جيىن بارىسىندا اكىمدىكتەر مەن «قازاۆتوجول» ۇلتتىق كومپانياسىنىڭ وكىلدەرى الداعى ۋاقىتتا بيتۋم تاپشىلىعى مەن جول-قۇرىلىسى جۇمىستارىنىڭ توقتاۋى تاعى دا قايتالانۋى مۇمكىن ەكەنىن جەتكىزدى. سەبەبى مەردىگەرلەردىڭ بيتۋمدى ساقتايتىن جەرى جوق بولعاندىقتان, الدىن الا ساتىپ الۋ مۇمكىن ەمەس. سوندىقتان ولار دايىن اسفالت ساتىپ الۋعا ءماجبۇر.
«جول قۇرىلىسى سالاسىنداعى مەردىگەرلەر مەزگىلدىڭ جىلى كەزىندە بيتۋمدى جاپپاي ساتىپ الادى. ال قالعان كەزەڭدە بيتۋم وندىرۋشىلەر ونىمگە دەگەن تومەن سۇرانىستىڭ اسەرىنەن شىعىنعا تاپ بولادى. الايدا ولار مۇنى ءونىم سۇرانىسقا يە ماۋسىمدا ونىڭ باعاسىن ءوسىرىپ وتەيدى. «قازاۆتوجول» كومپانياسى مەن اكىمدىكتەر ەنەرگەتيكا مينيسترلىگىمەن بىرلەسىپ اي سايىن بيتۋمدى بولەدى. بىراق نەگىزگى سۇرانىس جاز مەزگىلىنە تيەسىلى», دەپ اتاپ ءوتتى جيىن قاتىسۋشىلارى.
باسقوسۋ بارىسىندا ماسەلەنى وڭتايلى شەشۋ جولىن قازاقستان جولشىلار قاۋىمداستىعىنىڭ پرەزيدەنتى باعلان بايماعامبەتوۆ ۇسىندى.
– شۇڭقىرلار – بيتۋمدى ساقتايتىن ەڭ قولجەتىمدى ورىن. بىراق بۇل شۇڭقىرلاردا بيتۋم قاتىپ قالادى, ونى ۇنەمى جىلىتىپ وتىرۋ قاجەت. ال بۇدان ونىڭ ساپاسى تومەندەيدى. دەمەك, جولداردىڭ ساپاسىنا دا تىكەلەي اسەر ەتەدى. شيكىزاتتى انگار قويمالارىندا ساقتاۋعا دا بولادى. ويتكەنى ءاربىر مەردىگەردىڭ وسىنداي قويماسى بار. سودان كەيىن قىستا دا, جازدا دا بيتۋم ساتىپ الۋعا بولادى, – دەيدى ب.بايماعامبەتوۆ.
ءوز كەزەگىندە ەنەرگەتيكا مينيسترلىگى مۇنايدى تاسىمالداۋ جانە وڭدەۋ دەپارتامەنتى ديرەكتورىنىڭ ورىنباسارى سامات مەرگەنوۆ ۆەدومستۆولىق بيرجالاردا ساتىلاتىن بيتۋمنىڭ ۇلەسىن ارتتىرۋدى ۇسىندى. ونىڭ ايتۋىنشا, بۇل تاراپتاعى كورسەتكىش 2021 جىلدان بەرى وزگەرمەگەن.
ايتا كەتەيىك, مەملەكەت باسشىسى قاسىم-جومارت توقاەۆ بيىلعى جولداۋدا ەلىمىزدە ءالى كۇنگە دەيىن بيتۋم تاپشىلىعىنا نازار اۋدارىپ, ءىرى كولەمدە مۇناي وندىرەتىن ەل ءۇشىن بۇل ۇيات جاعداي ەكەنىن ايتقان بولاتىن. وسىعان وراي پرەزيدەنت ۇكىمەتكە اتالعان ماسەلەنى تىكەلەي باقىلاۋعا الۋدى تاپسىردى.
بيىل قازاقستاندا 726 مىڭ توننا بيتۋم ءوندىرۋ جوسپارلانعان. سوڭعى سەگىز ايدىڭ قورىتىندىسى بويىنشا شامامەن 600 مىڭ توننا ءونىم وندىرىلگەن.
