FIRST وقۋ-اعارتۋ مينيسترلىگى وقۋشىلار مەن مۇعالىمدەرگە قاتىسۋعا ۇسىنعان وليمپيادالار تىزىمىنە كىرەدى. روبوتتەحنيكا چەمپيوناتى – الەمدەگى ەڭ بەدەلدى جارىستاردىڭ ءبىرى. جارىس جەڭىمپازدارىنا الەمنىڭ جەتەكشى ۋنيۆەرسيتەتتەرىنە تۇسۋگە مۇمكىندىك بەرەدى. جەنەۆادا روبوتتەحنيكادان وتكەن «First global challenge» الەم جارىسىندا جەڭىسكە جەتىپ, رەكورد ورناتۋ – ەكىنىڭ ءبىرىنىڭ قولىنان كەلە بەرمەيتىن ءىس. 167 ەلدىڭ جاسوسپىرىمدەرىمەن سىنعا ءتۇسىپ, ەڭ كوپ ۇپاي جيناعان قازاقستاندىق وقۋشىلارمەن وقۋ-اعارتۋ ءمينيسترى اسحات ايماعامبەتوۆ تەلەفون ارقىلى بايلانىسقا شىعىپ, جەڭىستەرىمەن قۇتتىقتادى.
«وقۋشىلارىمىزدى جەتكەن جەتىستىكتەرىمەن قۇتتىقتايمىن! الداعى ۋاقىتتا دا بيىك بەلەستەردى باعىندىرا بەرۋگە تىلەكتەسپىن! رەسپۋبليكا كۇنى قارساڭىندا ءبىزدى جاقسى جاڭالىقپەن قۋانتتىڭىزدار. ءوز جەتىستىكتەرىڭىز ارقىلى باسقا بالالاردى ىنتالاندىراتىندارىڭىزعا سەنىمدىمىن. سونداي-اق قولداۋ كورسەتكەن مۇعالىمدەرگە, جەتەكشىلەرگە جانە دارىندى بالالاردىڭ اتا-انالارىنا العىس ايتامىن», دەدى مينيستر.
ەل نامىسىن ۇلتتىق قۇراما اتىنان 15 پەن 17 جاس ارالىعىنداعى 5 وقۋشى قورعاپ, ولاردىڭ بارلىعى FIRST Global Challenge ۇلتتىق ءتۋرنيرىنىڭ جەڭىمپازدارى اتاندى. ياعني وقۋشىلارىمىز ءۇش كۇن ىشىندە 16 ويىن وتكىزىپ, ەشقايسىسىنان مۇدىرمەي, ۇپاي سانى بويىنشا رەكورد ورناتتى. چەمپيوناتتاعى ءبىرىنشى ورىننان بولەك, قازاقستاندىق كوماندا باسقا ەلدەردىڭ كوماندالارىنا كورسەتكەن «ايرىقشا قولداۋى ءۇشىن» Al-Khwarizmi التىن مەدالىن, سونداي-اق روبوتتى جاساۋداعى تاماشا ينجەنەرلىك شەشىمدەرى ءۇشىن JUDGES AWARD ارنايى سىيلىعىن دا جەڭىپ العانىن ايتا كەتكەن ءجون.
وقۋ-اعارتۋ مينيسترلىگى بالالاردىڭ تسيفرلىق ءبىلىمى مەن داعدىلارىن جەتىلدىرۋىنە مۇمكىندىكتەر جاساۋدى جالعاستىرا بەرەتىنىن, سوڭعى ءۇش جىلدا ەلىمىزدە 41 IT-مەكتەپ اشىلىپ, وندا 55 مىڭ بالا وقىپ جاتقانىن جانە ءبىلىم الۋشىلارعا ارنالعان ارنايى ءبىلىم بەرۋ باعدارلامالارى ازىرلەنىپ, ولار دا تسيفرلىق ءبىلىمدى دامىتۋعا باعىتتالعانىن العا تارتادى.
پرەزيدەنت قاسىم-جومارت توقاەۆ ءبىلىم بەرۋ سالاسىنداعى تسيفرلاندىرۋعا ەرەكشە كوڭىل بولگەنى بەلگىلى. ياعني ءىت-مەكتەپتەردىڭ ەرەكشەلىگى – ءىت-تەحنولوگيالار سالاسىندا ماماندانۋ, ەرتە پروفيلدەۋ, روبوتتەحنيكا مەن باعدارلامالاۋدى تەرەڭدەتىپ وقىتۋ, 3D مودەلدەۋ. سونداي-اق جىل سايىن IT-مەكتەپتەر سانىن كوبەيتۋ جونىندە تاپسىرمالار بەرگەن بولاتىن.
وقۋشىلارىمىزدىڭ بۇل جەڭىسى راسىندا ەل جەڭىسى. بيىلعى شىلدە ايىندا ۇلتتىق قۇراما بريتاندىق FIRST Tech Challenge UK and Ireland ماۋسىمنان تىس ەكى وليمپياداسىنا قاتىسىپ, جەڭىمپاز اتانعانىن ايتا كەتەلىك. ول جارىستا وقۋشىلارىمىز 20 ويىننىڭ 19-ىندا رەكوردتىق ۇپايمەن جەڭىسكە جەتىپ, جارىستىڭ ءابسوليۋتتى رەكوردىن ورناتقان بولاتىن. سونىمەن بىرگە بالالارىمىز قازىلار القاسىنىڭ ءۇش نوميناتسياسىنا بىردەن يە بولعان ەدى.
بىلەكتىڭ ەمەس, ءبىلىمنىڭ زامانىندا الەمدىك دەڭگەيدە رەكورد ورناتىپ, توپ جارىپ جۇرگەن وقۋشىلارىمىز ءتىل-كوزدەن امان بولعاي. ء«بىلىمدى ۇرپاق – ۇلت بولاشاعى» دەمەكشى, ەگەمەندى ەلىمىزدىڭ ەرتەڭگى ءۇمىتىن اقتايتىن, تاۋەلسىزدىگىمىزدى كوزىنىڭ قاراشىعىنداي ساقتايتىن ءبىلىمدى ۇرپاق بولسا, مىنە, وسىنداي بولۋى كەرەك!
