جيەنحان اعامىز قازاق ەلىندە ازاتتىقتىڭ اق تاڭى جارقىراي اتقاندا موڭعوليادان بەرى اعىلعان ۇلى كوشتىڭ الدىڭعى لەگىندە كەلگەن ازاماتتىڭ ءبىرى ەدى. پاۆلودار وبلىسىنا قونىستانعان بەتتەن-اق ۇلتتىق قۇندىلىق, قوعام ماسەلەسى دەگەن دۇنيەلەرگە بەلىن بۋىپ ارالاسىپ كەتتى. ەڭ اۋەلى ەل-جۇرتى ونى ۇلگىلى ۇستاز, تالىمگەر, ون ساۋساعىنان ونەر تامعان شەبەر رەتىندە تانىدى. تالاي جىلعى ەڭبەگىنىڭ ارقاسىندا «پاۆلودار وبلىسىنىڭ ۇزدىك قولونەر شەبەرى», «التىن قولدى شەبەر» اتاقتارىن يەلەندى. وبلىستىق, رەسپۋبليكالىق قولونەر شەبەرلەرىنىڭ بايقاۋىندا تالاي مارتە توپ جارىپ, ايماقتىڭ اتىن وزدىردى. 1993 جىلدان مەكتەپتە مۇعالىمدىك جولىن باستاپ, ءومىرىنىڭ سوڭىنا دەيىن قازىرگى ءمامايىت وماروۆ اتىنداعى اۋىلدىڭ جامبىل اتىنداعى ورتا مەكتەبىندە تەحنولوگيا پانىنەن ساباق بەردى.
ول ىزدەنىمپاز, جاڭاشىل ۇستاز ەدى. ماسەلەن, اسىق ويىندارىنىڭ 20-دان استام ءتۇرىن, قامشى ءورۋدىڭ 24 ءتۇرىن تەرەڭ زەرتتەپ, قاعازعا ءتۇسىرىپ جۇيەلەدى. ونىسىن وسكەلەڭ ۇرپاققا ۇيرەتىپ, جۇرگەن جۇرىندە ۇنەمى ۇلتتىق قۇندىلىقتاردى ناسيحاتتادى. ءبىر جىلى جيەنحان اعا ەلدەن جيناپ ءجۇرىپ, 3 مىڭ اسىقتان تۇراتىن كوللەكتسيا جاسادى. الگى اسىقتارىنىڭ بارلىعىن ەرىنبەي-جالىقپاي بوياپ, مەكتەپتەر مەن بالاباقشالارعا ۇلەستىردى, ءوز ءادىس-تاسىلدەرىمەن ءبولىستى. ول قاراپايىم قوي اسىعىنان 13 ءتۇرلى قۇرال ويلاپ تاپتى: ساناماق, ماسساج جاسايتىن قۇرىلعى, ءتۇس اجىراتقىش, دويبى, اتقىش, سىلدىرماق جانە تاعى باسقا قولونەر تۋىندىلارىنىڭ بارلىعى مەكتەپ باعدارلاماسىندا كەڭىنەن پايدالاندى. تالىمگەر رەتىندە مۇنىڭ بارلىعىن ۇستازدارعا ارنالعان سەميناردا كورسەتىپ, تاجىريبەسىن كەڭىنەن تاراتتى. وسى ەڭبەگى باعالانىپ, وعان 2017 جىلى «اسىق ويناۋ ادىستەرى» بويىنشا ليتسەنزيا بەرىلگەنى دە ءمالىم.
اعامىز قوعامدىق ماسەلەلەرگە كەلگەندە ءوز ويىن اشىق ايتاتىن, ەلدىڭ ءسوزىن سويلەيتىن تۇلعا بولدى. اۋىل-وڭىردەگى ءتۇيىندى تۇيتكىلدەردى جەرگىلىكتى «اقجول», وبلىستىق «سارىارقا سامالى» گازەتتەرىندە كەڭىنەن كوتەرىپ, قوعامداعى كەمشىلىكتەردى ءدوپ باسىپ كورسەتە ءبىلدى. ءار ماسەلەنىڭ شەشىمىن ىزدەۋگە تىرىساتىن. اقسۋداعى ەرماك ەسكەرتكىشىن الۋ, شاھار اتاۋىن وزگەرتۋ, مەشىت ىرگەسىن كوتەرۋ, قازاق سىنىپتارىن اشۋ, ءوندىرىس ورىندارىنداعى قازاق جاستارىنىڭ ازدىعى, قازاق بالالارىنىڭ انا تىلىندە تاربيەلەنۋى, جەر-سۋ اتاۋلارىن قازاقشالاندىرۋ سياقتى سالماعى ءزىل باتپان ماسەلەلەرگە ارالاسىپ, بۇل جايىندا كوپتەگەن ماقالا جاريالادى.
جيەنحان قامانايدى ءوز ورتاسىنان ەرەكشەلەپ تۇراتىن قاسيەتىنىڭ ءبىرى – ەنتۋزيازمعا شەكتەن تىس بەرىلگەندىگى ەدى. ۇلتتىق ونەر تۇرلەرىن ءتىرىلتىپ, ءوز الدىنا ءىس باستاعاندا قازىناعا الاقان جايىپ, تىلەنگەنىن كورمەپپىز. بارلىق دۇنيەنى ءوز كۇشىمەن, مەكتەپتەگى شاكىرتتەرىن جۇمىلدىرا ءجۇرىپ جۇزەگە اسىردى. تەرى يلەۋ, قايىس ءتىلۋ تەحنولوگياسىن بۇل وڭىردە ودان ارتىق يگەرگەن جان بولماعانىن مويىنداۋعا تۋرا كەلەدى. ورگەن ءتۇرلى قامشىلارىنا: اساۋ قامشى, قىزقۋار قامشى, دودا قامشى, بوزبالا قامشى, بايگە قامشى, دۇرە قامشى, جىلان باۋىر قامشى, سارىالا قامشى جانە تاعى باسقا قامشىلارعا ماتەريالدى ءوزى دايىندايتىن. 2018 جىلى اقسۋ وڭىرىندە العاشقى «رۋحاني جاڭعىرۋ» كابينەتى وسى جامبىل ورتا مەكتەبىندە اشىلدى. بۇل يدەيانى جۇزەگە اسىرۋعا ۇلاعاتتى جان ءوزى باس-كوز بولىپ, ءتول تۋىندىلارىن ويلانباستان الگى كابينەتكە اپارىپ ورنالاستىردى. مال سۇيەگىنەن جاسالعان, كوزدىڭ جاۋىن الاتىن ءتۇرلى-ءتۇستى ويىن قۇرالدارى مەن سامساعان اسىقتار, قامشى تۇرلەرى, اڭ تەرىلەرى, وزگە دە ۇلتتىق ونەر جادىگەرلەرى كورگەن ادامدى تامسانتپاي قويمايدى. وسى ەڭبەگى ەسكەرىلىپ, اعامىز دۇنيەدەن كوشكەن سوڭ كابينەتكە جيەنحان قامانايدىڭ ەسىمى بەرىلدى.
كوركەم مىنەزدى, اينالاسىنا شۋاق شاشقان جاننىڭ ارتىندا قالعان ۇل-قىزدارى, تۋىس-تۋعاندارى جاقىندا جارقىن تۇلعانىڭ كوزى تىرىسىندە جازعان ماقالالارى مەن تانىمدىق دۇنيەلەرىنەن, مەكتەپ وقۋشىلارىنا ارنالعان ادىستەمەلەرى مەن ولەڭدەرىنەن تۇراتىن «اكە ارمانى» اتتى قوس كىتاپ قۇراستىرىپ, باسىپ شىعارعان ەكەن. كىتاپتىڭ تۇساۋكەسەر شاراسىنا اقسۋ قالاسىنىڭ دامۋىنا ۇلەس قوسقان ەل ۇلكەندەرى, «قاعاندىق» قوعامدىق بىرلەستىگىنىڭ توراعاسى ەركەعالي جانعازى, قالالىق ءبىلىم بەرۋ ءبولىمىنىڭ باسشىسى قايرات سماعۇلوۆ جانە تاعى دا باسقا تانىمال ازاماتتار قاتىستى. قازاقستان جازۋشىلار وداعىنىڭ مۇشەسى اقىن الاقان ۇلى مەن ارداگەر ۇستاز قانات قاسىموۆ, اقسۋدىڭ قۇرمەتتى ازاماتى سۆەتلانا قوندىكەروۆا, جامبىل ورتا مەكتەبىنىڭ ديرەكتورى بيجامال اقتاەۆا جانە تاعى باسقالارى ۇلاعات يەسى جايىندا جارقىن ەستەلىكتەرىمەن ءبولىستى. جيەنحان اعانىڭ ۇلى التايحان مەن كەلىنى گۇلبانۋ كەلگەندەرگە العىسىن جەتكىزىپ, كىتاپتا اكەسىنىڭ شىعارماشىلىعىنىڭ ءبىراز بولىگى توپتاستىرىلعانىن جەتكىزدى. ال ۇستازدىڭ نەمەرەلەرى اتاسىنىڭ ولەڭدەرىن وقىپ, ناعاشى اتاسى, ەل اقساقالى دوربەتحان امىرە ۇلىنىڭ باتاسىن الدى.
پاۆلودار وبلىسى,
اقسۋ قالاسى,
ءمامايىت وماروۆ اۋىلى
