مەملەكەت باسشىسى بيىلعى قىركۇيەك ايىنداعى جولداۋىندا: «مەملەكەت قاڭتار وقيعاسىنا قاتىسقان, بىراق اۋىر قىلمىس جاساماعان ازاماتتاردىڭ جازاسىن جەڭىلدەتتى. زاڭ بۇزعانداردىڭ بىرقاتارى كىناسىن ءتۇسىنىپ, وتكەن ىسكە وكىنىپ وتىر. ولارعا كەشىرىممەن قاراعان دۇرىس دەپ ويلايمىن. سوندىقتان, مەن قاڭتار وقيعاسىنا قاتىسۋشىلارعا ءبىر رەتتىك راقىمشىلىق جاريالاۋ تۋرالى شەشىم قابىلدادىم», دەپ اتاپ ءوتتى.
پرەزيدەنتتىڭ تاپسىرماسى بويىنشا پارلامەنت دەپۋتاتتارى تاراپىنان ازىرلەنگەن زاڭ سول ءبىر قاتەرلى وتكەلدە قاتەلىككە بوي الدىرىپ, قىلمىستىق تەرىس قىلىقتار, ونشا اۋىر ەمەس نەمەسە اۋىرلىعى ورتاشا قىلمىس جاساعاندارعا قاتىستى ناعىز ادامگەرشىلىك كورسەتۋدى كوزدەيدى.
راقىمشىلىق ءوز قاتەسىن مويىنداعان جانە قىلمىسى ءۇشىن كەشىرىم سۇراعان ادامدارعا عانا جاسالادى, سەبەبى قىلمىس اقتالمايدى, قىلمىسقا اڭداماي, قاتەلىكپەن جول بەرگەندەرگە راقىمشىلىق جاسالادى. تاعى ءبىر ەسكەرەتىن جايت, بۇل جولعى راقىمشىلىق ءبىر رەتتىك سيپاتقا يە. زاڭدا راقىمشىلىق جاساۋعا جاتاتىن باپتار ناقتى كەلتىرىلگەن.
راقىمشىلىق ۋاقىت بويىنشا دا, قولدانىلاتىن ادامدار ءۇشىن دە شەكتەۋلى. اتاپ ايتقاندا, راقىمشىلىق تەك 2022 جىلعى قاڭتار وقيعاسى كەزىندە جاسالعان قىلمىستىق ارەكەتتەرگە عانا قاتىستى قولدانىلادى.
امانگەلدى تولاميسوۆ,
سەنات دەپۋتاتى
