بيىل ستالين مەن مولوتوۆ قول قويعان «قيىر شىعىستىڭ شەكارالىق ايماقتارىنان كورەيلىك تۇرعىنداردى كوشىرۋ تۋرالى» 1937 جىلدىڭ 21 تامىزىندا شىققان قاۋلىسىنىڭ نەگىزىندە كورەي حالقى وكىلدەرىنىڭ قازاقستان اۋماعىنا كۇشتەپ كوشىرىلىپ كەلگەندەرىنە 85 جىل تولىپ وتىر.
بۇگىنگى كورمەنىڭ ەكسپوزيتسيالارى وسى تاريحي وقيعانى جان-جاقتى اشىپ كورسەتۋ ماقساتىندا ۇيىمداستىرىلدى. اتاپ ايتقاندا, كورمەگە قويىلعان تۇپنۇسقالىق ارحيۆ قۇجاتتارىندا كۇشتەپ كوشىرىلىپ اكەلىنگەن كورەيلىكتەردى بۇرىنعى قىزىل-وردا, الماتى جانە وڭتۇستىك قازاقستان وبلىستارىندا ورنالاستىرۋ, ونداعى كورەيلىكتەردىڭ تۇرمىستىق جاعدايى, كورەي مۋزىكالىق دراما تەاترىنىڭ تاريحى, كورەيلىك جازۋشىلاردىڭ ءومىرى مەن شىعارماشىلىق قىزمەتى جانە ت. ب. كورىنىس تاپقان.
قۇجاتتار كورمەسىنە كورەي رەسپۋبليكاسىنىڭ ۇلتتىق ءارحيۆىنىڭ وكىلدەرى قاتىستى. كورەي ارحيۆشىلەرى نازارلارىنا ۇسىنىلعان تاريحي دەرەكتەرمەن تانىسىپ, قىزىقتىرعان سۇراقتارىنا جاۋاپ الدى.
كەزدەسۋ بارىسىندا قر ورتالىق مەملەكەتتىك ءارحيۆىنىڭ ديرەكتورى ءسابيت شىلدەباي ەكى ەلدىڭ باس ارحيۆتەرى اراسىندا ءوزارا ىنتىماقتاستىق كەلىسىمىن ورناتۋعا شاقىردى. بولاشاقتا قازاقستاندىق جانە كورەيلىك ارحيۆشىلەرىنىڭ اراسىندا شىعارماشىلىق قاتىناستى ورناتىپ, قازاقستانداعى كورەي دياسپوراسىنىڭ تاريحىن جان-جاقتى زەرتتەۋگە, سونىمەن قاتار ارحيۆ ءىسىن دامىتۋ سالاسى بويىنشا دا ءىس-شارالار ۇيىمداستىرۋ جونىندە اڭگىمە قوزعالدى.
سونىمەن قاتار وسى قۇجاتتار كورمەسىنە كورەيا رەسپۋبليكاسىنىڭ ازاماتى, كيمەپ ۋنيۆەرسيتەتىنىڭ ماگيسترانتى دجون مين ۋ كەلىپ, تاريحي دەرەكتەرمەن تانىسىپ, بولاشاقتا ءوز ەلىن قازاق حالقىنىڭ تاريحى جانە مادەنيەتىمەن تانىستىرۋدى ماقسات تۇتاتىنىن ءبىلدىردى.
سونداي-اق اتالعان قۇجاتتار كورمەسىنە «اشىق قوعامعا – اشىق ارحيۆ» اتتى ارحيۆشىلەردىڭ حالىقارالىق كونگرەسىنە پولشا, يوردانيا, وزبەكستان جانە ت. ب. مەملەكەتتەردەن كەلگەن قوناقتار دا قاتىستى.
