زاۋىتتىڭ №1 جانە №2 بالقىتۋ تسەحتارى كاسىپورىن اشىلعالى بەرى جۇمىس ىستەپ كەلە جاتىر. تسەحتاردى جاڭعىرتۋدىڭ كومپانيا ءۇشىن عانا ەمەس, ايماق ءۇشىن دە ستراتەگيالىق ماڭىزى بار. «قازحروم» ترانسۇلتتىق كومپانياسى دامۋ ستراتەگياسىن قايتا قاراستىرا كەلە 600-گە جۋىق ادام جۇمىس ىستەيتىن ەسكى تسەحتى جاڭعىرتۋدى ۇيعارعان. بۇل رەتتە وندىرىستىك قۋاتتى ارتتىرۋ عانا ەمەس, سونىمەن قاتار گاز تازارتۋ جۇيەسىن جەتىلدىرۋگە باسىمدىق بەرەتىن ەكولوگيالىق جوبالاردى جۇزەگە اسىرۋ دا ەرەكشە ماڭىزدى.
– تسەحتاردى جاڭعىرتۋ اقتوبە وبلىسىنىڭ تابيعات قورعاۋ جوبالارىن جۇزەگە اسىرۋ بويىنشا جول كارتاسىنا ەنگىزىلدى. ءبىز بۇل جۇمىستاردى دەر كەزىندە تىڭعىلىقتى ورىنداۋدىڭ ماڭىزىن تۇسىنەمىز جانە ول ءۇشىن بار كۇشىمىزدى سالىپ جاتىرمىز. قازىرگى كۇنى جوبالاۋ تولىق اياقتالدى, نەگىزگى تەحنولوگيالىق جابدىق ساتىپ الىنعان. گەولوگيالىق احۋالعا بايلانىستى مەردىگەر مەكەمە كەش انىقتالدى. قازىر مەردىگەر ۇيىم جوبانى ىسكە اسىرۋدى باستاپ كەتتى. №2 بالقىتۋ تسەحىنىڭ گازتازارتقىشىن جاڭارتۋ جىل سوڭىنا دەيىن, ال №1 بالقىتۋ تسەحىندا كەلەسى جىلدىڭ ءبىرىنشى جارتىجىلدىعىندا اياقتالادى دەپ جوسپارلانىپ وتىر, – دەيدى «قازحروم» ترانسۇلتتىق كومپانياسى» اق پرەزيدەنتى سەرگەي پروكوپەۆ.
جوبانى ىسكە اسىرۋ بارىسىندا ەلەكترلى سۇزگىلەر جەڭدىك سۇزگىلەرگە اۋىستىرىلادى. ولار الدىڭعىسىنا قاراعاندا ەكى ەسە ءتيىمدى. سونداي-اق تسەحتاردىڭ ىشىندەگى گاز قۇبىرلارى جۇيەسى جاڭعىرتىلىپ, جاڭا سۇزگىلەرگە گازداردى بۇرىپ جىبەرۋ ءۇشىن تومەنگى زونتتار قوندىرىلادى. بۇدان وزگە جوعارى قۋاتتى تۇتىنتارتقىلار مەن قوسىمشا قوسالقى ستانسا تۇرعىزىلادى.
اسپيراتسيالىق جۇيەنى «ەنەرگوماشەكولوگيا» (ۋكراينا) ينجينيرينگتىك كومپانياسى ازىرلەگەن. اتالعان كومپانيا فەرروقورىتپا وندىرىسىندەگى اسپيراتسيالىق جۇيەلەردى ءوندىرۋ سالاسىندا كوش باستاپ كەلەدى. ال اقتوبە مەتالل قۇراستىرۋ زاۋىتىنا قاراستى «قازەنەرگوماشەكولوگيا» ماماندارى قۇراستىرۋمەن اينالىستى.
– جوبانى جۇزەگە اسىرۋ ناتيجەسىندە بالقىتۋ تسەحتارىنىڭ جۇمىس كەڭىستىگىنەن شاڭدى ىرىكتەۋ جاقسارادى. №2 بالقىتۋ تسەحىنىڭ ەلەكتر سۇزگىلەرىن جاڭارتۋدان وزگە, شىعارىندى شاحتالارى مەن گاز قۇبىرلارىنىڭ اسپيراتسيا جۇيەسىن, №1 جانە №2 بالقىتۋ تسەحتارىنىڭ پەش قاقپاقتارىن تىعىزداۋ جۇمىستارى قولعا الىنادى. بۇل جۇمىستار گازتوزاڭدىق شىعارىندىلاردى وقشاۋلاۋ ماقساتىندا جۇرگىزىلەدى. جوبانىڭ ناتيجەسىندە, 2024 جىلى شاڭ شىعارىندىلارىن ورتاشا ەسەپپەن 1 830 تونناعا دەيىن قىسقارتۋ كوزدەلىپ وتىر. بۇل قورشاعان ورتاعا جۇكتەمەنى كەمى 30 پايىزعا ازايتۋعا سەپ, – دەيدى «قازحروم» ترانسۇلتتىق كومپانياسى» اق باس ەكولوگى سۆەتلانا ماششەنكو.
قازىرگى كۇنى جەڭدىك سۇزگىلەر مەن گاز قۇبىرلارىنىڭ, تۇتىنتارتقىنىڭ استىنا تىرەۋىشتەر ورناتىلىپ, ىرگەتاستار قالانعان. №2 بالقىتۋ تسەحىنداعى جۇمىس كەڭىستىگىنەن شاڭداردى قارماۋعا ارنالعان تومەنگى زونتتار قوندىرىلىپ جاتىر.
