سىر ءوڭىرىنىڭ قۇبىر زاۋىتى ءوز ونىمدەرىن ەكسپورتقا شىعارۋعا قۇلشىنىپ وتىر

استانا. 27 مامىر. وسىدان 3 جىل بۇرىن «ۇدەمەلى يندۋستريالدى-يننوۆاتسيالىق دامۋ» جوباسى اياسىندا ىسكە قوسىلعان قىزىلوردا وبلىسىنداعى قۇبىر زاۋىتى ونىمدەرىن ەكسپورتتاۋعا ساقاداي-ساي. بۇل تۋرالى «24kz» حابارلادى. بۇگىندە ىشكى سۇرانىستى تولىقتاي قاناعاتتاندىرىپ وتىرعان كاسىپورىننىڭ الەۋەتى سىرتقى نارىقتى دا قامتاماسىز ەتۋگە جەتەدى. بۇ كاسىپورىننىڭ نەگىزگى شيكىزاتى – پوليەتيلەن. زاۋىت قۇبىرلارىنىڭ ءبىر بولىگى كوممۋنالدىق سالا, گاز جۇيەلەرىنە قولدانىلۋدا. سونداي-اق, مۇندا پوليۆەنيلحلوريد قۇبىرلارى دا شىعارىلادى. زاۋىت ينجەنەرى نۇربەك نۇرمۇحامەدوۆ: «بارلىق جۇمىس كومپيۋتەرمەن باسقارىلادى. ينجەنەر-تەحنولوگتار تاپسىرىستىڭ بارلىعىن ناقتى بەلگىلەپ وتىرادى. زاۋىتتىڭ جىلدىق ءونىمى 16 مىڭ توننا شاماسىندا. بۇل ءوندىرىستىڭ 70 پايىزدىق قۋاتتىلىعىنا پارا-پار. جوبا ىسكە اسقان 3 جىلدىڭ ىشىندە ەل سۇرانىسىن وتەپ كەلەدى. سوڭعى ۋاقىتتا كەدەندىك كەدەرگىلەردىڭ جەڭىلدەپ, الىس-بەرىستىڭ ارتا تۇسكەن شاعىندا كاسىپورىن ءوز ونىمدەرىن ەكسپورتقا باعىتتاۋعا نيەتتى», – دەدى. ال, زاۋىت ديرەكتورىنىڭ ورىنباسارى ارمان ابدىقادىروۆتىڭ ايتۋىنشا, بۇل كاسىپورىن قازاقستان, رەسەي, بەلارۋس مەملەكەتتەرى قاتىسىپ وتىرعان بىرىڭعاي ەكونوميكالىق كەڭىستىك نارىعىنان تاپسىرىس كۇتىپ وتىر. زاۋىت بەرىلگەن تاپسىرىستى  100 پايىزعا ورىنداپ شىعۋعا قاۋقارلى. كاسىپورىن ءونىمىنىڭ ساپاسى زامان تالابىنا ساي. جولدىباي بازار. دەرەككوز: «24kz». فوتو: today.kz.