شارتتارعا باس پروكۋرور بەرىك اسىلوۆ پەن كيپردىڭ ادىلەت جانە قوعامدىق ءتارتىپ مينيسترى ستەفي دراكۋ قول قويدى.
ۇستاپ بەرۋ تۋرالى شارت تاراپتارعا ءبىر مەملەكەتتە قىلمىس جاساعان جانە ەكىنشى مەملەكەتتە جاسىرىنىپ جۇرگەن ىزدەۋدەگى ادامداردى قىلمىستىق جاۋاپكەرشىلىككە تارتۋ جانە سوت ۇكىمدەرىن ورىنداۋ ءۇشىن ەكستراديتسيالاۋعا مۇمكىندىك بەرەدى.
قىلمىستىق ىستەر بويىنشا قۇقىقتىق كومەك تۋرالى شارت ەكى ەلدىڭ قۇقىق قورعاۋ جانە ارنايى ورگاندارىنا كۇدىكتىلەر مەن ايىپتالۋشىلاردىڭ كىناسىنىڭ دالەلدەمەلەرىن الۋعا, سونىڭ ىشىندە قىلمىستىق جولمەن الىنعان اقشا قاراجاتىن جانە وزگە دە م ۇلىكتى تاركىلەۋگە جانە ولارعا تىيىم سالۋعا مۇمكىندىك بەرەدى. شارت پرەزيدەنتتىڭ تاپسىرماسى بويىنشا قۇرىلعان ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيانىڭ جۇمىسىنا كومەگىن تيگىزەدى.
سونىمەن قاتار جۇمىس ساپارى اياسىندا باس قاداعالاۋ ورگانىنىڭ باسشىسى كيپردىڭ باس پروكۋرورى دجوردج ساۆۆيديسپەن جانە وسى ەلدىڭ ىشكى ىستەر مينيسترى نيكوس نۋريسپەن كەزدەسۋلەر وتكىزىلدى.
تاراپتار حالىقارالىق قاۋىپسىزدىكتىڭ بىرقاتار قۇقىقتىق ماسەلەسى بويىنشا, ونىڭ ىشىندە زاڭسىز شىعارىلعان اكتيۆتەردى قايتارۋ جونىندە پىكىر الماستى.
«وتكىزىلگەن كەزدەسۋلەردىڭ قورىتىندىسى بويىنشا تاراپتار قازاقستان رەسپۋبليكاسى مەن كيپر رەسپۋبليكاسىنىڭ قۇقىق قورعاۋ ورگاندارى اراسىنداعى ىنتىماقتاستىقتى نىعايتۋ جونىندەگى ودان ءارى بىرلەسكەن قادامداردى بەلگىلەي وتىرىپ, قىلمىستاردىڭ وزەكتى تۇرلەرىنە قارسى كۇرەستە كۇش-جىگەردى شوعىرلاندىرۋ تۋرالى ۋاعدالاستى», دەپ جازىلعان حابارلامادا.
