باياناۋىلدا جىلدىڭ ءتورت مەزگىلىندە دە جۇمىس ىستەيتىن دەمالىس ۇيلەرىنىڭ جوقتىعى تۋرالى ماسەلە ءجيى كوتەرىلەدى. جازعى سۋعا ءتۇسۋ كەزەڭىندە عانا اقشا تابۋدى قۇپ كورەتىن جەرگىلىكتى قالتالى كاسىپكەرلەر بۇعان باس اۋىرتا قويمايتىنىن دا بايقايتىن ەدىك. ءارى مۇندا اعزانى ساۋىقتىرۋمەن اينالىساتىن ورتالىقتار دا جوقتىڭ قاسى. تۋريستەر كورىكتى مەكەننىڭ سۇلۋ تابيعاتىن تاماشالاپ, شيپالى اۋاسىن جۇتىپ قانا قايتادى. ال قىستا بۇل اۋماققا باراتىندار نەكەن-ساياق. سەبەبى كەلۋشىلەردىڭ كوزىن اۋلاپ, دەنساۋلىعىن نىعايتۋعا شاقىراتىن مەكەمەلەر قىزمەت كورسەتپەيدى. وسىعان وراي, بايان جەرىندەگى تۋريزم دە العاشقى ايازبەن «قاتىپ» قالاتىنى شىن.
بۇل ولقىلىقتىڭ ورنىن تولتىرۋعا «تۇلپار-2021» جشس قۇلشىنىپ وتىر. كاسىپورىن ديرەكتورى ارسلان وماروۆتىڭ سوزىنە سۇيەنسەك, سابىندىكول جاعاسىندا جىل بويى ىستەيتىن دەمالىس ورنى سالىنا باستاعان. جوبادا اعزانى ساۋىقتىرۋ كەشەنى دە قاراستىرىلعان. «سابىندىكول پلازا» دەپ اتالاتىن بولاشاق دەمالىس ايماعىندا كەلۋشىلەر ءۇشىن بارلىق جاعداي جاسالادى دەپ كۇتىلۋدە.
– قۇجات ماسەلەلەرى شەشىلگەن سوڭ اۋماقتى تولىق قورشادىق. كەلەسى جىلى قوناقۇي مەن ساۋىقتىرۋ كەشەنىن سالا باستايمىز. مۇندا ۆولەيبول, فۋتبول, بالالار الاڭدارى بولادى. تەننيس پەن بيليارد الاڭىن دا اشپاقپىز. جازعى ءدامحانا, ودان بولەك, مانگال ءمۇيىسى جۇمىس ىستەيدى. قۇرىلىس اياقتالعاندا دەمالىس ورنىندا 50 بولمەسى بار قوناقۇي, 15 جەكە دەمالىس ءۇيى قىزمەت كورسەتەدى. بارلىعى 250 ادامدى جاتار ورىنمەن قامتۋعا مۇمكىندىك بار, – دەيدى ول.
ساۋىقتىرۋ كەشەنى قاسيەتتى ولكەگە ادامداردى كوپتەپ تارتۋ ءۇشىن سالىنباق. بۇعى ءمۇيىزىنىڭ قانىمەن ەمدەۋ جۇرگىزىلەتىن پانتا ۆاننالارىن قۇرىپ, پاۆلودارداعى مويىلدىدان شيپالى بالشىقتى الدىرۋ جوسپارلانۋدا. وسىلايشا, باياناۋىلدىڭ تۋريزم سالاسى تەك جازعى مەزگىلدە قىزمەت كورسەتەدى دەگەن تۇسىنىك جويىلماق. دەمالۋشىلاردى جىل بويى قابىلداۋ بيزنەس ءۇشىن دە ءتيىمدى.
كولگە سارقىندى سۋلاردى جىبەرمەۋ ءۇشىن دەمالىس ايماعىندا كارىز جۇيەسىن سالۋ دا جوبالانعان. ونىڭ قۇرىلىسى بارىسىندا ىلە الاتاۋى ۇلتتىق پاركىندەگى تەحنولوگيالار قولدانىلماق. ياعني قالدىق سۋلار قايتا وڭدەلىپ, سۋارۋعا جىبەرىلەدى. ال دەمالىس ۇيلەرى مەن ساۋىقتىرۋ كەشەنىن جىلىتۋعا گاز پايدالانىلماق. وسىلايشا, كاسىپكەر ەكولوگيالىق تۇرعىدان تازا دەمالىس ورنىن قۇرۋعا ارەكەتتەنۋدە.
اتاپ وتەرلىگى, «سابىندىكول پلازادا» جەرگىلىكتى جەردەن شامامەن 40-50 ادام جۇمىس تابادى دەپ بولجانىپ وتىر. قۇرىلىس جۇمىستارى 2024 جىلى تولىق تاپسىرىلادى. دەمالىس ورنى دايىن بولعاندا جىلىنا كەمى 4-5 مىڭ ادامدى قابىلداي الادى.
تاعى ءبىر ەرەكشە نىسان اتالعان اۋدانعا قاراستى تورايعىر كولىنىڭ ماڭىندا تۇرعىزىلۋدا. «جاسىرىن ءۇي» دەپ اتالاتىن دەمالىس ورنى كوزگە تۇسپەيتىن تابيعات تاساسىندا ءارى قولايلى جەردە ورنالاسقان. اۋداندىق دەنە شىنىقتىرۋ, سپورت جانە تۋريزم ءبولىمىنىڭ باسشىسى زەينوللا ءتالىپوۆتىڭ ايتۋىنشا, «سولتانوۆ» جەكە كاسىپكەرلىگى بىلتىر تورايعىر اۋىلدىق وكرۋگىندە ورنالاسقان ءبىر قاباتتى, اۋماعى 140 شارشى مەتر تۇرعىن ءۇيدى ساتىپ العان. كاسىپكەر ارقايسىسى سەگىز ورىندى ەكى ءمودۋلدى ءۇي سالىپ, 35 توسەكتىك ورىننان تۇراتىن كورپۋستى قايتا جاڭعىرتۋدا. ينۆەستيتسيا كولەمى 100 ملن تەڭگەنى قۇرادى. كاسىپ يەسى ەرمەك سولتانوۆ بۇعان قوسا كول جاعاسىندا ەكى قاباتتى قوناقۇي مەن ەكى كەمپينگ تۇرعىزىپ جاتقانىن دا جەتكىزدى.
– بۇل اۋماقتا بۇرىن ەشبىر قۇرىلىس بولماعان. قازىر اۋىز سۋ مەن ەلەكتر جۇيەسى تارتىلىپ, جول توسەلدى. بارلىعىن ءوز قاراجاتىمىزعا جاساپ جاتىرمىز. ءبىرىنشى قاباتتاعى ءاربىر بولمەدە سانيتارلىق توراپ – دارەتحانا مەن جۋىناتىن ورىن بار. ءبىزدىڭ دەمالىس ورنىندا جىل بويى جاتىپ تىنىعۋعا بولادى. قازىر ىشكى جۇمىستار – كافەل مەن لامينات توسەۋ, ەسىك ورناتۋ عانا قالدى. جاڭا جىلعا دەيىن جۇمىسىمىزدى باستاپ كەتۋگە نيەتتەنىپ وتىرمىز. ال كەلەسى جىلى ارنايى رۇقسات الساق, قوعامدىق تاماقتانۋ ورنى مەن سپورت الاڭدارىن سالۋ جوسپارىمىزدا تۇر. اتا-انالار الاڭسىز دەمالۋ ءۇشىن بالالارىن قالدىرىپ كەتە الاتىن بولمەلەر اشقىمىز كەلەدى. ارينە, ول جەردە جەتكىنشەكتەردى ارنايى قىزمەتكەرلەر قارايتىن بولادى, – دەيدى كاسىپكەر.
بۇعان دەيىن وبلىس باسشىسى ابىلقايىر سقاقوۆ اتالعان بولاشاق دەمالىس ورىندارىنىڭ قۇرىلىس بارىسىمەن تانىسىپ قايتقان ەدى. باياناۋىلدىڭ تۋريستىك الەۋەتىن ارتتىراتىن جوبالاردى جوعارى باعالادى. اكىمنىڭ تاپسىرماسىمەن جاسىباي دەمالىس ايماعىنداعى قوڭىر اۋليە ۇڭگىرىنە بيىك جول سالىندى.
اۋداندىق اكىمدىكتىڭ دەرەگىنە سۇيەنسەك, باياناۋىل ۇلتتىق پاركىندە وتكەن ماۋسىمدا شامامەن 96 مىڭ ادام دەمالىپ قايتقان. ال پاۆلودار وبلىسى كاسىپكەرلىك جانە يندۋستريالىق-يننوۆاتسيالىق باسقارماسىنىڭ باسشىسى ەرنۇر جاۋتىكباەۆتىڭ مالىمەتىنشە, ايماقتاعى تۋريستىك سالانى دامىتۋعا 2020-2022 جىلدارى جالپى سوماسى 3,1 ملرد تەڭگە ينۆەستيتسيا سالىنعان. ونىڭ 1,9 ملرد تەڭگەسى – جەكە سالىمدار. ءوڭىردىڭ تۋريستىك سەكتورىندا 119 جەكە كاسىپكەرلىك قىزمەت كورسەتەدى.
پاۆلودار وبلىسى,
باياناۋىل اۋدانى
