سۋرەتتەردى تۇسىرگەن ەرلان ومار, «ەQ»
كورمە اياسىندا كوپتەگەن شارا جوسپارلانعان. ولار – اۋىل شارۋاشىلىعىنداعى تىڭ تەحنولوگيالاردى تانىستىرۋدان باستاپ, ءتۇرلى تاقىرىپتارعا كونفەرەنتسيا, ىسكەرلىك كەزدەسۋ وتكىزۋ, تاۋارلار مەن ونىمدەر ساۋداسى, اۋكتسيون, ءباسپاسوز ءماسليحاتى مەن جەكە كەزدەسۋلەر جانە تاعى باسقا ءىس-شارالار.
كورمەنىڭ جالپى اۋماعى 20 مىڭ شارشى مەتردى قۇرايدى. كەشە كورمەنىڭ رەسمي اشىلۋ سالتاناتى ءوتتى. كورمەگە قاتىسۋشىلاردى ەلىمىزدىڭ اۋىل شارۋاشىلىعى ءمينيسترى ەربول قاراشوكەەۆ قۇتتىقتادى.
«KazAgro/KazFarm – وتە ماڭىزدى وقيعا. اۋىل شارۋاشىلىعى تاۋار وندىرۋشىلەرىنىڭ اسا كۇردەلى دە جاۋاپتى جۇمىسىنىڭ ناتيجەسىندە بيىل ەگىن وراعىن وتە جاقسى ناتيجەلەرمەن اياقتاعانىمىزدى كورىپ وتىرمىز. بۇل كورمە اياسىندا كوپتەگەن كەلىسىمشارتقا قول قويىلاتىنىنا سەنىمدىمىن. ءبىزدىڭ كومپانيالار بايلانىس, تەحنولوگيا جانە وزىق تاجىريبە الماسۋ ارقىلى وزدەرى ءۇشىن كوپتەگەن مۇمكىندىكتى اشاتىنىنا سەنىمدىمىن», دەدى مينيستر.
ال اۋىل شارۋاشىلىعى ۆيتسە-ءمينيسترى تامابەك ابىلقايىر قازاقستان – اگرارلى ەل بولعاندىقتان, اگروونەركاسىپ كەشەنى ەل ەكونوميكاسىندا شەشۋشى ءرول اتقاراتىنىن جەتكىزدى. بۇل – ەلدىڭ تۇراقتى دامۋىن, قاۋىپسىزدىگىن جانە ەكسپورتتىق الەۋەتىنىڭ ءوسۋىن قامتاماسىز ەتۋدىڭ ەڭ ماڭىزدى فاكتورى. اگروونەركاسىپتىك كەشەن – حالىقتىڭ جارتىسىنا جۋىعى ءۇشىن نەگىزگى تابىس كوزى جانە اۋىل شارۋاشىلىعى ونىمدەرىن وندىرۋگە, ونى وڭدەۋگە جانە ساقتاۋعا ماماندانعان, سونداي-اق اۋىل شارۋاشىلىعى مەن قايتا وڭدەۋ ونەركاسىبىن قاجەتتى ونىمدەرمەن قامتاماسىز ەتەتىن تىعىز ەكونوميكالىق جانە وندىرىستىك بايلانىستارى بار سالالاردى قامتيدى. كورمەنىڭ ماقساتى – اۋىل شارۋاشىلىعى سالاسىنداعى جەتىستىكتەردى كورسەتۋ جانە قازاقستاننىڭ بارلىق فەرمەرىن بىرەگەي الاڭعا بىرىكتىرۋ. كورمە وتكىزۋ يگى داستۇرگە اينالعانى قۋانتادى», دەدى ۆيتسە-مينيستر.
سالتاناتتى ءىس-شارادا ديپلوماتيالىق ميسسيالار باسشىلارى اتىنان گەرمانيانىڭ قازاقستانداعى توتەنشە جانە وكىلەتتى ەلشىسى مونيكا يۆەرسەن نەمىس كومپانيالارى ۇلكەن قىزىعۋشىلىق تانىتاتىن اگروونەركاسىپ كەشەنىندە قازاقستاننىڭ الەۋەتى زور ەكەنىن, بۇگىنگى تاڭدا كورمەگە ۇسىنىلعان كومپانيالاردىڭ سانى وتكەن جىلمەن سالىستىرعاندا ەكى ەسەگە ءوسىپ, 24-كە جەتكەنىن اتاپ ءوتتى.
قازاقستان مەن گەرمانيا اراسىنداعى ءوزارا ءىس-قيمىلدىڭ ماڭىزدىلىعىن DLG (گەرمانيا اۋىلشارۋاشىلىق قاۋىمداستىعى) باسقارۋشى ديرەكتورى توبياس ەيحبەرگ دە اتاپ ءوتتى. سپيكەر «KazAgro/KazFarm» ءبىلىم الماسۋ, يننوۆاتسيالار مەن عىلىمي ازىرلەمەلەردى كورسەتۋ, سونداي-اق وندىرۋشىلەر, فەرمەرلەر جانە تۇتىنۋشىلار اراسىندا بايلانىس ورناتۋ ءۇشىن تاماشا الاڭ ەكەنىن اتاپ ءوتتى.
ال «روستسەلماش» كومپانياسىنىڭ قازاقستانداعى ساتۋ دەپارتامەنتىنىڭ ديرەكتورى سەرگەي روبچەنكو ءتيىمدى ىنتىماقتاستىققا مۇمكىندىك بەرەتىن جانە جاڭا نارسەلەردى ۇيرەنۋگە قولايلى جاعداي جاسايتىن تاماشا پلاتفورما ءۇشىن ۇيىمداستىرۋشىلارعا العىس ايتتى.
كورمە تاريحىندا العاش رەت استانادا اسىل تۇقىمدى قوشقارلار مەن ەشكىلەردىڭ بيوماتەريالىنىڭ (ۇرىعىنىڭ) اۋكتسيونى ءوتتى. بۇل اۋكتسيوننىڭ ەرەكشەلىگى, جانۋارلاردى ىرىكتەۋگە, سول ارقىلى ەت, ءسۇت جانە ءجۇننىڭ ەڭ جوعارى ساپاسىنا قول جەتكىزۋگە مۇمكىندىك بار. مىسالى, گەمپشير اسىل تۇقىمدى قوشقار بيوماتەريالى 100 جىلعا دەيىن ساقتالادى. مۇنداي بيوماتەريالدىڭ باعاسى جىل سايىن ءوسىپ كەلە جاتقانىن اتاپ وتكەن ءجون. كورمەگە وسى سەكىلدى «ەليتالىق» سىنىپتاعى اسىل تۇقىمدى ەدىلباي, دورپەر, قاراكول, مەرينوس, تسۆارتبلەس تۇقىمدارى, زاانەن ءسۇتتى ەشكىلەرى قويىلادى. شاۋەتتى كريوكونسەرۆاتسيالاۋ زەرتحانادا IMV تەحنولوگياسى بويىنشا (فرانتسيا) جۇرگىزىلەدى.
كورمە بارىسىندا ۇسىنىلاتىن يننوۆاتسيالىق تەحنولوگيالىق شەشىمدەردىڭ قاتارىندا سيىرلارعا قولايلى جاعداي جاساپ, ونىمدىلىكتى ارتتىرۋعا ارنالعان Dairy Robot R9500 ساۋ روبوتىنىڭ تۇساۋكەسەرى دە بار.
كورمە اياسىندا العاشقى كۇنى «ۇزدىك ساۋىنشى» بايقاۋى ءوتتى, وندا اركىم ءىرى قارا مالدى ساۋ شەبەرلىگىنە تەستىلەۋدەن ءوتتى. قاۋىپسىزدىك ماقساتىندا بايقاۋ سيىرلاردىڭ اعاش ۇلگىلەرى بويىنشا عانا وتكىزىلدى. ساۋىنشىلار بايقاۋىنا قاتىسۋ ەرىكتى تۇردە بولدى. قاتىسقانداردىڭ ءبىرازىن ەر ادامدار قۇرادى.
سونداي-اق كورمە بارىسىندا مال وسىرۋشىلەر, ۆەتەرينارلار جانە قازاقستاننىڭ مال شارۋاشىلىعى سالاسىنىڭ ينۆەستورلارى ءۇشىن «جوعارى ساپالى يدەنتيفيكاتسيا قۇرالدارىن پايدالانا وتىرىپ, جانۋارلاردىڭ اسىل تۇقىمدىلىعىن جاقسارتۋ: قازاقستان رەسپۋبليكاسىنداعى اعىمداعى تاجىريبە جانە بولاشاق الەۋەتى» اقپاراتتىق شاراسى ءوتتى.
كورمەگە قاتىسۋ كەز كەلگەن ادام ءۇشىن پايدالى دەۋگە بولادى. ماسەلەن, كورمەنى ارالاي ءجۇرىپ قازاقستاندا ساتىلىپ جاتقان ءتۇرلى اۋىل شارۋاشىلىعى تەحنيكالارىنىڭ ونلاين بازارى سەكىلدى ارناۋلى ءموبيلدى قوسىمشانى جۇكتەپ الۋعا, سول ارقىلى قاي جەردە قانداي تەحنيكا ساتىلىمعا شىعارىلاتىنىن ءبىلىپ, ونىڭ يەسىمەن قولما-قول كەلىسسوز جۇرگىزۋگە بولادى. وسى قوسىمشانى ازىرلەگەن «Traktor.app» ماماندارى بۇل سەرۆيستىك قىزمەتتىڭ قاراپايىم شارۋالارعا كومەگى مول ەكەنىن ايتتى.
