وڭىرلەردەن ءورىس الىپ, العىرلارى انىقتالىپ, باس قالادا بايقاۋ قورىتىندىسى شىعارىلادى. جەڭىمپاز وتباسىلاردىڭ قۇشاعى گۇلگە تولىپ, شاھارىنا شاتتىقپەن اتتانادى. ەلوردادا دا «مەرەيلى وتباسى-2022» ۇلتتىق بايقاۋىنىڭ قالالىق كەزەڭى ءوتىپ, جۇلدەگەرلەر ماراپاتتالدى.
ۇيىمداستىرۋشىلاردىڭ سوزىنە قاراعاندا, بايقاۋعا ءوتىنىم بەرۋ ماۋسىم ايىنىڭ ورتاسىنان باستاپ جۇرگىزىلدى.
«بايقاۋ قاتىسۋشىلارىنىڭ سانى جىلدان-جىلعا ارتىپ كەلەدى. ماسەلەن, 2018 جىلى بايقاۋ كوميسسياسىنىڭ قاراۋىنا 51 ەلوردالىق وتباسى ءوتىنىم بەرسە, بيىل 151 وتباسى قاتىسۋعا نيەت بىلدىرگەن. بايقاۋدىڭ باستى ماقساتى – وتباسىلىق قۇندىلىقتاردى دارىپتەۋ, وتباسى ينستيتۋتىنىڭ مارتەبەسىن ارتتىرۋ, نەكەنىڭ ماڭىزدىلىعىن ءتۇسىندىرۋ, اتا-انالاردىڭ بالا تاربيەسىندەگى جاۋاپكەرشىلىگىن ارتتىرۋ, قازاق حالقىنىڭ وتباسىلىق تاربيەسىن ۇلتتىق قۇندىلىق رەتىندە جانداندىرىپ, ونى ءاربىر وتباسىنا ەنگىزۋ», دەيدى ءىس-شارانى ۇيىمداستىرۋشىلار.
بايقاۋ اقپارات جانە قوعامدىق دامۋ مينيسترلىگى, جەرگىلىكتى اتقارۋشى ورگاندار, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن ۇيىمداستىرىلىپ وتىر.
ەلوردادا وتكەن بايقاۋ جەڭىمپازدارىن نۇر-سۇلتان قالاسى اكىمىنىڭ ورىنباسارى ەسەت بايكەن مەن قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ, پرەزيدەنت جانىنداعى ايەلدەر ىستەرى جانە وتباسىلىق دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى سالتانات تۇرسىنبەكوۆا ماراپاتتادى.
كوميسسيا شەشىمىمەن ۇلتتىق بايقاۋدىڭ قالالىق كەزەڭىنىڭ جەڭىمپازى ساعيتوۆتار وتباسى بولدى. شاڭىراق كوتەرگەندەرىنە 13 جىل بولعان دۋلات پەن ايناگۇل التى بالا تاربيەلەپ وتىر. وتاعاسى مۇمكىندىگى شەكتەۋلى جاندارعا ارنالعان پاراليمپيادالىق جاتتىعۋ ورتالىعىندا جانە «استانالىق تسيرك» مكك ديسپەتچەرى بولىپ جۇمىس ىستەيدى. زايىبى ايناگۇل ساعيتوۆا – «Mega Road» جشس كادرلار ءبولىمىنىڭ باستىعى. قىزدارى رەسپۋبليكالىق بي جارىستارىنا قاتىسىپ, جۇلدەلى ورىندارعا يە بولسا, ۇلكەن ۇلى «استانا» حوككەي كلۋبىندا سپورتتىق مانسابىن باستاعان.
«تۇڭعىش بالامىز دۇنيەگە كەلگەندە ۇلكەن سىناقتان وتتىك. بەرەكە-بىرلىكتىڭ ارقاسىندا ونى جەڭىپ شىقتىق. تاتۋلىعى جاراسقان وتباسىندا قاشاندا بەرەكە بولادى. سونى ەستە ۇستاعان ءجون. بۇل بايقاۋدىڭ بەرەرى مول. وتباسى مۇشەلەرىن ىنتىماققا, بىرلىككە شاقىرادى. وسىنداي بايقاۋلار ءجيى بولىپ تۇرعانى دۇرىس دەپ ويلايمىز. جەڭىمپاز بولىپ جاتقانىمىزعا وتە قۋانىشتىمىز. قالا اكىمدىگىنە ريزاشىلىعىمىزدى بىلدىرەمىز», دەدى ساعيتوۆتار وتباسى.
ەكىنشى ورىندى ولجاباەۆتار مەن اۋەلوۆتەر وتباسى ءوزارا ءبولىستى. تالعات ولجاباەۆ پەن زايىبى اسەل ەكەۋى دە الەۋمەتتىك قورعاۋ سالاسىندا نۇر-سۇلتان قالاسى اكىمدىگىنىڭ «قامقور» الەۋمەتتىك قىزمەت كورسەتۋ ورتالىعىندا ەڭبەك ەتەدى. ولار بۇگىندە 7 بالا تاربيەلەپ وتىر. ال وتاسقاندارىنا 20 جىل بولعان اۋەلوۆتەر وتباسى 10 بالانىڭ اتا-اناسى. ال ءۇشىنشى ورىن ايتقۇلوۆتار مەن جۇنىسبەكوۆتەر وتباسىنا بۇيىردى.
«وتاندى ءسۇيۋ وتباسىنان باستالادى» دەگەن ماقالدى ءجيى قولدانامىز. ونىڭ قادىر-قاسيەتىن ارتتىرىپ, قاسىڭىزدا جۇرگەن اياۋلى اناڭىز بەن ارداقتى اكەڭىزدى بار كەزىندە باعالاۋعا دارىپتەيتىن ءداستۇرلى بايقاۋدىڭ الار ورنى ايرىقشا ەكەنى انىق. سول سەبەپتى يگىلىككە جەتەلەيتىن, وتباسىنا دەگەن جاناشىرلىقتى دارىپتەيتىن جارىس جالعاسا بەرسە دەيمىز.
