بۇقار جىراۋ اتىنداعى ادەبيەت جانە ونەر مۋزەيىنىڭ نەگىزگى قىزمەت باعىتى – جادىگەرلەردى زەرتتەۋ, جيناقتاۋ, ناسيحاتتاۋ. وسى مىندەتتى اتقارۋ بارىسىندا قىزمەتكەرلەر كوپتەگەن قيىندىقتارعا كەزدەسىپ كەلگەن ەكەن. سونىڭ ءبىرى – قولجازبالارمەن جۇمىس ىستەۋ بارىسىندا توتە جازۋدى وقي الماۋ. سول سەبەپتى ماماندار اقاڭنىڭ توتە جازۋ الىپپەسىن وقۋدى باستادى. ساباق اپتاسىنا ءبىر رەت وتەدى. وقىتۋشى پاۆلودار پەداگوگيكالىق ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى ادىلبەك امىرەنوۆ.
– ءبىزدىڭ مۋزەيىمىزدە اراب قارپىندە توتە جازۋمەن جازىلعان 20-دان اسا كىتاپ جانە قادىم جازۋىمەن تۇسىرىلگەن ءبىراز كونە قولجازبالار ساقتالىپ تۇر. توتە جازۋلاردىڭ باسىم بولىگى وقىلىپ, تۇسىنىكتەرى بەرىلگەن. ال قادىم جازۋلاردىڭ انىقتامالارى بار بولعانىمەن, وقىلماعان. ماسەلەن, توتە جازۋداعى قامار قاسىموۆتىڭ قولجازبالارى, ديحان ابىلەۆ بابامىزدىڭ حاتتارى, قولجازبالارى, ءتىپتى ءبىزدىڭ قورىمىزدا مۇلدە اشىلماعان ەسكى جازۋلار دا كەزدەسىپ وتىر. لاتىن ارپىندە ءسابيت دونەنتاەۆتىڭ جازبالارى, يسا بايزاقوۆتىڭ قويىن داپتەرى دە ساقتالىپ قالعان. وسى جادىگەرلەردىڭ بارلىعىن مۋزەي قىزمەتكەرلەرى وقىپ, تاني ءبىلۋى كەرەك دەگەن ماقسات قويىپ وتىرمىز. ءبىزدىڭ قىزمەتىمىز مۋزەيدە ءتۇرلى كەشتەر وتكىزۋمەن عانا شەكتەلمەيدى. ەڭ باستىسى, ءار مامانىمىز جادىگەرلەردى جيناقتاپ قانا قويماي, ولاردى زەرتتەپ, ناسيحاتتاۋ جۇمىستارىمەن دەربەس شۇعىلدانا الاتىن دەڭگەيگە جەتۋى كەرەك, – دەيدى مۋزەي باسشىسى ەربول قايىروۆ.
قازىرگى كۇنى مادەني مەكەمە ماماندارى اۋىل-اۋىلداردى ارالاپ, ءتۇرلى قولجازبالاردى جيناستىرىپ, كوپتەگەن كونە قارىپتەرمەن جازىلعان كىتاپتاردى تاۋىپ جاتىر. جاز بويى جۇرگىزىلگەن ءتۇرلى ەكسپەديتسيالار مەن ولكەتانۋ شارالارى ءوز جەمىسىن بەرگەن سىڭايلى. ەندى بۇل جادىگەرلەردى مۋزەي مايتالماندارى اسىقپاي زەرتتەپ, كەيىن كوپشىلىككە ۇسىنادى. كەيبىر تۇرعىندار ءوز ۇيىندە جىلدار بويى ساقتاپ كەلگەن كونە كىتاپتارى مەن قولجازبالارىن مۋزەيگە تاپسىرماس بۇرىن مەكەمە ماماندارى اۋەلى كەلىپ, وقىپ كورسە دەگەن ءوتىنىش ايتادى ەكەن. وسىنداي ۋاقىتتا قينالىپ قالامىز دەيدى ەربول ءماتى ۇلى.
ايتىپ وتەيىك, جاقىندا مۇندا احمەت بايتۇرسىن ۇلىنىڭ «ماسا» كىتابىنىڭ تۇپنۇسقاسى تابىلدى. اراب ارپىندە, توتە جازۋمەن تەرىلىپ باسىلعان كونە كىتاپتى اققۋلى اۋدانىنىڭ تۇرعىنى اكەپ تاپسىرعان ەكەن. ءۇي ۇلكەندەرى ونى قۇران دەپ ويلاپ, ساقتاپ كەلسە كەرەك. ۇلت ۇستازىنىڭ 150 جىلدىق مەرەيتويىندا بۇل ۇلكەن جاڭالىقتىڭ ءبىرى بولدى.
پاۆلودار
