2009 جىلى 78 جاسىندا ومىردەن وزعان اۋلەتتىڭ وتاعاسى وسپان باقوۆ ۇزاق جىل بويى قورعانتۇز ورتا مەكتەبىندە مۇعالىم, مەكتەپ ديرەكتورى بولىپ ابىرويلى ەڭبەك ەتكەن. وسپان مەن ءشامشيا 1959 جىلى شاڭىراق كوتەرىپ, جارتى عاسىردان استام ۋاقىت بويى ءومىردىڭ قيىندىعى مەن قۋانىشىن بىرگە بولىسكەن جاندار.
وسى اۋلەتتەن ورگەن بەس ۇل, بەس قىزدىڭ ءبارى بۇگىندە ءبىر-ءبىر ءۇيدىڭ وتاعاسى, وتاناسى اتانىپ, ەلىمىزدىڭ ءار تۇكپىرىندە قىزمەت ەتىپ ءجۇر. عاسىرعا جۋىق عۇمىر سۇرگەن كەيۋانا كەلىندەرىنىڭ اقىلشىسى. وتباسىلىق شارۋالاردا ۇلدارى دا اناسىنىڭ اق باتاسىنسىز ءىس باستامايدى. ۇلدارى مەن كەلىندەرى, قىزدارى مەن كۇيەۋ بالالارى اۋلەتتىڭ ىنتىماعى نىعايىپ, بەرەكەسى ارتۋىنا ءشامشيا انانىڭ ىقپالى كوپ بولعانىن ايتادى. كەيۋانا ءالى كۇنگە دەيىن نەمەرە-جيەندەرىنىڭ قامقورشىسى, نەمەرە كەلىندەرىنىڭ كەڭەسشىسى.
بۇل – مۇعالىمدەر اۋلەتى ءارى قازاقتىڭ ءان-كۇيىن قۇرمەتتەيتىن شاڭىراق. ويتكەنى ءشامشيا اجەيدىڭ ءتورت قىزى مەن ءبىر ۇلى مۇعالىمدىك ماماندىقتى تاڭداپ, وسى سالادا ابىرويلى ەڭبەك ەتىپ ءجۇر. ءبىر قىزىعى, وسپان اۋلەتىنىڭ نەمەرەلەرى مەن كەلىندەردىڭ دەنى ۇستازدىق جولدى تاڭداپتى. وسپان اتاي مەن ءشامشيا اجەيدىڭ تۇڭعىشى ۆەنەرا قازىر زەينەتكەر ۇستاز, قىرىق جىل مەكتەپتە ابىرويلى قىزمەت اتقارعان. ودان كەيىنگى مۇعالىمدەر تىزىمىندە جادىرا تۇر, ونىڭ ەڭبەك ءوتىلى – 35 جىل, باستاۋىش سىنىپ مۇعالىمى اندجەلا وسپانقىزىنىڭ ەڭبەك ءوتىلى – 28 جىل, ەدىل وسپان ۇلىنىڭ ەڭبەك ءوتىلى – 29 جىل, ءاليا وسپانقىزىنىكى – 22 جىل.
«مەرەيلى وتباسى» بايقاۋىنىڭ بيىلعى سايىسىندا وسپانوۆ اۋلەتىنىڭ ۇزدىك دەپ تانىلۋىنا اسەر ەتكەن بىرنەشە سەبەپ بولدى. سونىڭ ىشىندە ەڭ باستىسى – وسى اۋلەت مۇشەلەرىنىڭ سىيلاستىققا نەگىزدەلگەن شىنايى قارىم-قاتىناسى دەۋگە بولادى. كىشىسى-
ءنىڭ ەرەسەگىن قۇرمەتتەۋى, ءوزارا جاناشىرلىق, ورتاق ىسكە جۇمىلۋ, مەيىرىمدىلىك پەن ىزگىلىك, وتباسىنىڭ جازىلماعان قاعيداسى ەكەن.
اقتوبە وبلىسى
