بۇگىن سەرىكقالي برەكەشەۆ استانانىڭ ەكولوگيالىق جاعدايىن جاقسارتۋ جونىندەگى ءىس-شارالار مەن سۋ رەسۋرستارىنىڭ جاي-كۇيى جونىندە ايتتى.
جالپى ەكولوگيالىق جاعدايدى جاقسارتۋ ءۇشىن وڭىرلەر بولىنىسىندە ۇلتتىق جوبا جانە جول كارتالارى شەڭبەرىندە جۇيەلى جۇمىس جۇرگىزىلىپ جاتقانىن حابارلادى.
ەلوردانىڭ جەكە سەكتورىن گازداندىرۋ جالعاسۋدا. تابيعي گازعا 13 دەربەس قازاندىق قوسىلعان.
قالالىق كولىكتىڭ شىعارىندىلارىن ازايتۋ ماقساتىندا ەلوردا اكىمدىگى بيىل 100 بىرلىك ەلەكتر اۆتوبۋستارىن ساتىپ الىپ پايدالانۋعا بەردى, قالانىڭ كوممۋنالدىق كاسىپورىندارىنىڭ اۆتوكولىك قۇرالدارىنىڭ 75%-ى گاز وتىنىنا اۋىستىرىلدى, قالالىق تاكسي پاركىن گبق-عا اۋىستىرۋ بويىنشا جۇمىستار جۇرگىزىلگەن.
قالدىقتاردى باسقارۋ ماسەلەلەرى جونىندە ايتقاندا, رۇقسات ەتىلمەگەن پوليگوندار ماسەلەسى ءالى دە الاڭداتىپ وتىرعانىن حابارلادى. بيىل كوسمومونيتورينگتىڭ كومەگىمەن 551 پوليگون انىقتالىپ, ونىڭ 46%-ى عانا جويىلعان.
«پوليگونداردىڭ ۇلعايۋ سەبەبى جاڭا ەكوكودەكستىڭ تالاپتارىنا بايلانىستى, وعان سايكەس قوقىس شىعاراتىن ۇيىمداردىڭ ءتىزىلىمى جۇرگىزىلەدى جانە قۇرىلىس قوقىستارىن قالا شەگىنەن شىعارۋعا تىيىم سالىنادى. پوليگونداردى جويۋ ءۇشىن كەستە جاسالدى. الايدا پوليگوندار جويىلعان جوق. ەلوردالىق ەكولوگيا دەپارتامەنتىنە وسى باعىتتاعى جۇمىستى كۇشەيتۋدى تاپسىرامىن», دەدى ۆەدومستۆو باسشىسى.
بۇدان وزگە سۋ رەسۋرستارىنىڭ جاي-كۇيى مەن كارىز جۇيەسىندەگى پروبلەمالارعا توقتالدى.
سۋ رەسۋرستارىنىڭ لاستانۋىن بولدىرماۋ ماقساتىندا اكىمدىككە بارلىق ابونەنتتەردى ورتالىقتاندىرىلعان كارىزگە قوسۋ بويىنشا جۇمىستى ۇيىمداستىرۋ, نوسەر اعىندارىنىڭ كوللەكتورىنا رۇقساتسىز اعىزۋدى بولدىرماۋ بويىنشا باقىلاۋدى قامتاماسىز ەتۋ, زاڭسىز اعىزۋ كوزدەرىن انىقتاۋ ءۇشىن قالانىڭ جەراستى سۋ قۇبىرى جەلىلەرىنە تەكسەرۋ جۇرگىزۋ جانە ينجەنەرلىك سۋ قۇبىرى جەلىلەرىن جوندەۋ مەن ولاردى «استانا سۋ ارناسى» مكك تازارتۋ ستانتسيالارىنا قوسۋدى قامتاماسىز ەتۋ ۇسىنىلدى.
