بۇل تۋرالى جۋرناليست كۇلتەگىن اسپان ۇلى ءوزىنىڭ Facebook پاراقشاسىندا جازدى.
ءجۋرناليستىڭ ايتۋىنشا, ونىڭ الماتى قالاسىنىڭ باس پروكۋراتۋراسى مەن پروكۋراتۋراسىنا بەرگەن وتىنىشىنە بايلانىستى الماتى قالاسىنىڭ پوليتسيا دەپارتامەنتى قىلمىستىق ءىس قوزعاعان.
«الماتى پد ەكسترەميزمگە قارسى ءىس-قيمىل باسقارماسى باستىعىنىڭ ورىنباسارى د.ە.ابىقۇلوۆ قول قويعان حاتقا سايكەس, پد تەرگەۋ باسقارماسى قر قىلمىستىق كودەكسىنىڭ 174-بابىنىڭ 1-بولىگى (الەۋمەتتىك, ۇلتتىق, رۋلىق, ناسىلدىك, تاپتىق نەمەسە ءدىني الاۋىزدىقتى قوزدىرۋ) بويىنشا سوتقا دەيىنگى تەرگەۋدى باستادى», دەپ جازدى اسپان ۇلى.
باس پروكۋروردىڭ ورىنباسارى اسەت شىنداليەۆ الماتىنىڭ پوليتسيا دەپارتامەنتى تەكسەرۋ جۇرگىزىپ جاتقانىن جانە كاسىپكەردىڭ سوزدەرى بويىنشا ءتيىستى ساراپتامالار تاعايىنداعانىن حابارلادى.
بۇعان دەيىن «Chocofamily Holding» نەگىزىن قالاۋشى راميل مۋحورياپوۆ قازاقستاندىقتار ورىس تىلىندە قويىلعان سۇراققا قازاق تىلىندە جاۋاپ بەرەتىن جاعدايدى ۇلتشىلدىقتىڭ كورىنىسى دەپ اتاعان ەدى. كەيىنىرەك راميل مۋحورياپوۆ ايتقان سوزدەرى ءۇشىن كەشىرىم سۇرادى.
بۇل رەتتە «جاڭا قازاقستان» دەپۋتاتتىق توبىنىڭ ماجىلىسمەندەر توبى باس پروكۋرور بەرىك اسىلوۆقا مۋحورياپوۆتىڭ سوزدەرىن تەكسەرۋگە ۇندەۋ جولدادى. دەپۋتاتتار باس پروكۋرور قازاقستان قىلمىستىق كودەكسىنىڭ 174 – بابىنا 1-تارماعىنا سايكەس الاۋىزدىقتى ءورشىتۋ شارالارىن قابىلداۋى ءتيىس دەپ سانايدى.
