«تۇركيا پرەزيدەنتىنىڭ قازاقستانعا مەملەكەتتىك ساپارى اياسىندا بۇگىن تۇركيانىڭ قورعانىس ونەركاسىبى اگەنتتىگىنىڭ باسشىسى, ارىپتەسىم يسمايل دەمير ەكەۋمىز اەروعارىش ونەركاسىبى سالاسىنداعى ءوزارا تۇسىنىستىك تۋرالى مەموراندۋمعا قول قويدىق», دەپ جازدى مينيستر.
ونىڭ ايتۋىنشا, اتالعان مەموراندۋم سپۋتنيكتىك بايلانىس پەن تەلەحابار تاراتۋ سالالارىندا عارىشتىق جۇيەلەردى قۇرۋعا, جەردى قاشىقتىقتان زوندتاۋ, تەحنولوگيالىق جانە عىلىمي ماقساتتاردا ۇزاق مەرزىمدى ىنتىماقتاستىق ورناتۋعا مۇمكىندىك بەرەدى.
«جالپى, تۇركيالىق ارىپتەسىمدى عارىش سالاسى بويىنشا اتقارىلىپ جاتقان جوبالارمەن تانىستىرىپ, عارىشتىق مونيتورينگ پەن جەردى قاشىقتىقتان زوندتاۋ باعىتىنداعى جۇمىستارمەن تانىستىردىم. سونداي-اق, ارنايى كونسترۋكتورلىق تەحنولوگيالىق بيۋرونىڭ وندىرىستىك الاڭدارىن جانە «عالام» جشس-دەگى شاعىن عارىش اپپاراتتارىن سىناۋ زەرتحاناسىن ارالادىق.
سونداي-اق جەردى قاشىقتىقتان زوندتاۋ دەرەكتەرىمەن الماسۋ, سپۋتنيكتەردى ازىرلەۋ جونىندەگى ونەركاسىپتىك كاسىپورىنداردىڭ كووپەراتسياسى, سپۋتنيكتىك جۇيەلەردى قۇرۋ سياقتى باعىتتارداعى ىنتىماقتاستىق مۇمكىندىكتەرىن تالقىلادىق», دەپ جازدى باعدات مۋسين.
بۇدان بولەك, مينيستر جقز جەرسەرىكتەرىن بىرلەسىپ پايدالانۋ ماسەلەسىنە توقتالا كەتتى.
ء«بىز بۇل جۇيەدەن باس تارتپايمىز جانە عارىشتا جەرسەرىكتەردىڭ بولۋى مەن سانىنىڭ ارتۋىن ارى قاراي قاداعالايتىن بولامىز, سەبەبى ول قازاقستان حالقىنىڭ الەۋمەتتىك جانە ەكونوميكالىق يگىلىگىن ارتتىرۋ جولىندا ءوز ىقپالىن تيگىزبەك. بىراق قازىرگى الەمدە جەرسەرىكتىك اپپاراتتاردى جەكە دارا يەلەنۋگە بايلانىستى شىعىندار, ءبىرىنشى كەزەكتە ەكونوميكالىق تاۋەكەلدەردى تۋدىرادى. بىلايشا ايتقاندا, قاشىقتىقتان زوندتاۋ جەرسەرىگى قازاقستاننىڭ قاجەتتىلىكتەرى ءۇشىن ۇشىرىلاتىن بولسا, ءىس جۇزىندە ءبىز ونىڭ 10 پايىزىن عانا پايدالانامىز. ونىڭ مۇمكىندىكتەرىن بارىنشا پايدالانۋ ءۇشىن بارلىق ەلدەر دەڭگەيىندە جاھاندىق ساتىلىمداردى قۇرا ءبىلۋ قاجەت. قازىرگى ۋاقىتتا الەمنىڭ sharing economy باعىتىنا بەت بۇرىپ كەلە جاتقانىە ەسكەرە وتىرىپ, ارىپتەسىمىز ەكەۋمىز ەلدەرىمىزدەگى سپۋتنيكتىك جۇيەلەر توپتاماسىن بىرلەسىپ قۇرۋ جانە پايدالانۋ مۇمكىندىگىن قاراستاردىق», دەلىنگەن مينيستر حابارلاماسىندا.
كەزدەسۋدە تۇركى ەلدەرىنىڭ جەرسەرىكتەر توپتاماسىن قۇرۋ مۇمكىندىگى دە تالقىلاندى.
«دەمير مىرزامەن ءبىز ناقتى تەحنيكالىق جانە كوممەرتسيالىق ماسەلەلەردى تالقىلاۋ ءۇشىن تاجىريبە الماسۋدى دامىتۋ قورىتىندىعا كەلدىك. ەكى ەل اراسىندا كەلىسىمدەر جاسالىپ, ونى جۇزەگە اسىرۋ پروتسەسى باستالسا, باسقا تۇركى ەلدەرى دە جوباعا قىزىعۋشىلىق تانىتاتىنىنا سەنىمدىمىن», دەپ جازدى باعدات مۋسين.
