بۇل – ارينە, ەلىمىز, حالقىمىز ەلەڭدەپ توسىپ وتىرعان زاڭ. كەشەگى قاڭتار وقيعاسى ەل تاريحىنداعى اسا اۋىر, جۇرەگىمىزگە ۇلكەن جۇك سالعان, كوڭىلىمىزگە وي سالعان وقيعا بولعانى بەلگىلى.
قۇجاتتىڭ ماڭىزى مىنادا. زاڭ جوباسى مىڭداعان ادامنىڭ تاعدىرىنا اسەر ەتەدى. وسى قۇجات بويىنشا 1 500 ادامعا راقىمشىلىق جاريالانادى. اسا اۋىر جانە اۋىر كىناسى بارلاردىڭ جازاسى جەڭىلدەتىلەدى. اۋىر كىناسى بار ادامدارعا جازاسىنىڭ تورتتەن ءۇش بولىگى, اسا اۋىر كىناسى بار ادامداردىڭ جازاسىنىڭ جارتىسى قىسقارادى. بۇل راقىمشىلىق قاڭتار وقيعاسىن ۇيىمداستىرعاندارعا, تەرروريستەرگە, رەتسيديۆيستەرگە, سونداي-اق قاڭتار وقيعاسىنا قاتىسقانداردى ازاپتاعاندارعا قولدانىلمايدى.
ارينە, بۇل – ەل تاعدىرى. جاستاردىڭ تاعدىرى. مەملەكەتتىڭ بولاشاعى – جاستار. پرەزيدەنتتىڭ جاپپاي تارتىپسىزدىككە ەرىپ كەتكەن جاستارىمىزعا راقىمشىلىق جاساۋ جونىندەگى زاڭعا جەدەلدەتىپ قول قويۋى حالىقتىڭ كوڭىلىنە قۋانىش ۇيالاتادى. الداعى ۋاقىتتا مەملەكەتىمىزدىڭ بولاشاعى نىق, سەنىمدى, ايقىن بولۋى ءۇشىن جاستارىمىزدى مەملەكەتشىلدىككە, وتانسۇيگىشتىككە, مەملەكەتتىڭ ءاربىر قۇندىلىعىنا ۇلكەن سۇيىسپەنشىلىك كوزقاراسپەن قاراۋعا تاربيەلەۋىمىز كەرەك.
امانجول ءالتاي,
ءماجىلىس دەپۋتاتى
