وتىرىس بارىسىندا ماڭعىستاۋ وبلىسى اكىمىنىڭ ءبىرىنشى ورىنباسارى ب.ورىنباساروۆ وڭىردەگى ونەركاسىپ سالالارىنىڭ اعىمداعى جاعدايى, كاسىپكەرلەرگە جاسالىپ جاتقان قولداۋ شارالارى, ەكونوميكالىق ايماقتىڭ قىزمەتىندەگى اعىمداعى ماسەلەلەر مەن الداعى جوسپارلارى تۋرالى بايانداما جاسادى. سونداي-اق جەرگىلىكتى ۋاكىلەتتى ورگانداردىڭ, ەكونوميكالىق ايماق باسشىلىعىنىڭ اقپاراتى مەن ەسەپتەرى, ەكونوميكالىق ايماقتاردىڭ قىزمەتىن رەتتەيتىن ورتالىق ۋاكىلەتتى ورگاننىڭ زاڭنامالارعا ەنگىزەتىن وزگەرىستەر مەن تولىقتىرۋلار تۋرالى اقپاراتى تىڭدالدى.
سەناتتىڭ قارجى جانە بيۋدجەت كوميتەتىنىڭ دەپۋتاتتارى ارنايى ەكونوميكالىق ايماقتاردىڭ قىزمەتىن جەتىلدىرۋ تەتىكتەرىن زەردەلەۋ ماقساتىندا اەا-نىڭ بىرقاتار نىساندارىن ارالادى.
سەناتورلار ەلىمىزدەگى قولايلى ينۆەستيتسيالىق احۋالدى دامىتۋعا جانە ەكسپورتقا باعدارلانعان جوبالاردى ىسكە اسىرۋ ءۇشىن وتاندىق جانە شەتەلدىك ينۆەستيتسيا تارتۋعا باعىتتالعان «اقتاۋ تەڭىز پورتى» اەا-دا بولدى. دەپۋتاتتار ەكونوميكالىق ايماقتىڭ جالپى اۋماعى 9 سۋبايماقتان تۇراتىنى جانە اۋدانى 2 140 گەكتاردى قۇرايتىنى تۋرالى حاباردار بولدى.
پارلامەنتشىلەر سونىمەن قاتار جول بيتۋمىن ءوندىرۋ كاسىپورنىنىڭ جۇمىسىمەن تانىستى جانە «قۇرىق» پورتى مەن «اقتاۋ تەڭىز ساۋدا» پورتىندا بولدى.
ء«بىزدىڭ ايماققا كەلۋىمىزدىڭ ماقساتى – ارنايى ەكونوميكالىق ايماق قىزمەتىمەن تانىسۋ, قۇرىلىستىڭ اياقتالماۋى جانە ينفراقۇرىلىمدى جۇرگىزۋ, وڭدەۋ ونەركاسىبىنە جەكە ينۆەستيتسيالاردى تارتۋ دەڭگەيى بويىنشا ماسەلەلەردى تالقىلاۋ, سونداي-اق ارنايى ەكونوميكالىق ايماقتاردا قولدانىستاعى جانە ىسكە اسىرىلىپ جاتقان جوبالاردى قاراستىرۋ», دەدى كوميتەت توراعاسى س.ترۇموۆ.
«اقتاۋ تەڭىز پورتى» ارنايى ەكونوميكالىق ايماعىندا قازىرگى تاڭدا 47 كومپانيا تىركەلگەن, 1 700-دەن استام جاڭا جۇمىس ورنىن قۇرۋمەن جالپى كولەمى 266,1 ملرد تەڭگە قۇرايتىن ينۆەستيتسيالار, ونىڭ ىشىندە 168,7 شەتەلدىك ينۆەستيتسيالار سالىندى, 406,7 ملرد تەڭگەگە ءونىم ءوندىرىلىپ, 54,2 ملرد تەڭگە سالىق تولەندى. اتالعان كورسەتكىشتەر بويىنشا «اقتاۋ تەڭىز پورتى» ارنايى ەكونوميكالىق ايماعى ەلىمىزدەگى ەكونوميكالىق ايماقتار كوشباسشىلارىنىڭ قاتارىنا كىرىپ وتىر.
قازىرگى ۋاقىتتا ەكسپورتتىڭ نەگىزگى ارنالارى ازەربايجان, رەسەي, وزبەكستان, ۋكراينا, گەرمانيا, فرانتسيا ەلدەرى بولسا, ايماقتاعى شەتەلدىك ينۆەستورلار قىتاي, ۇلىبريتانيا, ازەربايجان, سينگاپۋر, تۇركيا, گەرمانيا مەملەكەتتەرى سانالادى.
نەگىزگى باعىتتارى وڭدەۋ ونەركاسىبى, ياعني ماتەريالدار ءوندىرىسى, مۇناي-حيميا, قۇرىلىس ونەركاسىبى ءۇشىن ماتەريالدار, ماشينالار مەن جابدىقتار ءوندىرۋ, قويما جانە لوگيستيكا, ءتۋريزمدى دامىتۋ بولىپ تابىلاتىن ەكونوميكالىق ايماقتا 25 وندىرىستىك قىزمەتكە باسىمدىق بەرىلگەن.
ەكونوميكالىق ايماقتا جوبالاردى ىسكە اسىرۋ ءۇشىن بارلىق جاعداي جاسالعان, قاجەتتى ينفراقۇرىلىم جۇرگىزىلگەن, سالىقتىق جانە كەدەندىك پرەفەرەنتسيالار ۇسىنىلادى. سونىمەن قاتار جوبالاردى قولداۋ جانە ولاردىڭ مونيتورينگى جۇزەگە اسىرىلادى, ينۆەستورلارعا جەرگىلىكتى اتقارۋشى جانە ۋاكىلەتتى ورگاندارمەن, مامانداندىرىلعان ۇيىمدارمەن ءوزارا ءىس-قيمىل جاساۋدا جاردەم كورسەتىلەدى.
الداعى ۋاقىتتا ءوڭىردىڭ كولىك-لوگيستيكالىق الەۋەتىن ارتتىرۋ بويىنشا ءىس-شارالاردى ىسكە اسىرۋ جوسپارلانعان. وسى ماقساتتا اقتاۋ تەڭىز ساۋدا پورتىنىڭ اەا قاتىسۋشىلارى رەتىندە تىركەي وتىرا, «باۋتينو» جۇك اۋدانى مەن قۇرىق پورتىنىڭ اۋماعىن اەا قۇرامىنا قوسۋ تۋرالى ماسەلەسى ءتيىستى مەملەكەتتىك ورگانداردىڭ قارالۋىنا جىبەرىلگەن. وسى ءىس-شارالار اياسىندا مەملەكەت باسشىسى ق.توقاەۆتىڭ وڭىردە كونتەينەرلىك حاب قۇرۋ جونىندەگى تاپسىرماسىن ىسكە اسىرۋ اەا اۋماعىندا دا جوسپارلانىپ وتىر, ەكونوميكالىق ايماقتا اۋدانى 19 گا جەر ۋچاسكەسى رەزەرۆكە قويىلعان.
وتىرىس قورىتىندىسى بويىنشا پارلامەنت سەناتىنىڭ دەپۋتاتتارى ەكونوميكالىق ايماقتاردىڭ دامۋىنا باعىتتالعان پىكىرلەرىن ءبىلدىرىپ, ەكونوميكالىق ايماقتاردىڭ ەلىمىزدىڭ الەۋمەتتىك-ەكونوميكالىق دامۋىنداعى ورنىن ەرەكشە اتاپ ءوتتى. ەكونوميكالىق ايماقتىڭ وڭىردە جۇمىس ىستەۋى ەلەۋلى الەۋمەتتىك-ەكونوميكالىق تيىمدىلىك اكەلەدى جانە وڭىرگە ينۆەستيتسيالار تارتۋ ءۇشىن قولايلى الاڭ بولىپ تابىلاتىندىقتان, ولار «اقتاۋ تەڭىز پورتى» ارنايى ەكونوميكالىق ايماعىن دامىتۋعا قاجەتتى ءىس-شارالاردى انىقتاپ, بۇل باعىتتاعى جۇمىستاردى كۇشەيتۋ قاجەتتىگىن اتاپ ءوتتى.
دەپۋتاتتار كوميتەت مۇشەلەرىنىڭ وڭىرلەرگە ساپارىنىڭ قورىتىندىسى بويىنشا «ارنايى ەكونوميكالىق ايماقتاردىڭ ناقتى جاي-كۇيى جانە جۇمىس ىستەۋىنىڭ الداعى پەرسپەكتيۆالارى» تاقىرىبىندا كەڭەيتىلگەن دوڭگەلەك ۇستەل وتكىزىلەتىنىن ايتتى. وندا وسى ساپاردا كوتەرىلگەن بارلىق ماسەلە تالقىعا سالىنادى.
ماڭعىستاۋ وبلىسى
