ءاليحان سمايىلوۆ وتىرىستىڭ پاندەميادان كەيىنگى كەزەڭدە العاش رەت جۇزبە-ءجۇز وتكەنىن جانە قازاقستاننىڭ تمد-عا توراعالىق ەتۋىنىڭ قورىتىندى ءىس-شاراسى بولعانىن اتاپ ءوتتى.
«بۇگىن ىنتىماقتاستىقتى ودان ءارى دامىتۋ ماسەلەلەرى بويىنشا كەلەلى اڭگىمە ءوربىدى. مەملەكەتتەر دوستاستىق شەڭبەرىندەگى كوپجاقتى ءوزارا ءىس-قيمىلدى نىعايتۋعا نيەتتى ەكەندەرىن تاعى دا راستادى. سونداي-اق سىرتقى ەكونوميكالىق ىنتىماقتاستىق اياسىندا ورتاق ماقساتتارعا قول جەتكىزۋ بويىنشا بىرلەسكەن قادامدار تالقىلاندى», دەدى ءاليحان سمايىلوۆ.
ونىڭ ايتۋىنشا, تمد كەڭىستىگىندە ساۋدا-ەكونوميكالىق بايلانىستاردى تەرەڭدەتۋ ماقساتىندا قىزمەتتەردىڭ ەركىن ساۋداسى جانە ينۆەستيتسيالاردى جۇزەگە اسىرۋ تۋرالى كەلىسىمنىڭ جوباسىن اياقتاۋ جونىندە شەشىم قابىلداندى.
بۇدان باسقا, قوعامدىق دەنساۋلىق ساقتاۋ سالاسىندا سانيتارلىق-ەپيدەميولوگيالىق سيپاتتاعى توتەنشە جاعدايلاردىڭ الدىن الۋ جانە دەن قويۋ جونىندەگى ىنتىماقتاستىق تۋرالى كەلىسىمگە قول قويىلدى, ميكروبقا قارسى پرەپاراتتارعا توزىمدىلىكتى تەجەۋ جونىندەگى بىرلەسكەن ءىس-قيمىل جوسپارى قابىلداندى, سونداي-اق گۋمانيتارلىق ىنتىماقتاستىق سالاسىنداعى 2023-2024 جىلدارعا ارنالعان باسىم ءىس-شارالار جوسپارى ماقۇلداندى.
«عىلىمي-تەحنيكالىق, يننوۆاتسيالىق, تەحنولوگيالىق سالالارمەن قاتار حيميا سالاسىن تسيفرلىق ترانسفورماتسيالاۋ جانە راديوناۆيگاتسيا سالاسىنداعى ىنتىماقتاستىق بويىنشا بىرنەشە ماسەلە بولدى. ۇكىمەت باسشىلارى وسى سالالاردا ءوزارا ءىس-قيمىلدى دامىتۋ بويىنشا بىرقاتار تۇجىرىمدامالىق جانە باعدارلامالىق قۇجاتتى قابىلدادى», دەپ اتاپ ءوتتى ءاليحان سمايىلوۆ.
سونداي-اق ول كەڭەستىڭ 2023 جىلى دوستاستىق ورگاندارى مەن جەكەلەگەن ءىس-شارالاردى قارجىلاندىرۋعا قاتىستى قارجىلىق-بيۋدجەتتىك ماسەلەلەردى قاراپ, شەشىمدەر قابىلداعانىن ايتتى.
«قازاقستاندىق تاراپ بۇگىنگى ءىس-شارانىڭ قورىتىندىلارىنا قاناعاتتاندى. ول مەملەكەتتەرىمىز بەن حالىقتارىمىزدىڭ يگىلىگى ءۇشىن ىنتىماقتاستىقتى نىعايتۋ جولىنداعى كەزەكتى قادام بولاتىنىنا سەنىمدىمىز», دەپ تۇيىندەدى پرەمەر-مينيستر.
تمد ۇكىمەت باسشىلارى كەڭەسىنىڭ كەزەكتى وتىرىسىن 2023 جىلى ماۋسىمدا سوچي قالاسىندا وتكىزۋ تۋرالى شەشىم قابىلداندى.
