شارا قازاقستان رەسپۋبليكاسىنىڭ قىرعىز ەلىندەگى ەلشىلىگىنىڭ جانە جامبىل وبلىسى اكىمدىگىنىڭ قولداۋى نەگىزىندە «وتانداستار قورىنىڭ» ۇيىمداستىرۋىمەن وتۋدە.
قازاق-قىرعىز ەلدەرى ەجەلدەن-اق تامىرى تەرەڭ تاتۋ كورشىلىك ورناتىپ, باياعىدان-اق بارىس-كەلىس پەن الىس-بەرىس اياسى اناعۇرلىم كەڭەيگەن مۇددەلەس مەملەكەتتەر ەكەنى بەسەنەدەن بەلگىلى.
قىرعىزستان - ءبىز ءۇشىن تامىرلاس, تاعدىرلاس جانە باۋىرلاس مەملەكەت. ەكى ەل اراسىندا ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالاداعى ىنتىماقتاستىق اياسى كەڭەيە تۇسۋدە. ەلدەرىمىز ايماقتىق جانە جاھاندىق ماسەلەلەردە ءوزارا ىقپالداستىق پەن ىنتىماقتاستىققا اسا ماڭىز بەرۋدە.
سونىڭ ارقاسىندا قازىر قازاق-قىرعىز قاتىناسى جاڭا دەڭگەيگە كوتەرىلدى دەۋگە تولىق نەگىز بار.
ەل تىنىشتىعى مەن تۇراقتىلىقتى, قىرعىزستاندى مەكەن ەتكەن حالىقتار اراسىنداعى دوستىق, ىنتىماقتاستىق قاتىناستاردى نىعايتا تۇسۋگە قىرعىزستانداعى قازاق قاۋىمداستىعى دا زور سەپتىگىن تيگىزىپ ءجۇر.
مەرەكەلى مەرەيتوي اياسىنداعى العاشقى ءىس-شارا قىرعىز رەسپۋبليكاسىنىڭ الىقۇل وسمونوۆ اتىنداعى ۇلتتىق كىتاپحاناسىندا «قازاقستان-قىرعىزستان: 30 جىلدىق دوستىق پەن ىنتىماقتاستىق» اتتى وتىرىسپەن باستالدى. «دوڭگەلەك ۇستەل» فورماتىندا وتكەن كەزدەسۋدىڭ باستى سەبەبى - ازاتتىقتىڭ اق تاڭىمەن قاتار كەلگەن «قىرعىزستان قازاقتارى قاۋىمداستىعىنىڭ» 30 جىلدىق مەرەيتويى بولعاندىقتان اۋقىمى كەڭ ءىس-شارا ەجەلدەن ەنشىسى ءبىر ەگىز حالىق - قىرعىز باۋىرلارمەن بىرلەسە ۇيىمداستىرىلدى.
دوڭگەلەك ۇستەل قىرعىزستان رەسپۋبليكاسى مادەنيەت, اقپارات, سپورت جانە جاستار ساياساتى ءمينيسترىنىڭ قۇتتىقتاۋىمەن باستالدى.
سونىمەن قاتار قازاقستان رەسپۋبليكاسىنىڭ قىرعىز رەسپۋبليكاسىنداعى ەلشىسى ءراپىل سەيتحان ۇلى - بيىل تاۋەلسىز ەل رەتىندە قازاقستان مەن قىرعىزستان اراسىنداعى ديپلوماتيالىق قارىم-قاتىناستىڭ 30 جىلدىق مەرەكەسى ۇلتىمىزدى ۇيىستىرعان قاۋىمداستىقتىڭ مەرەيتويىمەن تۇسپا-تۇس كەلىپ وتىرعانىنا توقتالدى.
قازاقستاندىق دەلەگاتسيانى باستاپ بارعان «وتانداستار قورىنىڭ» پرەزيدەنتى ابزال ساپاربەك ۇلى وسى مەرەيتويدىڭ جوعارى دەڭگەيدە اتاپ وتىلۋىنە ايرىقشا ىقىلاس بىلدىرگەن قىرعىزستان باسشىلىعىنا, قىرعىزستاننىڭ حالىقتار اسسامبلەياسىنا, قازاقتار قاۋىمداستىعىنا, قوعامدىق ۇيىمدارعا, جاناشىر اعايىندار مەن بەلسەندى قانداستارعا رياسىز ريزالىق ءبىلدىرىپ, اقجارما العىسىن ايتتى.
ابزال ساپاربەك ۇلى ءوز سوزىندە ءبىر-بىرىنە دەگەن وسىنداي ىستىق ىقىلاستى قاتىناستىڭ ىرگەسىن قالىپتاستىرعان مۇحتار اۋەزوۆ, شىڭعىس ايتماتوۆ, مۇحتار شاحانوۆ سىندى ەكى ۇلتتىڭ ۇلى تۇلعالارى ەكەنىن ماقتانىشپەن اتاپ ءوتتى.
ءوز كەزەگىندە جىلى لەبىز بىلدىرگەن قىرعىزستان حالقى اسسامبلەياسىنىڭ توراعاسى, اتاقتى اكادەميك ابدىعاني ەركەباي ۇلى ەركەباەۆ تا ەجەلدەن تاتۋ ەكى ەلدىڭ اراسىنداعى بەرىك دوستىقتىڭ تاريحي تامىرى تەرەڭ ەكەنىن تەبىرەنە جەتكىزدى. ءوزىنىڭ دە قازاق دوستارى كوپتىگىن ماقتان تۇتىپ, ولاردىڭ جاقسى قاسيەتتەرىن دارىپتەدى.
قازاقستاننىڭ ەڭبەك ەرى, حالىق جازۋشىسى, قازاقستان رەسپۋبليكاسىنىڭ قىرعىزستانداعى تۇڭعىش ەلشىسى, قىرعىز رەسپۋبليكاسىنىڭ حالىق اقىنى مۇحتار شاحانوۆتىڭ جان تەربەتەر جاقسى سوزدەرى ەلدى ەرىكسىز ەلجىرەتتى. «ادامزاتتىڭ ايتماتوۆى» اتانعان شىڭعىس دوسىم فانيدەن باقيعا وزعالى جانىم جابىرقاپ, جالعىز قالعانداي كۇي كەشىپ ءجۇرمىن» دەگەن ءبىر اۋىز ءسوزىنىڭ ءوزى توننىڭ ىشكى باۋىنداي, بىرگە تۋعان باۋىرداي ەكى ەلدىڭ ەگىزدەي ۇيلەسىمىنىڭ ۇلگىسى بولدى. جاسامپاز حالىقتاردىڭ جارقىن بولاشاعى جاستاردىڭ قولىندا ەكەنىن ايتقان اقيىق اقىن وسكەلەڭ ۇرپاققا ولەڭدەتە باتا بەردى.
تۇعىرلى تۇلعادان كەيىن ءسوز العان تاراپتار تاتۋ كورشىلىك ساياساتىن دامۋدىڭ جاڭا ساتىسىنا كوتەرۋ جونىندە كەلەلى ءسوز قوزعاپ, وي-پىكىرلەرىن ورتاعا سالدى. جايما شۋاقتى اڭگىمە اۋانىمەن اياقتالعان جيىن سوڭىندا الىس-جاقىن شەت ەلدەردەگى قالىڭ قازاقتىڭ قامىن ويلايتىن «وتانداستار قورىنىڭ» باسشىسى ابزال مىرزا كورشىلەس ەلدەگى قانداستار قاۋىمىنا اتاجۇرتتىڭ اتىنان ارنايى «قورجىن» توپتاماسىن تارتۋ ەتتى. ەستەن كەتپەس ەستەلىك رەتىندە قازاقتىڭ قاسيەتتى دومبىراسىنان باستاپ, ۇلتتىق كيىمدەر, باعالى كادەسىيلار ۇسىنىپ, ۇلتتىق قۇندىلىقتارىمىز تاعى ءبىر ۇلىقتالدى.
كەزدەسۋدە ارقا-جارقا كوڭىلمەن جاراسا قاۋىشىپ, قۋانا تاراسقان قانداستار مەن كوڭىلى تاتۋ كورشىمىز - قىرعىز اعايىندار كەشكىلىك شەكارالاس جامبىل وبلىسىنىڭ كەنەن ازىرباەۆ اتىنداعى فيلارمونياسى ونەرپازدارىنىڭ مەرەيتويعا ارنايى الا كەلگەن ءان-شاشۋىن تاماشالادى. تارازدىق ساحنا ساڭلاقتارى مەرەيتوي قوناقتارىنىڭ مەيىرىن قاندىرىپ, قانداستارىمىزدىڭ ابىرويىن اسىردى.
سونىمەن قاتار, كونتسەرتتىك باعدارلاما اياسىندا قىرعىز مادەنيەت, اقپارات, سپورت جانە جاستار ساياساتى ءمينيسترىنىڭ ورىنباسارى - سامات بەكتۇر ۇلى شاتمانوۆ, جوگوركۋ كەنەشتىڭ حالىقارالىق ىستەر, قورعانىس, قاۋىپسىزدىك جانە كوشى-قون كوميتەتىنىڭ توراعاسىنىڭ ورىنباسارى لۋروۆا لەيلا حيانوۆنا ءسوز سويلەپ رياسىز العىستارىن ءبىلدىردى.
بىشكەك قالاسىن قازاقتىڭ حالىق اندەرىمەن الديلەپ, قىرعىز اسپانىن كۇي كۇمبىرىمەن تەربەتكەن ونەر كەشى كوپشىلىكتىڭ جادىندا جاتتالىپ, كورەرمەن كوڭىلىندە كوپكە دەيىن ساقتالىپ قالارى انىق.
