەۋ قىزمەتىنىڭ ساپالى ناتيجەلەرى اگرارلىق وندىرىسكە جەتپەيدى. ىسكە اسىرۋ جۇيەسى جۇمىس ىستەمەيدى. فەرمەرلەرگە جاڭا تەحنولوگيالار مەن تۇقىمدار تۋرالى ءبىلىم بەرۋ ورتالىقتارىن قۇرۋعا ەرەكشە نازار اۋدارا وتىرىپ, وسى باعىتتا تۇبەگەيلى وزگەرىستەر جاساۋ قاجەت. ناقتى جۇمىس ىستەيتىن عالىمدار لايىقتى جالاقى الۋى ءۇشىن اگرارلىق عىلىمدى قارجىلاندىرۋ جۇيەسىن وزگەرتۋ ماڭىزدى. عىلىمي زەرتتەۋلەردى قارجىلاندىراتىن اگروقۇرىلىمداردى ىنتالاندىرۋ ماسەلەلەرى بويىنشا زاڭناماداعى وزگەرىستەردى سوڭىنا دەيىن جەتكىزۋ قاجەت. عىلىمي-زەرتتەۋ ينستيتۋتتارىن قارجىلاندىرۋ كەشەندى جانە جۇيەلى بولعانى ابزال. عىلىمي مەكەمەلەر جۇمىسىن توقتاتۋعا رۇقسات بەرەتىن شەنەۋنىكتەر جاۋاپكەرشىلىككە تارتىلۋعا ءتيىس», دەدى جيگۋلي دايراباەۆ.
