سۋرەتتەردى تۇسىرگەن دميتري ەروفەەۆ
قاراتال اۋدانى اكىمدىگىنىڭ مالىمەتىنە سۇيەنسەك, اۋداندا 24 800 گەكتار سۋارمالى ەگىستىك بولسا, سونىڭ 8 مىڭ گەكتارى – ءداندى داقىل. بىلتىر كۇرىش 800 گەكتارعا ەگىلسە, بيىل 950 گەكتاردان ءونىم جينالدى. جەر ىڭعايى مەن كليماتتىق ەرەكشەلىگىنە قاراي ءداندى داقىلدىڭ وسى تۇرىمەن مۇندا 3 ءىرى شارۋاشىلىق جانە ونعا جۋىق شاعىن شارۋا قوجالىعى اينالىسادى.
قاراتالداعى كۇرىش وسىرۋمەن اينالىساتىن ءىرى فەرمەرلەردىڭ ءبىرى – «ۇشتوبە» جشس. ونىڭ ديرەكتورى – ارمان احمەتباەۆ. جيىرما جىلدان استام ۋاقىتتان بەرى ەگىنشىلىكتى كاسىپ ەتكەن شارۋاشىلىقتىڭ 1 351 گەكتار جەرى بار. وندا مايبۇرشاق, ءداندى داقىلدار مەن مال ازىعى ەگىلەدى. بيىل كۇرىشتى 260 گەكتارعا سەۋىپ, ودان 1 100 توننادان استام ءدان جينادى. ءونىمنىڭ ورتاشا شىعىمى گەكتارىنا 40 تسەنتنەردى قۇراپ وتىر.
«بۇرناعى جىلدارعا قاراعاندا, بيىل سۋ جەتكىلىكتى, اۋا رايى دا قولايلى بولدى. سوعان قاراي ءونىم جاقسى شىقتى. قازىر جيىن-تەرىن ناۋقانى اياقتالىپ قالدى. داقىلدى ساباعىنان كەسەمىز, ءبىر اپتاداي القاپتا كۇن استىندا جاتىپ قۋراعان سوڭ كۇرىش ءدانى جينالادى. سوسىن قويماعا اپارىپ باستىرامىز. سەرىكتەستىكتىڭ تسەحىندا قاپتاپ, نارىققا جونەلتەمىز. ءونىمىمىز نەگىزىنەن جەرگىلىكتى تۇرعىندارعا ساۋدالانادى, جەتىسۋ مەن الماتى وبلىسىنىڭ ساۋدا ورىندارىنا جىبەرىلەدى», دەيدى سەرىكتەستىك ديرەكتورى ا.احمەتباەۆ.
ونىڭ ايتۋىنشا, كۇرىش القابىندا اۋىسپالى ەگىس تالابى قاتاڭ ساقتالادى. وسى ماقساتتا كۇرىش بىلتىرعا قاراعاندا بيىل ازايتىلىپ, 260 گەكتارعا ەگىلسە, كەلەسى جىلى ونىڭ كولەمى قايتادان 500 گەكتارعا جەتكىزىلەدى.
اۋدانداعى كۇرىش باعىتىنداعى سەرۆيستىك دايىنداۋ ورتالىعى وسى شارۋاشىلىق بازاسىندا, ياعني وندا جاڭا 11 اۋىل شارۋاشىلىعى تەحنيكاسى شوعىرلانعان. ال جالپى, سەرىكتەستىكتىڭ وزىندە 6 كومباين, 23 تراكتور بار. شارۋاشىلىقتا 18 ادام جۇمىس ىستەيدى.
«بىزدە كۇرىشتىڭ قىزىلوردالىق «يانتار» جانە يراندىق «كۋسار» سۇرىپتارى ەگىلەدى. بۇل ەكى سورتقا بەلگىلى سەبەپپەن توقتالدىق. اۋدانىمىز سالىستىرمالى العاندا سولتۇستىك ايماقتا ورنالاسقاندىقتان جانە قاراتال وزەنىنىڭ باسىندا وتىرعاندىقتان, القاپ سۋاراتىن سۋ جىلىپ ۇلگەرمەيدى. ءبىزدىڭ وسىنداي ەرەكشەلىگى بار كليماتىمىزعا وسى ەكى سورت قولايلى. ءونىم ساپاسىن تومەندەتىپ الماۋ ءۇشىن ەكى جىلدا ءبىر رەت تۇقىمدى جاڭارتىپ وتىرامىز. ءوزىم زەينەتكە شىققانمىن, بىراق شارۋاشىلىققا كومەكتەسىپ, تاجىريبەمدى جاستارعا ۇيرەتىپ كەلەمىن», دەيدى سەرىكتەستىكتىڭ اگرونومى ۆيلوري تسوي.
جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, مەملەكەتتەن تۇقىمعا, تىڭايتقىشتارعا, گەربيتسيدكە بەرىلەتىن سۋبسيديا شارۋالارعا ەداۋىر كومەك بولعان. وعان قوسا اۋدانعا كوكتەمگى جانە كۇزگى جيىن-تەرىنگە 800 توننا ارزانداتىلعان ديزەل وتىنى بولىنسە, سونىڭ 80 تونناسىن وسى «ۇشتوبە» جشس كادەسىنە جاراتقان. وسى رەتتە بيىل وبلىستا اۋىل شارۋاشىلىعىن قولداۋعا 27,9 ملرد تەڭگە بيۋدجەت قاراجاتى بولىنگەنىن, ونىڭ 23,2 ملرد تەڭگەسى سۋبسيدياعا جۇمسالعانىن اتاپ وتۋگە بولادى.
ايتا كەتەيىك, قاراتال اۋدانىندا 1 183 اۋىل شارۋاشىلىعى تاۋار ءوندىرۋشىسى بار, سونىڭ 400-ءى ەگىنمەن, 450-ءى مال وسىرۋمەن اينالىسادى. وعان قوسا 333 ارالاس شارۋاشىلىق پەن 12 جاۋاپكەرشىلىگى شەكتەۋلى سەرىكتەستىك تىركەلگەن.
جەتىسۋ وبلىسى,
قاراتال اۋدانى
