ودان وندىرىلەتىن حروم كەنىنىڭ جالپى جوسپارلانعان كولەمى شامامەن – 600 مىڭ توننا. جوبا كومپانيانىڭ شاعىن كەن ورىندارىن دامىتۋ باعدارلاماسىنا كىرەدى. باعدارلاما فەرروقورىتپا زاۋىتتارىنا شيكىزاتتى تۇراقتى جەتكىزۋدى قامتاماسىز ەتىپ, نەگىزگى وندىرىستىك قۋاتتى ۇستاپ تۇرۋعا مۇمكىندىك بەرەدى.
«گەوفيزيكالىق-9» – سوڭعى ەكى جىلدا اشىلعان ءۇشىنشى كەنىش. كەن يگەرۋگە كىرىسپەس بۇرىن كەنشىلەر 4,8 ملن تەكشە ارشىلىم جۇمىستارىن ورىندايدى.
– گەولوگيالىق قىزمەت بۇرىن انىقتالعان كەن وشاقتارىنا تىڭعىلىقتى بارلاۋ جۇرگىزىپ جاتىر. بۇل – بولاشاقتاعى جۇمىس. كومپانيانىڭ شاعىن كەن ورىندارىن دامىتۋ باعدارلاماسى وندىرىستىك قۋاتتى ساقتاۋعا, تۇتاستاي العاندا 2022 جىلدان 2026 جىلعا دەيىنگى ارالىقتا وندىرىستىك كورسەتكىشتەردى ارتتىرۋعا مۇمكىندىك بەرەدى, – دەيدى ءدوڭ تاۋ-كەن بايىتۋ كومبيناتىنىڭ ديرەكتورى ازامات بەكتىباەۆ.
جاڭا كەن ورنى اشىق ادىسپەن يگەرىلەدى. ارشىلىم جانە يگەرۋ جۇمىستارىن ءدوڭ تاۋ-كەن بايىتۋ كومبيناتى – ء«دوڭ» كەنىشىنىڭ قىزمەتكەرلەرى ءوز كۇشىمەن اتقارادى.
تاعى ەكى كەن ورنى – «گەوفيزيكالىق-11» جانە «يۋنسكوە» دايىندىق ۇستىندە. ميلليون توننادان استام كەن قورى بار «گەولوگيالىق-1» يگەرىلىپ جاتىر. ءبىرىنشى كەزەڭدە, وسى جىلدىڭ جازىندا مۇندا 617 مىڭ توننا كەن ءوندىرىلدى. ەكىنشى كەزەڭىندە جەراستى قورلارى يگەرىلەدى. بۇل جەردەن تاعى 413 مىڭ توننا شيكىزات الۋ جوسپارلانىپ وتىر.
ءدوڭ تاۋ-كەن بايىتۋ كومبيناتى «وڭتۇستىك» كەنىشىنىڭ جەراستى قورلارى دا يگەرىلىپ جاتىر. سونىمەن قاتار تاعى ەكى شاعىن كەن ورنى №39 جانە «گەوفيزيكالىق-7»-گە قۇجاتتار دايىندالۋ ۇستىندە.
– ولار جەراستى ادىسىمەن يگەرىلەتىن بولادى. ايتا كەتۋ كەرەك, حرومتاۋ اۋدانىنداعى اۋقىمدى گەولوگيالىق بارلاۋ جۇمىستارى 2016 جىلدان باستاپ جۇرگىزىلىپ كەلەدى. 2025 جىلعا دەيىن كەزەڭ-كەزەڭىمەن جۇزەگە اسىرۋ جوسپارلانىپ وتىر. گەولوگيالىق بارلاۋدىڭ نەگىزگى مىندەتى – كەمپىرساي سىلەمىن زەرتتەۋ كەزىندە حروم كەندەرىنىڭ شالا زەرتتەلگەن ورىندارىن قايتا باعالاۋ جانە جاڭالارىن ىزدەۋ. بۇل رەتتە گەولوگيالىق دەرەكتەردى وڭدەۋدىڭ زاماناۋي تەحنولوگيالارى جانە وبەكتىلەردى مودەلدەۋ قۇرالدارى قولدانىلادى, – دەيدى شاعىن كەن ورىندارى بويىنشا جوبا جەتەكشىسى ۆيتالي گۋساروۆ.
