قازىرگى تاڭدا تاراپتار ستراتەگيالىق ارىپتەستىك تۋرالى دەكلاراتسيا مەن قازاقستان – ماجارستان ستراتەگيالىق كەڭەسى شەڭبەرىندە ءوزارا ءىس-قيمىلدى جالعاستىرىپ كەلەدى. تاراپتار ەلدەرىمىز اراسىنداعى ەكىجاقتى ساياسي ديالوگتىڭ ماڭىزدى باعىتى بولىپ سانالاتىن پارلامەنتارالىق قاتىناستاردى نىعايتۋ جانە جانداندىرۋ ماسەلەلەرىنە ەرەكشە نازار اۋداردى.
سونىمەن قاتار مادەني-گۋمانيتارلىق ءوزارا ءىس-قيمىل تۋرالى اڭگىمە بارىسىندا تۇركى ۇيىمدارى اياسىنداعى ىنتىماقتاستىق ماسەلەسى دە ءسوز بولدى. ەرلان قوشانوۆ حالىقتارىمىزدى تىعىز تاريحي بايلانىستار, ۇلتتىق مادەنيەت پەن ءداستۇردى جاڭعىرتۋ مەن ساقتاۋعا دەگەن ۇمتىلىس بىرىكتىرەتىنىن اتاپ ءوتتى. سونداي-اق پالاتا سپيكەرى لوراند ەتۆيوش اتىنداعى ۋنيۆەرسيتەتتە ۆەنگر ءتىلىن ۇيرەنۋگە نيەتتى قازاقستاندىق ستۋدەنتتەر مەن قازاق ءتىلى كۋرستارىنا قاتىساتىن ۆەنگر جاستارىنىڭ سانى ارتىپ كەلە جاتقانىن ايتتى.
– قازاقتىڭ باس اقىنى جانە اعارتۋشىسى اباي قۇنانباي ۇلىنىڭ شىعارماشىلىق مۇراسى ماجارستاندا تانىمال بولىپ كەلە جاتقانىنا قۋانىشتىمىن. ءسىزدىڭ ۇلتتىق مادەنيەتتى, رۋحاني دامۋدى, ءبىلىم بەرۋدى قورعاۋ جانە دامىتۋ تۋرالى يدەيالارىڭىز, سونداي-اق «لاكيتەلەك» حالىق ينستيتۋتى ابايدىڭ اعارتۋشىلىق قىزمەتىمەن جاقىن ەكەنىن اتاپ وتكىم كەلەدى, – دەدى ءماجىلىس توراعاسى.
اڭگىمە بارىسىندا ەرلان قوشانوۆ ماجار سپورتشىلارىن 2024 جىلى قازاقستاندا وتكىزۋى جوسپارلانىپ وتىرعان 5-ءشى دۇنيەجۇزىلىك كوشپەندىلەر ويىندارىنا قاتىسۋعا شاقىردى.
ماجارستان مەملەكەتتىك جينالىسى توراعاسىنىڭ ورىنباسارى ماجارستان پارلامەنتى تاراپىنان قازاقستانمەن بارلىق سالادا ىنتىماقتاستىقتى دامىتۋ ءۇشىن قاجەتتى قولداۋ كورسەتۋگە دايىن ەكەندىگىن ايتتى.
– ءبىز ءۇشىن قازاقستان مەن باۋىرلاس ەلدەر باستى ورىندا تۇرادى. تۋىستىق جانە باۋىرلاستىق قارىم-قاتىناس وتە ماڭىزدى كاپيتال بولىپ سانالادى, – دەدى شاندور لەجاك.
ماجارستان پارلامەنتىنىڭ ۆيتسە-سپيكەرى لاكيتەلەك قالاسىندا ماجار ۇكىمەتىنىڭ گرانتى بويىنشا ءبىلىم الىپ جاتقان 300 قازاقستاندىق ستۋدەنت تۋرالى جىلى لەبىزىن ءبىلدىردى.
