جيىن بارىسىندا اۋە بيلەتتەرى باعاسىن بەلگىلەۋ ماسەلەسى نەگىزگى اڭگىمە وزەگىنە اينالدى. بۇگىندە جول ءجۇرۋ قۇجاتىنىڭ قۇنى حالىق اراسىندا ەڭ ءجيى تالقىلاناتىن ءارى ۇلكەن ماڭىزعا يە ماسەلەنىڭ ءبىرى ەكەنى داۋسىز.
ازاماتتىق اۆياتسيا كوميتەتى توراعاسىنىڭ ورىنباسارى سالتانات تومپيەۆانىڭ سوزىنە سۇيەنسەك, بيىل اۋە تاسىمالداۋ سالاسىندا جولاۋشىلار اعىنى وتكەن جىلمەن سالىستىرعاندا ەداۋىر ارتقانى بايقالادى.
– جىل سايىن جولاۋشىلار اعىنى كورسەتكىشى شامامەن 10 پايىزعا ءوسىپ كەلەدى. ماسەلەن, وتاندىق اۆياكومپانيالار 2022 جىلدىڭ العاشقى 8 ايىندا ىشكى جانە حالىقارالىق باعىتتار بويىنشا 6,9 ملن ادام تاسىمالداعان. بۇل وتكەن جىلدىڭ سايكەس كەزەڭىمەن سالىستىرعاندا 11 پايىزعا جوعارى. ال پاندەمياعا دەيىنگى, ياعني 2019 جىلعى كورسەتكىشتەن 23 پايىزعا ارتىق. 2021 جىلى ىشكى نارىقتىڭ وزىندە 7,5 ملن ادام تاسىمالداندى. بۇل كورسەتكىش الدىڭعى جىلدارمەن سالىستىرعاندا 64 پايىزعا كوپ, – دەيدى س.تومپيەۆا.
باسقوسۋ بارىسىندا قازاقستاندىق اۆياكومپانيالار قولدانىستاعى اۋە بيلەتتەرىنىڭ تاريفتىك باعامدارى مەن باعا بەلگىلەۋ مەحانيزمىن تانىستىردى. اتاپ ايتقاندا, Air Astana بيلەتتەردىڭ 73 پايىزىن تومەن جانە ورتا تاريف بويىنشا ساتىلىمعا شىعارادى. كومپانيا وكىلدەرىنىڭ ايتۋىنشا, جول ءجۇرۋ قۇجاتتارىنىڭ باعاسى جىل باسىنان بەرى كوتەرىلمەگەن.
سونىمەن قاتار جيىن بارىسىندا حالىقارالىق جانە ىشكى باعىتتار بويىنشا ءبىر شاقىرىمعا بەلگىلەنگەن جوعارى جانە تومەنگى شەكتەگى تاريفتەردى بەلگىلەۋ ساياساتى تالقىلاندى. بەلگىلى بولعانداي, بۇل تاراپتاعى قازاقستاندىق تاسىمالداۋشىلاردىڭ تاريف قۇنى شەتەلدىك اۆياكومپانيالارمەن سالىستىرعاندا ەداۋىر تومەن ەكەن.
مامانداردىڭ ايتۋىنشا, بيلەت باعاسى ناقتى باعىتتار بويىنشا سۇرانىس پەن ۇسىنىستان, ماۋسىمدىق جانە تاۋلىكتىك سۇرانىستىڭ اۋىتقۋىنان, بيلەت ساتىپ الۋ كەزىندەگى بورتتاعى جۇكتەمەنىڭ ارتۋىنان ايقىندالادى جانە بەلگىلەنەدى. سونداي-اق ونىڭ قۇنى اەروناۆيگاتسيالىق جانە اۋەجايداعى ءتۇرلى قىزمەتتەردەن, اۆيا جانارماي مەن امورتيزاتسيالىق شىعىنداردان قۇرالادى.
ونلاين فورماتتاعى باسقوسۋ بارىسىندا ازاماتتىق اۆياتسيا كوميتەتى وكىلدەرى بيلەت ساتاتىن سايتتارداعى قازاقستاندىق اۆياكومپانيالاردىڭ حالىقارالىق جانە ىشكى باعىتتارداعى جول ءجۇرۋ قۇجاتىنىڭ باعاسىنا سالىستىرمالى تالداۋ جاسادى. تالداۋ بارىسىندا استانا – الماتى باعىتىنداعى 30 قازانداعى اۋە بيلەتىنىڭ قۇنى 17 500 تەڭگە مەن 47 800 تەڭگە ارالىعىندا ەكەندىگى بەلگىلى بولدى. ال Air Astana كومپانياسىنىڭ استانا – ىستانبۇل – استانا باعىتىنداعى 2 جانە 9 قاراشا كۇندەردەگى بيلەت باعاسى 274 مىڭ تەڭگەنى قۇراپ وتىر. بۇل سايكەس داتا مەن سايكەس باعىتتاعى وزگە شەتەلدىك اۋە كومپانياسىنىڭ بيلەت باعاسىنان ەكى ەسە تومەن.
ءوز كەزەگىندە Air Astana وكىلدەرى بيلەت باعاسىن تومەندەتۋ باعىتىندا جۇزەگە اسىرىلىپ جاتقان شارالار جايىندا ايتتى. اتاپ ايتقاندا, ولار ۇشاقتاردى تەحنيكالىق قىزمەت كورسەتۋ جانە بورتسەرىكتەر مەن پيلوتتاردى وقىتۋ ورتالىقتارىن اشۋ كوزدەلىپ وتىرعانىن جەتكىزدى. سونىمەن قاتار جىلدىڭ سوڭىنا دەيىن اۆياكومپانيا پاركى تاعى ءۇش جاڭا ۇشاقپەن تولىقپاق. وسى رەتتە ايتا كەتەرلىگى, Air Astana تامىز ايىندا Airbus تيپتەگى 4 اۋە كەمەسىن العان بولاتىن.
بۇگىندە اۋە بيلەتتەرىنىڭ باعاسى ارنايى رەتتەلمەيدى, اۆيا تاسىمالداۋشىلار ديناميكالىق باعا بەلگىلەۋدى قولدانادى. بىلايشا ايتقاندا, بيلەتتەردىڭ قۇنى نارىقتاعى سۇرانىسقا قاراي اۆتوماتتى تۇردە رەتتەلەدى. ەگەر دە كاسىپكەرلىك كودەكستىڭ تالاپتارىنا سايكەس باسەكەلەستىكتى قورعاۋ بويىنشا ەل زاڭناماسى بۇزىلعان جاعدايدا مونوپولياعا قارسى دەن قويۋ شارالارى قولدانىلاتىن بولادى.
