ساراپشىلار فورۋمىنىڭ جۇمىسىنا قازاقستان ستراتەگيالىق زەرتتەۋلەر ينستيتۋتىنىڭ ەكسپەرتتەرىنەن بولەك, بەلگىلى ساياساتتانۋشىلار مەن الەۋمەتتىك عىلىم باعىتىنداعى ساراپشىلار, اكادەميالىق قوعامداستىق وكىلدەرى, ۋنيۆەرسيتەت وقىتۋشىلارى, زاڭگەرلەر دە اتسالىستى.
تالقىلاۋ كەزىندە ەلىمىزدەگى ساياسي وزگەرىستەر, جۇرگىزىلىپ جاتقان رەفورمالاردىڭ باعىت-باعدارى مەن العاشقى ناتيجەلەرى, بيىل 20 قاراشاعا بەلگىلەنگەن كەزەكتەن تىس پرەزيدەنت سايلاۋىنىڭ ەرەكشەلىكتەرى جونىندە ءسوز قوزعالدى. سونداي-اق, فورۋمعا قاتىسۋشىلار «جۇيەنى وزگەرتەمىز بە, الدە قوعامدى وزگەرتەمىز بە؟», «قوعامنىڭ قوزعاۋشى كۇشى كىمدەر؟», «جاستاردىڭ بويىنا قانداي جاڭا قۇندىلىقتاردى سىڭىرەمىز؟» دەگەن سۇراقتار توڭىرەگىندە پىكىر تالاسىپ, تۇجىرىمدى بايانداما جاسادى.
باسقوسۋدا ساراپشىلار توبى ەلىمىزدە ءجۇرىپ جاتقان ساياسي رەفورمالارعا كەڭىنەن توقتالىپ, پارلامەنتتە قابىلدانعالى جاتقان زاڭدار, قوعامدىق سانانىڭ ترانسفورماتسياسى, جاڭا زامانۋي كوزقاراستار مەن ترەندتەر بارىسىن قىزۋ تالقىلادى. ديسكۋسسيا فورماتىندا وتكەن ءىس-شارادا تىڭ ويلار ايتىلىپ, ناقتى ۇسىنىستار دا ورتاعا تاستالدى. جيىن سوڭىندا قاتىسۋشىلار «مۇنداي ەكسپەرتتىك تالقىلاۋلاردىڭ ەلىمىزدە كوپ بولعانى قاجەت» دەگەن ويلارىن اشىق ءبىلدىردى. «ويتكەنى وسىنداي ساياسي تالقىلاۋلار مەملەكەتىمىزدە ءوزىنىڭ زەرتتەۋ سالاسى بويىنشا ماماندانعان ەكسپەرتتەر قاۋىمىنىڭ قالىپتاسۋىنا وڭ ىقپال ەتەدى», دەيدى ساراپشىلار.
