قازاقستاندا قايىرىمدىلىق جاساۋ مەن ونى دامىتۋعا ەلەۋلى ۇلەس قوسقان قايىرىمدىلىق جاساۋشىلاردى ىنتالاندىرۋ, ولارعا قوعامنىڭ نازارىن اۋدارۋ ماقساتىندا اقپارات جانە قوعامدىق دامۋ مينيسترلىگى 2018 جىلى «جومارت جۇرەك» سىيلىعىن تاعايىنداعان بولاتىن.
بيىل كونكۋرسقا 17 وبلىس پەن رەسپۋبليكالىق ماڭىزى بار قالالاردىڭ وكىلدەرى قاتىستى.
كونكۋرس جەڭىمپازدارى – ونلاين-داۋىس بەرۋ قورىتىندىسى بويىنشا حالىق تاڭداعان 50 ادام «جىل تۇلعاسى», «جىل مەتسەناتى», «تۇعان ولكە», «جىلدىڭ ۇزدىك ۇيىمى» جانە «جىلدىڭ ۇزدىك قامقورشىسى» دەپ اتالاتىن 5 نوميناتسيا بويىنشا انىقتالدى.
ء«بىزدىڭ حالقىمىز قايىرىمدىلىقتى ادامنىڭ تازا نيەتى مەن ادامگەرشىلىك قارىم-قاتىناسىن بەينەلەيتىن جاقسىلىق پەن تەكتىلىكتىڭ بەلگىسى دەپ ساناعان. تاريحي تۇرعىدان العاندا, ءبىزدىڭ ەلىمىزدە قيىندىققا تاپ بولعان ادامعا قول ۇشىن سوزۋ كوپتەگەن عاسىردان بەرى قالىپتاسقان ءداستۇر», دەدى اقدم ۆيتسە-مينيستر دانيار قادىروۆ.
بارلىق لاۋرەاتتارعا ەستەلىك سىيلىقتار مەن ديپلومدار تابىس ەتىلدى.
