كۇن تارتىبىندەگى ماسەلە بويىنشا ورتالىق سايلاۋ كوميسسياسىنىڭ مۇشەسى ءسابيلا مۇستافينا بايانداما جاسادى. ول 2022 جىلدىڭ 7 قازانىندا ورتالىق سايلاۋ كوميسسياسىنا «جالپىۇلتتىق سوتسيال-دەموكراتيالىق پارتيا» رەسپۋبليكالىق قوعامدىق بىرلەستىگى نۇرلان اۋەسباەۆتى قازاقستان رەسپۋبليكاسىنىڭ پرەزيدەنتتىگىنە كانديدات ەتىپ ۇسىنۋعا قاتىستى قۇجاتتاردى تاپسىرعانىن حابارلادى. ورتالىق سايلاۋ كوميسسياسىنا كانديداتتى تىركەۋ ءۇشىن مىناداي قۇجاتتار ۇسىنىلدى:
– نۇرلان اۋەسباەۆتىڭ جانە ونىڭ زايىبىنىڭ اكتيۆتەر مەن مىندەتتەمەلەر جونىندە دەكلاراتسيا تاپسىرعانى تۋرالى مەملەكەتتىك كىرىستەر ورگانىنىڭ انىقتاماسى;
– تىركەۋگە كەدەرگى كەلتىرەتىن اۋرۋلاردىڭ جوقتىعى تۋرالى مەديتسينالىق قورىتىندىسى;
– وبلىستاردىڭ, رەسپۋبليكالىق ماڭىزى بار قالالاردىڭ جانە رەسپۋبليكا استاناسىنىڭ اۋماقتىق سايلاۋ كوميسسيالارىنىڭ نۇرلان اۋەسباەۆتى قولداپ جيناعان ازاماتتاردىڭ قولدارىن تەكسەرۋ ناتيجەلەرى تۋرالى حاتتامالارى.
اتالعان حاتتاماعا سايكەس نۇرلان اۋەسباەۆتى قولداۋ ماقساتىندا ەلىمىزدىڭ 15 وڭىرىندەگى 120 908 ازاماتتىڭ قولى جينالدى. تەكسەرۋ ناتيجەسىندە 119 197 قولدىڭ دۇرىستىعى انىقتالدى, ياعني قاجەتتى سانى, كەمىندە 1% نەمەسە 118 273 قامتاماسىز ەتىلدى.
نۇرلان اۋەسباەۆتى پرەزيدەنتتىككە كانديدات رەتىندە تىركەۋگە قاجەتتى بارلىق قۇجاتتار ورتالىق سايلاۋ كوميسسياسىنا ۇسىنىلدى جانە ولارعا قويىلاتىن تالاپتارعا تولىق سايكەس كەلەدى. ورتالىق سايلاۋ كوميسسياسىنىڭ قاۋلىسىمەن نۇرلان اۋەسباەۆ 2022 جىلعى 20 قاراشاعا تاعايىندالعان قازاقستان رەسپۋبليكاسىنىڭ پرەزيدەنتىنىڭ كەزەكتەن تىس سايلاۋىندا قازاقستان رەسپۋبليكاسىنىڭ پرەزيدەنتتىگىنە كانديدات بولىپ تىركەلدى, وعان ءتيىستى كۋالىك بەرىلدى.
