حالىقارالىق پاندىك وليمپيادالاردىڭ جەڭىمپاز 27 وقۋشىسى 73 ملن تەڭگەدەن استام قاراجات الدى. وقۋشىلاردى ءبىلىم نارىمەن باپتاعان ۇستاز-تالىمگەرلەرى دە بىرجولعى اقشالاي تولەمگە يە بولادى. بۇل تۋرالى وقۋ-اعارتۋ مينيسترلىگى تelegram ارناسىندا حابارلادى. وزات وقۋشىلار بىلىمدەرىنىڭ ارقاسىندا تاپقان سىياقىلارىن قالاي جۇمسايتىندىقتارىن دا جاسىرماعان.
«بيىل وسىنداي بەدەلدى وليمپياداعا العاش رەت قاتىستىم. وعان كوپ دايىندالدىم. ارينە, وقۋ-اعارتۋ مينيسترلىگىنىڭ ەل ىشىندە وتكىزگەن وليمپيادالارى ارقىلى ەلىمىزدى الەمدىك ارەنادا لايىقتى كورسەتۋگە مۇمكىندىك الدىم. ەلىمىزدى ابىرويمەن تانىتا العانىما قۋانىشتىمىن. گەوگرافيادان قاتىسقان وليمپيادادا جەڭىسكە جەتكەنىم ءۇشىن العان اقشامنىڭ ءبىر بولىگىن دەپوزيتكە سالۋدى جوسپارلاپ وتىرمىن. قالعانىن اتا-اناما بەرەمىن. مۇنداي اقشالاي ماراپاتتار بىزگە ۇلكەن ىنتا-جىگەر, موتيۆاتسيا بەرەدى, كەلەسى جىلى باسەكە بۇدان دا جوعارى بولاتىنىنا سەنىمدىمىن. الداعى جىلى وسى وليمپياداعا تاعى دا قاتىسقىم كەلەدى», دەيدى گەوگرافيادان حالىقارالىق وليمپيادانىڭ (IGeO) التىن جۇلدەگەرى سانجار حاميتوۆ.
جەڭىس تۇعىرىنان كورىنگەن قالعان وقۋشىلار دا العان جۇلدەلەرىن دەپوزيتكە سالىپ, وزدەرىنە قاجەتتى سىيلىقتار ساتىپ الاتىنىن ايتادى, قالعان تابىستارىن اتا-انالارىنا بەرمەك. مەملەكەت باسشىسىنىڭ تاپسىرماسىن ورىنداۋ اياسىندا وقۋ-اعارتۋ مينيسترلىگى حالىقارالىق پاندىك وليمپيادالاردىڭ جەڭىمپازدارىنا 1,5 ملن-نان 4,5 ملن تەڭگەگە دەيىن سىياقى تاعايىنداعان. بۇعان دەيىن وقۋ-اعارتۋ ءمينيسترى اسحات ايماعامبەتوۆ ايتقانداي, بيىل تىزىمگە 7 وليمپيادا كىرسە, كەلەسى جىلى ول تاعى 7 وليمپيادامەن تولىعادى.
وسىلايشا, 2022 جىلى ۇلتتىق قۇراما ەل قورجىنىن 3 التىن, 15 كۇمىس جانە 9 قولا مەدالمەن تولىقتىرىپ وتىر.
