جۇمىسشىلارمەن كەزدەسۋدە كانديدات ءوزىنىڭ سايلاۋالدى باعدارلاماسىنىڭ ماقسات-مۇددەلەرىنە توقتالدى. اتاپ ايتقاندا, وتباسىنىڭ قارجىلىق جاعدايىنا قاراماستان وقۋشىنىڭ نەمەسە ستۋدەنتتىڭ مارتەبەسىن كوتەرىپ, ءبىلىم بەرۋ ساپاسىن ارتتىرۋدىڭ ماڭىزدىلىعىن اتاپ ءوتتى.
«مەن اۋىلدان قالاعا دەيىنگى بارلىق دەڭگەيدە قولجەتىمدى جانە ساپالى ءبىلىم بەرۋدى قولدايمىن. بالالار تەك ەليتالىق مەكتەپتەر مەن ۋنيۆەرسيتەتتەردە عانا ەمەس, كەز كەلگەن ءبىلىم ورداسىندا ساپالى ءارى جان-جاقتى ءبىلىم الۋى كەرەك. بۇل باعىتتى بيزنەسكە اينالدىرۋعا بولمايدى. ويتكەنى ءبىلىم تۇلعا قالىپتاستىرادى. ال بيزنەستەن قانداي تۇلعالار شىعۋى مۇمكىن؟», دەدى م.قاجىكەن.
سونداي-اق جيىندا اۋىل شارۋاشىلىعىن, مەديتسينانى, كاسىپكەرلىكتى, الەۋمەتتىك سالانى دامىتۋ تاقىرىبىندا دا پىكىر الماسۋلار بولدى.
«وسكەمەن سەس اەس» جشس-نا بارعان مەيرام قاجىكەن ستانسا قىزمەتكەرلەرىنىڭ سۇراقتارىنا جاۋاپ بەردى. جۇمىسشىلار گەس سياقتى ءىرى نىسانداردى جەكە ينۆەستورلارعا بەرۋگە قالاي قارايتىنىن سۇرادى. «بۇل جايلى اڭگىمەنى ناقتى كەسىپ ايتۋ قيىن. مەن نىسانداردىڭ شەتەلدىك ينۆەستورلاردىڭ قولىندا بولعانىن قالامايتىنىمدى انىق ايتا الامىن. بىراق مەملەكەتتىڭ قولىندا بولۋ دا ەڭ جاقسى شەشىم ەمەس. ويتكەنى بۇل جەردە كوپ ماسەلە مەن كەدەرگىلەر, بيۋروكراتيا پايدا بولادى», دەپ بۇل سۇراققا قاتىستى ءوز ويىن اشىق ءبىلدىردى.
