وليمپيادالىق سپورت تۇرىنە ەنەتىن كوگالداعى حوككەي سپورتى كەيىنگى جىلدارى قازاقستاندا قارقىندى دامىپ كەلەدى. ازيا چەمپيوناتتارىندا جۇلدە سالىپ جۇرگەن ۇلتتىق قۇراما وكىلدەرى الەمدىك دەڭگەيدەگى جارىستاردا دا لايىقتى ونەر كورسەتىپ جۇرگەنىن جانكۇيەرلەر جاقسى بىلەدى. ەندى, مىنە, جاستار قۇراماسى دا ۇزىكتەر قاتارىنان كورىنىپ, ازيا كۋبوگىندا العاش رەت توپ جاردى.
ورتالىق جانە وڭتۇستىك ازيانىڭ التى قۇراماسى ونەر كورسەتكەن تالدىقورعانداعى تارتىستى باسەكەلەردە قازاقستان قۇراماسىنىڭ قىزدارى توپتىق كەزەڭدە تەك قىتايلىق تايبەي سپورتشىلارىنا عانا جول بەرىپ (فينالدا ءدال وسى قۇرامانى جەڭدى), قالعان ويىنداردىڭ بارلىعىندا قارسىلاسىن قاپى قالدىرىپ, ازيا كۋبوگىنىڭ جەڭىمپازى اتاندى.
اتاپ ايتقاندا, جەرلەستەرىمىز قۇرلىق باسەكەسىنىڭ توپتىق كەزەڭدەگى العاشقى تۋرىندا تاجىكستان قۇراماسىن 18:0 ەسەبىمەن تىزە بۇكتىرسە, كەيىنگى ويىندا يندونەزيا حوككەيشىلەرىنەن باسىم بولدى – 5:0. ءۇشىنشى تۋردا قىتايلىق تايبەيدەن 0:2 ەسەبىمەن جەڭىلىپ قالعان جەرلەستەرىمىز كەيىنگى ەكى ماتچتا گونكونگ (7:0) پەن وزبەكستان قۇرامالارىن (2:0) جەڭىپ, فينالدىق سايىسقا جولداما الدى.
ءار ءتورت جىلدا ءبىر رەت وتكىزىلەتىن ازيا كۋبوگىنىڭ بيىلعى فينالىندا توپتىق كەزەڭدە ەڭ كوپ ۇپاي جيناعان قازاقستان مەن قىتايلىق تايبەي قۇرامالارى شىعىپ, وتانداستارىمىز 7:2 ەسەبىمەن جەڭىسكە جەتىپ قانا قويماي, وسى جارىستاعى ەسەسىن قايتاردى. ال ءۇشىنشى ورىن ءۇشىن وتكەن باسەكەدە وزبەكستان سپورتشىلارى يندونەزيانى جەڭىپ, ازيا كۋبوگىنىڭ قولا جۇلدەگەرى اتاندى. بۇعان دەيىن ۇيىمداستىرىلعان جاستار اراسىنداعى ازيا كۋبوگى باسەكەلەرىندە قىتايلىق تايبەي قۇراماسى (2003, 2011, 2014) ءۇش رەت جەڭىمپاز اتانعان بولسا, مالايزيا (2007) مەن سينگاپۋر (2019) سپورتشىلارى ءبىر-ءبىر مارتە ۇزدىك شىققان-تىن.
سونداي-اق جارىس قورىتىندىسى بويىنشا, قىتايلىق تايبەي وكىلى حۋان ي-چۋن ازيا كۋبوگىنىڭ ۇزدىك سۇرمەرگەنى, ال ۆان يۋ-چين ۇزدىك ويىنشى اتاندى. سونداي-اق قازاقستان قۇراماسىنىڭ باس باپكەرى نۇرجان بەيبىتوۆ ءتۋرنيردىڭ ەڭ ۇزدىك جاتتىقتىرۋشىسى اتاعىنا يە بولسا, ءدىلناز ولجاباەۆا ەڭ ۇزدىك قاقپاشى اتالىمىندا توپ جاردى.
ءبىر اپتاعا جالعاسقان جارىستىڭ جابىلۋ سالتاناتىنا تالدىقورعان قالاسى اكىمىنىڭ ورىنباسارى دياس احمەتقاليەۆ, جەتىسۋ وبلىستىق سپورت باسقارماسىنىڭ باسشىسى المات ۇشكەمپىروۆ, قازاقستان حوككەي فەدەراتسياسىنىڭ پرەزيدەنتى بەرىكقازى سەكسەنباەۆ, ۆيتسە-پرەزيدەنتى ماحمۇد ورمان, فەدەراتسيانىڭ باس حاتشىسى سەرىك قالىمباەۆ جانە تاعى باسقا شەت مەملەكەتتەردەن كەلگەن لاۋازىمدى تۇلعالار قاتىسىپ, جارىس جەڭىمپازى مەن جۇلدەگەرلەرىن ماراپاتتادى.
