كوركەمدىك كەڭەس شەشىمىمەن ارمات بەكتاستىڭ جۇمىسى كوپ ىشىنەن دارا شاۋىپ, سۋرەتشى Umai ۇلتتىق سىيلىعى مۇسىنشەسىنىڭ اۆتورى اتاندى.
– مەنىڭ شىعارماشىلىق قىزمەتىم نەگىزىنەن رامىزدەرمەن جانە بەلگىلەرمەن بايلانىستى بولعاندىقتان, ونەردى ءپىشىن جاعىنان ۇلتتىق جانە ماعىناسى جاعىنان جالپى ادامزاتتىق ەتۋگە تىرىسامىن. سوندىقتان دا مەن ءۇشىن وسى جوباعا قاتىسۋ وتە قىزىقتى بولدى, – دەپ اتاپ ءوتتى شەبەر.
اۆتوردىڭ ءوزى اتاپ وتكەندەي, مۇسىنشە بۇل جاي عانا كادەسىي ەمەس. سول سەبەپتى وندا ۇلتتىق ءپىشىندى جوعارى ونەرمەن بىرىكتىرۋ قاجەت بولدى. Umai-دىڭ پىشىنىنەن ءبىر ۋاقىتتا ايەل بەينەسىن, ءداستۇرلى قولدانبالى ونەر ەلەمەنتتەرىنە, كيىز ءۇيدىڭ سۋرەتىنە ۇقساس دۇنيەلەردى بايقاۋعا بولادى. تاستارمەن بەدەرلەنگەن جاسىل پلاستينادان جاسالعان ىرگەتاستا لاتىن قارپىندە جانە كونە تۇركى تىلىندە سىيلىقتىڭ اتاۋى جازىلعان.
ەسكە سالا كەتەيىك, ونەر سالاسىنداعى «Umai» سىيلىعى «تەاتر ونەرى», «حورەوگرافيالىق ونەر», «مۋزىكالىق-ورىنداۋشىلىق ونەر», «بەينەلەۋ جانە ساندىك-قولدانبالى ونەر» سەكىلدى اتالىمداردا بيىل العاش رەت تاعايىندالىپ وتىر. شىعارماشىلىق ۇجىمدارعا, جەكە ورىنداۋشىلارعا, قازاقستاننىڭ ونەر قايراتكەرلەرىنە ەلەۋلى شىعارماشىلىق تابىستارى مەن ۇزدىك كاسىبي جەتىستىكتەرى ءۇشىن بەرىلەدى. بايقاۋعا وتىنىمدەردى قابىلداۋ 9 جەلتوقسانعا دەيىن جالعاسادى, ال جەڭىمپازداردى سالتاناتتى ماراپاتتاۋ ءراسىمى «استانا وپەرا» تەاترىنىڭ ۇلكەن زالىندا 2022 جىلدىڭ 23 جەلتوقسانىندا وتەدى دەپ جوسپارلانۋدا.
