ءىس-شارانى قازاقستان رەسپۋبليكاسى اقپارات جانە قوعامدىق دامۋ مينيسترلىگى قولداۋىمەن قازاقستاندىق قوعامدىق دامۋ ينستيتۋتى ۇيىمداستىردى.
بايقاۋدىڭ ماقساتى - بالالار مەن جاسوسپىرىمدەردىڭ كىتاپ وقۋعا دەگەن قىزىعۋشىلىعىن ارتتىرۋ, قازاق جانە شەتەل ادەبيەتىن, اقىن-جازۋشىلاردىڭ شىعارمالارىن تەرەڭ زەرتتەۋگە تارتۋ, وسكەلەڭ ۇرپاقتىڭ بويىندا پاتريوتتىق سەزىمدى قالىپتاستىرۋ.
بايقاۋعا ەلىمىزدىڭ جالپى ءبىلىم بەرەتىن مەكتەپتەرىنىڭ 3-10 سىنىپ وقۋشىلارىنان 97 مىڭنان استام بالا قاتىستى. ولار اۋداندىق, قالالىق, وبلىستىق ىرىكتەۋلەردەن ءوتتى. بايقاۋعا قاتىسۋشىلار 4 سانات بويىنشا باق سىنادى:
«ەرتەگىلەر الەمىندە» تاقىرىبىندا باستاۋىش 3-4 سىنىپ وقۋشىلارىنا ارنالعان كىتاپتار («قازاق ەرتەگىلەرى» جانە «الپامىس باتىر»);
«كەل, بالالار, وقىلىق!» تاقىرىبى 5-6 ورتا سىنىپتاعى وقۋشىلارعا ارنالعان كىتاپتار («مەن – اپامنىڭ بالاسىمىن» جانە «اعايىندى گريممدەر ەرتەگىلەرى» اتتى);
«عاسىرلار تاريحتى جىرلايدى» تاقىرىبى 7-8 سىنىپتاعى ءجاسوسپىرىم بالالارعا ارنالعان كىتاپتار («ۇشقان ۇيا» جانە «گۋلليۆەردىڭ ساياحاتى»);
« ۇلى دالا ەپوستارى» جانە « ۇلى دالانىڭ داڭقى» تاقىرىبى 9-10 جوعارى سىنىپ وقۋشىلارىنا ارنالعان كىتاپتار ء(ى. ەسەنبەرلين «كوشپەندىلەر.الماس قىلىش» جانە دانيەل دەفو «روبينزون كرۋزو»).
وبلىستىق تۋرلاردىڭ 80 جەڭىمپازى 2022 جىلدىڭ 2 قاراشاسىندا بايقاۋدىڭ اقتىق سايىسىنا قاتىستى.
بايقاۋ قورىتىندىسى بويىنشا جەڭىمپازداردى سالتاناتتى ماراپاتتاۋ راسىمىنە اقپارات جانە قوعامدىق دامۋ ۆيتسە-ءمينيسترى, پارلامەنت دەپۋتاتتارى, قازاقستانداعى يۋنيسەف وكىلدەرى, قوعام قايراتكەرلەرى, اقىن-جازۋشىلار مەن جۋرناليستەر قاتىستى.
ءىس-شاراعا قاتىسۋشىلاردى قۇتتىقتاپ اقپارات جانە قوعامدىق دامۋ ۆيتسە-ءمينيسترى دانيار قادىروۆ ءسوز سويلەدى. ول ءوز سوزىندە: «رەسپۋبليكالىق بالالار وقۋىنا ەلىمىزدىڭ تۇپكىر-تۇكپىرىنەن سۇرىنبەي وتكەن جۇزدەن جۇيرىك قاتىسۋشىلارىمىزدى بايقاۋدىڭ مەجەسىنە جەتۋىمەن شىن جۇرەكتەن قۇتتىقتايمىن. ورايى كەلىپ تۇرعاندا بارشاڭىزدى تۇعىرىنا قايتا قونعان ۇلتتىق مەرەكەمىز رەسپۋبليكا كۇنىمەن دە قۇتتىقتايمىن», دەپ ىستىق ءىلتيپاتىن ءبىلدىردى.
«بۇل بايقاۋ كىتاپ وقۋ مادەنيەتىمەن قاتار مەملەكەتتىك ءتىلدىڭ جاس بۋىن ورتاسىندا كەڭ تارالۋىنا ۇلەس قوسادى. اتالمىش ايگىلى تۋىندىلار ادامنىڭ ءومىر جولىندا ولشەۋسىز ازىق بولىپ, پاراساتتى, كەمەل جاستاردى قالىپتاستىرۋعا ىقپال ەتىپ كەلەدى. وسىنداي ازاماتتارمەن بىرگە ءبىز جاڭا قازاقستاندى جانە قوعامداعى ىزگى قۇندىلىقتاردى قالىپتاستىرامىز», دەدى ۆيتسە-مينيستر.
اقپارات جانە قوعامدىق دامۋ ۆيتسە-ءمينيسترى دانيار قادىروۆ, قر پارلامەنتى ءماجىلىسىنىڭ دەپۋتاتتارى ساۋىتبەك ابدراحمانوۆ مەن امانجول ءالتاي, قازاقستانداعى يۋنيسەف باسشىسىنىڭ كەڭەسشىسى باعداد قۇلنازاروۆ, قر جازۋشىلار وداعىنىڭ مۇشەلەرى, اقىن-جازۋشىلار سەرىك نەگيموۆ, شارحان قازىعۇل, ديحان قامزابەك ۇلى, قۋانىش جيەنباي جانە روزا مۇقانوۆا ءتيىستى نوميناتسيالار بويىنشا جەڭىمپازدار مەن جۇلدەگەرلەردى باعالى سىيلىقتارمەن ماراپاتتادى.
سالتاناتتى ءراسىم بارىسىندا ەڭ بەلسەندى قاتىسۋشىلارعا العىس حاتتارى مەن Marwin سەرتيفيكاتتارى تابىستالدى.
