قۇرىلىس – ماڭىزدى سالا

Finprom تالداۋىنا سۇيەنسەك, قۇرىلىس سالاسى ەكونوميكادا ماڭىزدى ءرول ويناپ تۇر. اسىرەسە داعدارىس كەزىندە. 2020 جىلى ىشكى جالپى ءونىم 2,5 پايىزعا تومەندەگەن كەزدە قۇرىلىس سەكتورى بىردەن 11,6 پا­يىزعا ىلگەرىلەگەن. بۇل – بۇكىل سەكتورلار اراسىنداعى رەكوردتىق كورسەتكىش. سا­لاداعى وسى ءوسىم ناقتى سەكتورعا ءتيىپ كەتۋى مۇمكىن پاندەميا زيانىنىڭ الدىن العان.

«قۇرىلىس ەل ەكونوميكاسى ءوسىمىنىڭ باستى درايۆەرى دەپ نىق سەنىممەن ايتا الا­مىز. بيىل بۇل سالا كولەمى جاعىنان ءوسۋ بويىنشا دا ليدەر اتاندى. التى اي­دىڭ قورىتىندىسى بويىنشا ىشكى جالپى ءونىم 3,6 پايىزعا وسسە, قۇرىلىستاعى ءوسىم 9,2 پايىزدى قۇرادى. ءبىر قىزىعى, سالا تاعى ءبىر جوعارى تەحنولوگيالىق سەگمەنت – اقپارات جانە كوممۋنيكاتسيا سالاسىمەن (+12,6 پايىز) ءبىر قاتاردا كوش باستاپ تۇر. قازىر قۇرىلىس ەل ءىجو-ءنىڭ 5 پايىزىن قالىپتاستىرادى. بۇل رەتتە سەكتور ارا­لاس سالالاردى (وڭدەۋشى ونەركاسىپ, كولىك قۇ­راستىرۋ, قۇرىلىس ماتەريالدارىن ءوندىرۋ, ساۋدا, ترانسپورت-لوگيستيكالىق سالا) ىن­تا­لاندىرا وتىرىپ ەكونوميكاعا مۋلتي­پليكاتيۆتى اسەرىن تيگىزەدى», دەيدى ساراپشىلار.

سونىمەن بىرگە قۇرىلىس سالاسى ەلدىڭ الەۋمەتتىك-ەكونوميكالىق دامۋىنا دا زور ىقپال ەتۋدە. سەكتوردا قازىر 637,5 مىڭ ادام جۇمىس ىستەيدى. ادام سانى جاعىنان ساۋدا, اگروونەركاسىپ كەشەنى جانە ءبىلىم بەرۋ سالالارىمەن يىق تىرەستىرەدى. ەلدەگى بۇكىل ەڭبەككە جارامدى قاۋىمنىڭ 7,2 پا­يىزى ناپاقاسىن وسى قۇرىلىستان ايىرىپ جۇرسە, رەالدى سەكتورداعى ەڭبەكپەن قام­تىل­عانداردىڭ 17,4 پايىزى وسى سالادا ىستەيدى. ايتا كەتەيىك, ناقتى سەكتورعا قۇرىلىس, ونەركاسىپ, اگروونەركاسىپ كەشەنى, ترانسپورت جانە بايلانىس سالالارى كىرەدى.

قۇرىلىستىڭ شاپاعاتى تيەتىن باعىت­تار جوعارىدا كورسەتىلگەن سالالارمەن شەكتەلمەيدى. ول قۇرىلىس ماتەريالدارىن, بۇيىمدار مەن مەحانيزمدەردى (مەتاللۋرگيا, كولىك قۇراستىرۋ, حيميا ونەركاسىبى) ءوندىرۋ جانە ساتۋعا دەمەۋ بەرىپ, ۇيلەر مەن تۇرعىن ءۇي كەشەندەرىنە قىزمەت كورسەتۋ سەگمەنتىنە دە (كلينينگتەن باستاپ جەتكىزىپ بەرۋ قىزمەتىنە دەيىنگى ارالىقتا) اسەر ەتەدى. سونداي-اق جوعارى تەحنولوگيالىق سالالار – ارحيتەكتۋرا, ەكسپەرتيزا, گەولوگيا, تسيفرلىق تەحنولوگيا جانە تەلەكوم سالالارى دا قۇرىلىسپەن تىكەلەي بايلانىستى.

«تاعى ءبىر ماڭىزدى جاعداي – قۇرىلىستىڭ بيزنەس-بەلسەندىلىككە اسەرى. جۇمىس ىستەپ تۇرعان كومپانيالار سانى بويىنشا دا قۇرىلىس سەكتورى كوش باسىندا. بيىل تامىز ايىنداعى دەرەك بويىنشا قۇرىلىس سالاسىندا 50,3 مىڭ كومپانيا جۇمىس ىستەيدى. بۇل بىلتىرمەن سالىستىرعاندا 11,2 پايىزعا جوعارى كورسەتكىش. بۇل دەگەنىمىز – ەلدەگى بۇكىل كاسىپورىننىڭ 13,3 پايىزى جانە ناقتى سەكتورداعى بارلىق كاسىپورىننىڭ 41,9 پايىزى», دەپ جازادى Finprom.

جالپى, قۇرىلىس سەكتورى ەكونوميكالىق وسىمگە جانە ناقتى سەكتوردىڭ داعدارىس قۇشاعىنان سىتىلىپ شىعۋىنا تىكەلەي جانە جاناما اسەر ەتە الادى. سون­داي-اق سەكتور حالىقتىڭ باسپاناعا دەگەن قا­جەت­تىلىگىن وتەيدى. تيىسىنشە جۇمىسقا ورنا­لاسۋ, ىسكەرلىك ورتانى قالىپتاستىرۋ, ءونىم ءوندىرۋ بويىنشا دا مۇمكىندىگىنشە مولى­نان ىقپال ەتەتىن سالا بولىپ قالا بەرەدى.