ماۋلەن اشىمباەۆ مۇراجايدى ارالاۋ بارىسىندا اكادەميا مۇشەلەرىمەن اڭگىمەلەسىپ, جاڭا جادىگەرلەرمەن تانىستى. ەكسپوزيتسيادا 150-دەن استام كەسكىندەمە, 30-دان استام گرافيكالىق جۇمىس جانە ءمۇسىن بار. ولاردىڭ كوپشىلىگى سوڭعى جىلدارى سومدانعان جانە ءالى ونەرسۇيەر قاۋىمنىڭ نازارىنا ۇسىنىلماعان تۋىندىلار. سەنات توراعاسى بۇل مادەنيەت پەن ونەر ۇلتتىق ەرەكشەلىكتى ساقتاۋداعى اسا ماڭىزدى ماسەلەلەردىڭ ءبىرى ەكەنىن اتاپ ءوتتى.
«كوشپەلىلەردىڭ ەستەتيكاسى مەن دۇنيەتانىمى وتە تەرەڭ جانە ەرەكشە. كوشپەلىلەردە ادام تابيعاتپەن ەتەنە جاقىن بولىپ, الەمنىڭ ۇيلەسىمدى بولىگىنە اينالدى. قورشاعان ورتاعا جاناشىرلىقپەن قاراۋ – كوشپەلىلەردىڭ دۇنيەتانىمىنداعى ماڭىزدى ەرەكشەلىكتەردىڭ ءبىرى. وسىنىڭ ءبارى كوشپەلى حالىقتاردىڭ بەينەلەۋ ونەرىندە دە كورىنىس تاپتى», دەپ اتاپ ءوتتى ماۋلەن اشىمباەۆ.
سەنات توراعاسىنىڭ پىكىرىنشە, بۇگىندە كوپتەگەن وتاندىق سۋرەتشىلەر كوشپەلىلەردىڭ ونەرىن زاماناۋي تۇرعىدا زەردەلەپ, ونى الەمدىك مادەنيەتتىڭ ماڭىزدى بولىگىنە اينالدىرۋ جولىندا ەسەلى ەڭبەك ەتىپ كەلەدى.
«سۋرەتشىلەر اراسىنداعى ءبىزدىڭ قۇرمەتتى اقساقالىمىز اماندوس اقاناەۆ كوشپەلىلەردىڭ ەستەتيكاسى تۋرالى ءوزى تۇيگەن تانىمدى بەينەلەۋگە بۇكىل ءومىرىن ارنادى. ونىڭ بۇل باعىتتا قول جەتكىزگەن جەتىستىكتەرى اۋقىمدى لايىقتى. سونىمەن قاتار ول شاكىرتتەر شوعىرىن تاربيەلەدى», دەگەن ماۋلەن اشىمباەۆ ونەر قايراتكەرىنە العىسىن ءبىلدىردى.
سەنات توراعاسى سونىمەن قاتار « ۇلى دالا سازى» كورمەسى ۇلتتىق كودتى ساقتاۋ تۇرعىسىنان اسا ماڭىزدى ءرول اتقاراتىنىن اتاپ ءوتتى. «كوركەمونەر اكادەمياسى» قوعامدىق قورى قازاقستان اۋماعىندا دا, ودان تىس جەرلەردە دە ءتۇرلى كورمەلەر وتكىزۋدە بەلسەندى قىزمەت اتقارىپ كەلەدى. « ۇلى دالا سازى» كورمەسى بەينەلەۋ ونەرىن ورىستەتۋ جانە اكادەميا مۇشەلەرىنىڭ شىعارماشىلىعىن دارىپتەۋ ماقساتىندا وتكىزىلىپ وتىر.
كورمەنىڭ اشىلۋ سالتاناتىنا مادەنيەت جانە سپورت ءمينيسترى داۋرەن اباەۆ, استانا قالاسىنىڭ اكىمى التاي كولگىنوۆ, ديپلوماتيالىق كورپۋس پەن شىعارماشىلىق زيالى قاۋىم وكىلدەرى, مەملەكەت جانە قوعام قايراتكەرلەرى, مادەنيەتتانۋشىلار قاتىستى.
